О́SKEMEN. 5 aqpan. Bıyl elimizde Qazaqstan halqy Assambleıasynyń 20 jyldyǵy, Uly Jeńistiń 70 jyldyǵy, Qazaq handyǵynyń 550 jyldyǵy jáne Uly Abaıdyń 170 jyldyǵy merekelenedi. Atalǵan mereıtoılar sheńberinde Shyǵys óńirinde 4500-den astam is-shara ótetin bolady. Oǵan 500 myńnan astam adam qatysady dep kútilýde. Bul týraly egemen.kz tilshisi habarlady.
Oblystyq aqparat ortalyǵynda baspasóz ókilderimen ótkizgen brıfıng barysynda oblys ákiminiń orynbasary Jaqsylyq Omar atalǵan mereıtoılardyń óńirde keńinen atalyp ótetinin jetkizdi.
«Aýqymdy mereıtoılyq sharalardy ótkizýdiń Ulttyq jospary ázirlenip, bekitildi. Osy kestege sáıkes, oblys deńgeıindegi sharalar jospary da óńir basshysy Danıal Ahmetovtiń maquldaýymen bekitildi. Bul sharalar jyl boıy barlyq qalalar men aýdandarda ótetin bolady», – dedi Jaqsylyq Omar.
Erteń búkil qazaqstandyqtardyń qatysýymen ashylatyn «Qazaqstan halqy Assambleıasynyń jyly» sınhron-aksııasy О́skemendegi Komsomol aralynda ashyq aspan astynda ótedi. Assambleıa jylynyń ashylýy aıasynda «Qazaqstan halqy Assambleıasynyń 20 jyldyǵyna – 20 qaıyrymdy is!» atty estafeta uıymdastyrylady. Oǵan óńirdegi barlyq etnomádenı birlestikterdiń ókilderi qatysady. Sondaı-aq oblysta 9 Dostyq úıi jumys isteýde. «Mereıtoı jyly biz osy Dostyq úıleri men etnomádenı uıymdar arasynda «Kúshimiz – birlikte!» atty spartakıada ótkizýdi uıǵaryp otyrmyz», – dedi oblys ákiminiń orynbasary.
Ultaralyq tatýlyqty saqtaýda Shyǵys Qazaqstan oblysynyń únemi tyń ıdeıalarymen kósh bastap kele jatqany belgili. Osy oraıda oblys boıynsha Assambleıa jylyna arnalǵan 100-den asa is-shara ótetinin aıta ketken lázim.
Dýman Anash.
Derek: egemen.kz.
Sýret: Shyǵys Qazaqstan aqparattyq ortalyǵy.