О́tken jyly Qazaqstan Memleket basshysynyń tapsyrmasyn iske asyrýda aıtarlyqtaı nátıjelerge qol jetkizdi. Sıfrlyq transformasııanyń normatıvtik jáne ádisnamalyq negizderi ázirlenip, saraptamalyq baza qalyptastyryldy jáne túrli salalarda aýqymdy reformalar iske qosyldy, dep habarlaıdy Egemen.kz
Prezıdent Qazaqstannyń sıfrlyq tehnologııalar arqyly azamattardyń kúndelikti ómirin barynsha jeńildetýge jáne barlyǵyna teń múmkindikterge qol jetkizýge nıetti ekenin basa aıtqan edi.
«Ol úshin memlekettik basqarýdy sıfrlandyrýdyń sapaly jańa formatyna kóshý kerek. Onyń máni memlekettik saıasattyń basty baǵyty adamǵa, onyń qajettilikteri men múddelerine baǵyttalǵandyǵynda», dedi Memleket basshysy Qasym-Jomart Toqaev.
Bul rette Sıfrlyq damý, ınnovasııalar jáne aeroǵarysh ónerkásibi mınıstrliginiń málimetinshe, sıfrlyq transformasııanyń negizgi quraldarynyń biri bıznes-prosesterdi qaıta qurý boldy. 1200-den astam memlekettik úderisterdi qaıta qaraý nátıjesinde 23 memlekettik organda 468 bıznes-úderis ońtaılandyryldy, bul olardyń oryndalý merzimin orta eseppen 45%-ke qysqartýǵa múmkindik berdi. Atap aıtqanda, Aýyl sharýashylyǵy mınıstrliginde 98 prosestiń reınjınırıngi qyzmet kórsetý merziminiń 55%-ke qysqarýyna ákeldi. Ishki ister mınıstrligi men Ulttyq ekonomıka mınıstrliginde bul kórsetkish sáıkesinshe 55% jáne 85%-dy qurady.
Aıta keteıik, jyldyń basty jetistigi memlekettik qyzmetterdi sıfrlandyrý deńgeıin arttyrý boldy. BUU derekterine sáıkes, Qazaqstan onlaın-qyzmetter ındeksi boıynsha top-10 eldiń qataryna kirip, sıfrlandyrý deńgeıi boıynsha 193 memlekettiń ishinde 24-shi oryndy ıelendi.
«Búgingi tańda halyqtyń 93%-ten astamy eGov portaly arqyly elektrondyq qyzmetterge qol jetkize alady. Memlekettik qyzmetterdiń 90,8%-i smartfondar arqyly qoljetimdi. Bıometrııalyq sáıkestendirý men QR-qoltańbalardy engizý elektrondyq qyzmetterdi alý prosesin jeńildetti — bir jyl ishinde qazaqstandyqtar QR-kodtar arqyly 23 mıllıonnan astam qujatqa qol qoıdy», delingen habarlamada.
Qazaqstandaǵy sıfrlyq transformasııa memlekettik qyzmetterdi neǵurlym qolaıly, qoljetimdi jáne tıimdi etýge baǵyttalǵan.
Azamattardyń ómirin jaqsartqan sıfrlyq sheshimderdiń mysaldary:
Sandyq áskerı bılet qaǵaz qujattaryn tolyǵymen aýystyrdy. Balabaqshalarǵa onlaın tirkelý vaýcherlik qarjylandyrý júıesiniń arqasynda prosesti ashyq etti. «Eýropalyq hattamany» engizý saqtandyrý tólemderin alý merzimin 40 kúnnen 5 kúnge deıin qysqartyp, polısııanyń qatysýynsyz JKA resimdeýge múmkindik berdi. Atqarýshylyq is júrgizýdi avtomattandyrý azamattarǵa qarjylyq júktemeni azaıta otyryp, jeke sot oryndaýshylarynyń qatysýyn boldyrmady. Sıfrlandyrý balabaqshalarǵa, mektepterge, joǵary oqý oryndary men jataqhanalarǵa túsýdi jeńildetti, sondaı-aq densaýlyq saqtaý, áleýmettik qorǵaý jáne tirkeý qyzmetterindegi prosesterdi ońtaılandyrdy.Vedomstvonyń habarlaýynsha, 2025 jyly 44 memlekettik qyzmettiń merzimin qysqartý, 20 memlekettik qyzmetti proaktıvti formatqa aýystyrý, sondaı-aq 35 memlekettik qyzmetti transformasııalaý josparlanǵan.
«Sıfrlyq transformasııanyń nátıjeleri búginde mıllıondaǵan qazaqstandyqtar úshin aıqyn. Árbir joba memlekettik qyzmetterdiń yńǵaılylyǵyn, ashyqtyǵyn jáne qoljetimdiligin arttyrýǵa baǵyttalǵan. Sıfrlandyrý deńgeıin arttyrý bilim berýge, densaýlyq saqtaýǵa jáne áleýmettik qyzmetterge qoljetimdilikti jaqsartady, olardy yńǵaıly jáne ádil etedi. Qazir kóptegen memlekettik qyzmet onlaın-formatta, kezeksiz jáne qosymsha bıýrokratııalyq rásimdersiz qoljetimdi», delingen mınıstrlik habarlamasynda.