Bıylǵy Jumysshy mamandyqtary jyly aıasynda elordadaǵy Kásiptik-tehnıkalyq kolledjde ashyq esik kúni ótti. Onda atalǵan bilim mekemesi men qaladaǵy iri jumys berýshi kásiporyndar arasyndaǵy yntymaqtastyqty nyǵaıtý týraly sóz boldy.
Kásiptik-tehnıkalyq kolledji 16 jyldan beri elektr jáne gazben dánekerleýshi, tokar, jol-qurylys mashınısi, tehnık-mehanık, elektr mamany, jalpy qurylys sheberi, sondaı-aq avtokólik jóndeý slesary, jabdyqtardy retteýshi, kran mashınısi sııaqty suranysqa ıe mamandardy daıarlaıdy.
Is-shara barysynda bilim mekemesiniń «ALKON+» jáne «Astana Tazalyq» JShS sııaqty kásiporyndarmen yntymaqtastyǵyna basa nazar aýdaryldy. Aldymen kompanııa ókilderi jastarǵa ózderiniń qyzmeti týraly baıandady. Sonymen birge teorııalyq bilimdi óndiristik tájirıbemen ushtastyratyn dýaldy oqytýdyń mańyzyna toqtaldy.
Aıtalyq, «ALKON+» kompanııasy – bas shahardaǵy qasbettik dızaın salasyna mamandanǵan irgeli kásiporynnyń biri. Qurylys salasynda aıtarlyqtaı jetistikke qol jetkizgen. Búginge deıin biraz stýdent osy kásiporynda tájirıbeden ótip, óz mamandyqtarynyń qyr-syryn úırengen. Kompanııanyń bas dırektory Beısen Jolboldıev atalǵan oqý ornymen aradaǵy tyǵyz baılanys birneshe jyldan beri jalǵasyp kele jatqanyn aıtty.
«Shynynda da, dýaldy oqytýdyń mańyzy erekshe. О́ıtkeni stýdentter ýaqytynyń 65 paıyzǵa jýyǵyn óndiriste ótkizedi. Bul teorııalyq bilimdi damytyp, jastarǵa qyzmet jolynda jetistikke jetýge múmkindik beredi. Biz jas mamandardy jumysqa tartýǵa múddelimiz. Olarǵa tek tájirıbeden ótýge ǵana emes, oqýyn aıaqtaǵannan keıin jumys ornyn usynýǵa da daıynbyz», dedi ol.
Sondaı-aq «Astana Tazalyq» kásiporny da kolledjben óte jaqyn baılanysta. Kompanııanyń HR menedjeri Symbat Hakimova stýdentter sanyn shektemeı, olardy kez kelgen ýaqytta tájirıbeden ótkizýge daıyn ekenin jetkizdi.
Mazmundy is-shara sońynda óndiristik tájirıbede úzdik nátıje kórsetken stýdentterge Alǵyshat tabys etildi.
Qaısar Qusaıyn