Búgin Májilistiń jalpy otyrysynda azamattyq qorǵaý organdary qyzmetkerleriniń áleýmettik shyǵynyn óteý usynyldy, dep jazady Egemen.kz.
Osy salada ter tógetin azamattarǵa jáne olardyń otbasy múshelerine qonys aýdarý boıynsha járdemaqy, múlikti tasymaldaý, sondaı-aq barlyq otbasy múshesin qosa alǵanda, temir jol, sý jáne avtomobıl kóligimen jol júrý shyǵyndary tólenedi.
Olarǵa soǵys nemese tótenshe jaǵdaı kezeńinde, terrorızmge qarsy operasııa kezinde, qarýly qaqtyǵys jaǵdaıynda jáne tótenshe jaǵdaı jarııalanǵan aımaqtarda jumys istegeni úshin ústemeaqy belgilenedi. Mundaı jaǵdaıda qyzmetkerdiń eńbek ótiliniń bir kúni úsh kúnge teńestiriledi.
«Azamattyq qorǵaý organdary men áskerı qyzmetkerlerdiń turǵyn úıdi jalǵa alǵan shyǵyndary óteledi. Májilis depýtattary azamattyq qorǵaý máseleleri boıynsha zańnamalyq túzetýlerge osyndaı norma engizýdi usyndy. Demek endi turǵyn úı tólemderin tótenshe jaǵdaılar júıesi qyzmetkerleri de alatyn bolady», delingen Májilis habarlamasynda.
Eger órt sóndirýshi nemese qutqarýshy jaýyngerlik jaǵdaıda qyzmettik mindetterin oryndaý kezinde zardap shekse sanatorııalyq-kýrorttyq negizde ońaltýdan ótýge múmkindik te beriledi.