Oblys aýmaǵyndaǵy belsendi jastardyń bastamasymen erekshe ıgi is bastaý aldy. Aımaq ortalyǵy Semeı qalasy men Maqanshy, Kókpekti, Aqsýat aýdandarynyń eriktileri «Tátti shaı» aksııasyn uıymdastyryp óńir turǵyndaryna jylylyq syılaǵan.
Aksııany uıymdastyrýshylar kúnniń sýyǵyna qaramastan, qala tazalyǵy men óńir kelbetiniń kórkin keltiretin jumysshylar men qyzmetkerlerge kóńil bólip, olarǵa ystyq shaı men táttiler usynyp jylýlyq syılaýdy maqsat etken. Osy arqyly óńir turǵyndarynyń bir-birine degen qurmetin arttyrý, jumysshy mamandyqtarynyń mereıin ústem etý basty nazarǵa alynǵan.
«Abaı jastary» jastar resýrstyq ortalyǵy dırektory Aıdos Tóleýqanov jaqsylyq jarshysy bolyp júrgen jastar men eriktiler ásirese, tazalyqqa jaýapty kommýnaldyq qyzmetkerlerge halyqtyń erekshe alǵysy men qurmetin jetkizýdi kózdegenin aıtady.
«Erikti jastar ystyq shaı men táttiler usynyp, óńir halqyn qýantyp jatyr. Sondaı-aq kóshedegi kez kelgen adam jastar qolynan dám tata alady. «Tátti shaı» aksııasyna 200-den asa erikti qatysty. Birneshe kún ishinde olar shamamen 300-ge jýyq turǵyndy qýantty. Is-sharada turǵyn úılerdiń aýlalary men kóshelerdi tazartatyn qyzmetkerler qamtyldy», deıdi Aıdos Abylǵazyuly.
Aldaǵy kúnderi eriktiler aksııa aıasynda zeınetkerler, múmkindigi shekteýli jáne kómekke muqtaj jandardyń úıine arnaıy bas suǵyp, úı-jaılaryndaǵy sharýalaryna qolǵabys etý men aýlalaryn qardan tazartý sııaqty jumystaryna bel sheship kirisedi.
SEMEI