Elimizde teri ılep, jún tútetin seh azaıǵaly qashan. Sonyń saldarynan mal terisi tıyn-tebenge de saýdalanbaı qaldy. Teri óndirisinen tipti teris aınaldyq. Qaraǵandylyq Gúlpahat Quttybaeva esimdi qarshadaı qyz osy olqylyqtyń ornyn toltyrmaqqa nıettenip, teri-jún óńdeý sehyn ashty.
Júnnen túrli kartına jasaý – Gúlpahattyń bala kezden bergi súıikti isi. Sodan da bolar, ol kásibin asharda táýekelge bel baılady. Onyń júnnen toqylǵan kartınalary shetel naryǵyna da shyǵa bastady. Ásirese kádesyı retinde ótimdi.
Osydan alty jyl buryn ol «Dostyq» úıinde ótken sheberlik saǵatynda alǵash ret kıiz basyp kóredi de, bul óner janyna jaqyn ekenin uǵynady. Jún tútip, túrli qolóner buıymdaryn ázirleýge bolatynyn túsinip, bul kásipke den qoıa bastaıdy. Anasy da – sheber. Búginde Qaraǵandy oblysy «Jadiger» qolónershiler qaýymdastyǵynyń tóraǵasy. Qaraǵandyda qyz jasaýyn tigetin eń úzdik sheberlerdiń biri. Úıindegi anasyna qolǵabys jasap, is tigip, ábden qolyn jattyqtyryp alady. «Dostyq» úıindegi qolóner úıirmesine de úzbeı baryp júredi. Mektepte júrgende-aq alǵashqy tabysyn tabady.
Júnnen jasalǵan onyń ónimderin alǵash bolyp atymtaı jomart kásipker Erlan Áshim satyp alypty. Mesenat qazaqy naqyshtaǵy kartınalardy óziniń «Turan el» ulttyq meıramhanasynyń qabyrǵasyna ilip qoıypty. Odan bólek mártebeli meımandaryna kádesyı retinde usynyp júr eken. Sodan jas sheberge tapsyrys tópelep túsedi. Áıtpese Gúlpahat Muhamedqyzy óz ónimderin saýdalap, jarnama jasaǵan emes. О́zi oılamaǵan jerden týyndylary trendke aınalyp shyǵa kelgen. Qazir de jarnamany qajet etpeıdi. «Sehty ashamyn» dep, qujatymen júgirgeli beri tapsyrys taýdaı bop úıilip qalypty.
Osy iske bar ynta-shyntasymen kirisken Gúlpahat Muhamedqyzy – Qaraǵandy tehnologııa jáne servıs kolledjiniń úshinshi kýrs stýdenti. Dızaıner-tiginshi mamandyǵy boıynsha bilimin jetildirip jatyr. Kolledj basshylyǵy da alǵyr stýdentterin barynsha qoldap, basqalarǵa úlgi etedi.
Jas kásipker qolóner sheberleriniń respýblıkalyq, halyqaralyq kórmelerine jıi qatysady.
– 2023 jyly Astana qalasynda ótken sammıtke qatysqan edim. Sol kezde el Prezıdenti Qasym-Jomart Toqaev pen Fransııa Prezıdenti Emmanıýel Makron kelip, qolónerimdi tamashalady. Keıin V Dúnıejúzilik kóshpeliler oıyndaryna da týyndylarymdy apardym. Sol kezde shetelden kelgen týrıster júnnen toqylǵan kartınamdy, qolsómkelerdi satyp alyp, rızashylyǵyn bildirdi, – deıdi Gúlpahat.
Osy kásipten shabyt alǵan jas sheberdiń armany da asqaq. Kıizden jasalǵan qolóner buıymdaryn álemdik brendke shyǵarsam deıdi. Qarshadaı qyz qaltasynyń qamy úshin emes, ulttyń múddesin áýelgi kezekke qoıyp otyr.
О́ńirimizde jún óńdeıtin kásiporyn joq deýge de bolady. Sharýalar shıkizat ótkizetin jer tappaı otyr. Amal joq qanshama teri-jún dalada shirip jatyr. Gúlpahattyń jańadan ashqan shaǵyn sehy osy bir úlken sharýanyń bastaýyndaı kórinedi.
«Atameken» ulttyq kásipkerlerdi qoldaý palatasynyń «Bir aýyl – bir ónim» jobasyna qatysyp, bıznes josparyn qorǵap shyqqan. Sodan oblys ákiminiń 5 mln teńge qaıtarymsyz grantyn utyp alǵan. Ákim granty sóıtip kásibin ári qaraı damytýǵa serpin bergen. Qarajatqa júndi tútetin ári sozatyn, tipti, ılep beretin de stanoktar alypty. Endi mehanızmi mol jabdyqtyń arqasynda jumys kúshi jeńildep, ónim kólemi artady. Onymen qosa sehyn jalǵa alyp otyr.
«Jeke kásibimdi ata-anamnyń kelisimi arqyly ashtym. Buǵan deıin ózimniń qyzyǵýshylyǵymmen júnnen kartına, kishirek tekemetter jasadym. Túrli kórme-jármeńkege qatysyp, klıent jınadym. Anamnyń jún óndirisin ashý kerek degen usynysynan keıin bıznes-jospar qurdym. Oǵan deıin óz sharýashylyǵymyzdaǵy qoıdyń júnin tazalap, kádege jaratyp júrdim. Al boıalǵan júndi Reseıden aldyryp otyrdym. Ol qaltany qaǵyp túsiretin edi. Sodan arnaıy júndi boıaýdyń tehnologııasyn da úırenip aldym. Sehymda ázirshe bir jumysshy ǵana eńbek etedi. Seh jumysyn bir izge túsirgen soń, jumysshy sanyn kóbeıtemin», – deıdi jas kásipker.
Ákesi Muhamedtiń Shet aýdany Kóktińkóli aýylynda «Birlik» qoı sharýashylyǵy bar. Ázirge sondaǵy qoı júnin kádege jaratyp otyr. Aldaǵy kúni tek kartına ǵana emes, ulttyq naqyshtaǵy túrli buıym men kıim-keshek túrin, kórpe-jastyqtardy, qyz jasaýlaryn naryqqa shyǵarý josparynda bar. Sonda basqa da fermerlerdiń shıkizatyn qabyldaıdy.
Aımaǵymyzda Gúlpahat sekildi kásip ashýǵa talpynǵandarǵa memleket tarapynan jan-jaqty qoldaý kórsetilip otyr. Olarǵa 2005 jyldan beri oblys ákiminiń granty úzdiksiz berilip keledi. Bıyl da mádenıet, ǵylym, aqparattyq tehnologııa, medıa jáne basqa da erekshe bıznes joba usynǵan jastarǵa qarjylaı qoldaý bar.
Qaraǵandy oblysy