Aqtóbe qalasyndaǵy №56 orta mektepte «Turmystyq qaldyqtarǵa ekinshi ómir syıla» atty baıqaý ótti. Oǵan oblys ortalyǵyndaǵy elý eki mekteptiń 8-11 synyptarynan 90 oqýshy qatysyp, qaldyqtardan jasaǵan buıymdaryn kórmege qoıdy.
Olardyń arasynan plastık qutylar, rezeńke materıaldar, qaǵaz qıyndylary, synǵan aǵash-butaqtar, kıimder men mata qıyndylarynan kúndelikti turmysqa qoldanylatyn buıymdar erekshelendi. Sonyń ishinde plastık qaldyqtarynan jasalǵan gúl salatyn qumyra, qalyń matadan tigilgen asúı qolǵaptary men tósenishter, jas óskinderge arnalǵan uıashyqtar, kireberiske jaıylatyn rezeńke tósenishter jurttyń nazaryn aýdardy.
Oqýshylarynyń týyndylaryn tamashalaýǵa kelgen Aqtóbe qalasyndaǵy №40 orta mekteptiń bıologııa páni muǵalimi Farıda Súıin osy jobanyń ómirsheńdigin atap ótti. Birinshiden, qoldanystan shyǵyp qalǵan buıymdardy qaıta kádege jaratý arqyly bala boıynda ekologııalyq mádenıet qalyptasady. Ekinshiden, tiginshilik, qolónershilik, ustalyq ónerdi meńgerýge degen qulshynys týdyrady. Úshinshiden, turmystyq buıymdy qoldan jasaý arqyly qarjy únemdeýge bolatynyna kóz jetkizedi. Bul ári tárbıe, ári mamandyqqa baýlý, ári sheberlikti oıatý, ári tabıǵatqa degen janashyrlyqtyń kórinisi. Baıqaý qorytyndysy boıynsha qazylar alqasy eń úzdik kreatıvti jobalardy atap, baǵaly syılyqtar tabystady.
Aqtóbe oblysy