Parlament Májilisiniń kitaphanasynda «Bilikti ustaz – bilimdi urpaq» atty basqosý ótti. Oǵan Qazaqstannyń Eńbek erleri, úzdik pedagogter Elmara Traısova, Alma Shúkejanova, Alına Soloveva qatysty. Bul is-sharany «Aýyl» partııasy uıymdastyrdy.
Halqymyz «Ustazy myqtynyń ustanymy myqty» dep aıtady. Qazir qoǵamda muǵalimderdiń eńbegi erekshe. Ásirese ustazdardyń arqasynda qanshama bala sapaly bilim men sanaly tárbıe alyp, tulǵa bolyp qalyptasty. Bul tutas qoǵamdy izgilendire túsedi. Sondyqtan pedagogterdiń eńbegi qandaı qurmetke de laıyq.
Basqosý barysynda aýyl mektebindegi bilimniń ózekti máseleleri men muǵalim mártebesi týraly kóbirek sóz boldy. Májilistegi Agrarlyq máseleler komıtetiniń tóraǵasy, «Aýyl» partııasynyń basshysy Serik Egizbaev syrshyl aqyn Maǵjan Jumabaevtyń «Alty Alashtyń balasy bas qossa, tór – muǵalimdiki» degen sózin mysalǵa keltirip, ustazdardyń eren eńbegi jaıynda salmaqty oı órbitti.
Sodan keıin Oral qalasyndaǵy №34 mektep-gımnazııasynyń orys tili men ádebıeti pániniń muǵalimi Elmara Traısova memlekettik tildi bilý, dáripteý týraly oı-pikirin ortaǵa salsa, Semeı qalasyndaǵy №7 jalpy bilim beretin mektep-lıseıiniń matematıka pániniń muǵalimi Alma Shúkijanova pedagogterdiń qyzmeti jaıynda sóz qozǵady. Al Shymkent qalasyndaǵy №1 mektep-gımnazııasynyń bıologııa pániniń muǵalimi Alına Soloveva jastarǵa kitap oqýdyń qundylyǵy týraly áńgimeledi. Sondaı-aq bilikti ustazdar pedagogıka salasyndaǵy tájirıbelerimen bólisip, stýdentterdiń suraqtaryna jaýap berdi.
Jıyn sońynda Qazaqstannyń Eńbek eri Elmara Traısova «Aýyl» partııasynyń qataryna qabyldanyp, oǵan saltanatty túrde partııalyq bılet tabys etildi. Sonymen qatar mártebeli qonaqtarǵa syı-qurmet kórsetildi.
Qaısar QUSAIYN