О́z kásibine adal, óz mamandyǵyn jaqsy kóretin bir adam bolsa - Baǵlan Tóleýulyndaı bolsyn. QR PIB Prezıdenttik ortalyǵynyń Baspa isi jáne redaksııalyq qyzmetiniń jetekshi sarapshysy Baǵlan aǵany barsha áriptesteri mol tájirıbesi, joǵary jaýapkershiligi, eńbekqorlyǵy hám adaldyǵy úshin jaqsy kóredi.
Baǵlan Tórebekovtiń baspa isimen aınalysyp júrgenine otyz jylǵa jýyqtap qalypty. Bul salanyń qyr-syryn meńgerip, basqalarǵa tálimin úıretýge ábden jetetin ýaqyt. Ol kezinde mamandyǵyn durys tańdaǵanyna eshqashan kúmán keltirgen de, ókingen de emes. Kerisinshe, mamandyǵyn maqtan tutady, jumysy óte sapaly ekenine senimdi. Naǵyz ýaqyt talabyna saı, ózine de, jurtqa da paıdaly, shyǵarmashylyq shabyt pen qabiletti qajet etetin ispen shuǵyldanady.
«Eńbek jolymdy 1985 jyly Qaraǵandy polıtehnıkalyq ınstıtýtynda oqytýshy qyzmetinen bastadym. 1996 jyldan bastap polıgrafııa jáne baspa isi salasynda jumys isteımin. Alǵashqyda dızaıner bolyp, ártúrli baǵdarlamalardy meńgerdim. Keıinirek kóptegen baspa, kesý, jelimdeý jáne basqa da jabdyqtarmen jumys isteýdi úırendim. Qazirgi ýaqyttaǵy jumysym da osy polıgrafııamen tikeleı baılanysty», dedi Baǵlan Tóleýuly.
Bul kisi QR PIB Prezıdenttik ortalyǵynyń is-sharalaryn ótkizýge tikeleı atsalysatyn adam. Sebebi, is-sharanyń joǵary deńgeıde ótýi úshin usynylatyn tıpografııalyq ónimder de sapaly bolýy kerek.
«Men úshin bul shyǵarmashylyq izdenis pen energııany talap etetin qyzyqty ári kóńildi jumys. Prezıdent Q.K.Toqaev jarııalaǵan bıylǵy Jumysshy mamandyqtar jyly men sııaqty qarapaıym, óz mamandyǵyn jetik meńgergen eńbek adamdaryn qoldaý dep bilemin. Qazaqstannyń qarqyndy damýyna jan-jaqty damyǵan, básekege qabiletti jastar men bilikti mamandar ǵana eleýli úlesterin qosatynyna senimdimin», dedi B.Tóleýuly
Baǵlan Tóleýuly jas mamandarǵa aǵalyq aqyl-keńesin aıtyp, bilgenimen bólisip, baı tájirıbesin úıretýden sharshamaıdy. Úırengenińmen toqtap qalmaı, jetile berý kerek deıdi. Sol úshin de ol kisiniń irgeli ujymda eleýli orny bar.
Biz baspagerdiń eseli eńbegine tabys tileımiz!