Keshe Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Italııanyń Qazaqstandaǵy Tótenshe jáne ókiletti elshisi Stefano Ravanıandy onyń ótinishi boıynsha qabyldady, dep habarlady Senattyń baspasóz qyzmeti.
Joǵary palata basshysy Qazaqstan Prezıdenti N.Nazarbaev pen Italııa Premer-mınıstri M.Rensı arasyndaǵy 2014 jylǵy maýsym jáne qazandaǵy kelissózderi yqpal etken Qazaqstan men Italııanyń qarqyndy damýyna qanaǵattanǵandyq bildirdi.
Q.Toqaev eki el arasyndaǵy parlamenttik almasýlardyń mańyzdy ekenin aıtty jáne EQYU Parlamenttik Assambleıasy aıasynda delegasııalar arasyndaǵy ózara is-qımylǵa kóńili tolatynyn jetkizdi.
Senat Tóraǵasy S.Ravanıandy bıylǵy maýsymda bolatyn jáne dinı kóshbasshylar men saıası qaıratkerlerdiń beıbitshilik, damý jáne qaýipsizdik jolyndaǵy únqatysýyna arnalatyn Álemdik jáne dástúrli dinder kóshbasshylarynyń besinshi sezine daıyndyq týraly habardar etti.
Qazaqstan Senatynyń basshysy BUU Qaýipsizdik Keńesiniń turaqty emes músheligine elimizdiń kandıdatýrasy qoldaý tabatynyna senim bildirdi jáne Astanada ótetin EKSPO-2017 halyqaralyq kórmesine ıtalııalyq kompanııalardy qatysýǵa shaqyrdy.