Rymtaı Shókeev bastaǵan ardagerler keńesiniń músheleri oblys ortalyǵynda ornalasqan «QazTransOıl» AQ Shyǵys fılıalynyń óndiristik nysandaryn aralap, munaı tasymaldaý júıesimen tanysýǵa ótinish bildirse kerek. Qazir ózgerister zamany, basqa ýaqyt. О́z elimizdiń ıgiligin ózimiz kórýdemiz. Otandyq munaıdyń aty – otandyq munaı. Al, ardagerlerdi bul munaı sonda qaıda barady, qaıdan keledi degen suraq mazalaǵan ǵoı. Aldymen ardagerler toby Pavlodardaǵy munaı qubyry basqarmasyna qarasty munaı óndirý stansasyna barady. Kompanııanyń Shyǵys bólimshesiniń ortalyq dıspetcherlik pýnktindegi keń ekrannan Shymkent, Qaraǵandy, Petropavl, Úsharal, Jezqazǵan jáne Pavlodardaǵy basqarmalaryna qaraıtyn 4 myń shaqyrymnan astam munaı qubyrlary júıesin kórip tańǵalypty.
Ardagerlerdi tańǵaldyrǵan ekinshi habar, ol – Shyǵys fılıalynda 3 myńdaı adam eńbek etetindigi. Byltyr 21 mıllıon tonna munaı tasymaldanypty. Quny 23 mlrd. teńge turatyn «Qumkól-Qaraqoıyn» baǵytynda magıstraldi munaı qubyry salynypty. Bul qubyr Qytaıǵa tasymaldanatyn munaı kólemin jylyna 20 mıllıon tonnaǵa deıin jetkize alady eken.
Ardagerlerdi tańǵaldyrǵan úshinshi qýanysh – bıyl kompanııanyń demeýshiligimen oblys ortalyǵynda balabaqsha qurylysy bastalmaqshy kórinedi. Buǵan qosa, fılıaldyń sport jáne jattyǵý zaldarynda Qabıbolla Shákárim aǵamyz basqaratyn «Zamandas» ardagerler klýbynyń ardagerleri kelip deneshynyqtyrýmen aınalysady eken. Ardagerler ózderin tań-tamasha qaldyrǵan Shyǵys fılıalynyń jasap jatqan jumystary uzaǵynan bolsyn, til tımesin dep sáttilik tilep, alǵystaryn bildirdi.
Farıda BYQAI,
«Egemen Qazaqstan».
PAVLODAR.