ASTANA. 6 aqpan. Keshe ózin-ózi óltirmek bolǵan Qostanaı qalalyq ishki ister basqarmasynyń qyzmetkeri jansaqtaý bóliminde qaıtys boldy. Bul týraly «Kostanaıskıe novostı» habarlady.
Búgin saǵat 10.10-da dárigerler ishki ister qyzmetkeriniń qaıtys bolǵanyn anyqtady. Basyna tıgen oq mı qabatyn zaqymdaǵandyqtan, ony qutqarý múmkin bolmaǵan. Buǵan deıin Qostanaı qalalyq ishki ister basqarmasy qyzmetkeriniń ózin-ózi óltirýge áreket jasaýyna dostasyp júrgen qyzymen renjisip qalǵany sebep bolýy múmkin ekeni aıtylǵan edi.
«Qazirgi tańda tergeýshiler polısııa qyzmetkeriniń qurbysymen telefon arqyly sóıleskennen keıin Qostanaı ishki ister basqarmasy ǵımaratynan shyǵyp ketkenin anyqtady. Ol qońyraýǵa jaýap bermegen, soǵan baılanysty jol-patrýl polısııasy ony izdeýge shyǵady. Saǵat 10.40-ta polıseı otyrǵan avtokólik Maılın kóshesinde kózge shalynyp, patrýl jasaǵy ony arnaıy qural men qarýdy qoldanbaı-aq toqtatty», - dep habarlaǵan bolatyn oblystyq ishki ister departamenti ózindik qaýipsizdik basqarmasynyń basshysy Jarashan Aqberdıev.
Polısııa tártip saqshysynyń qurbysynan jaýap aldy, ol jigitimen arada qyzǵanyshqa baılanysty janjal shyqqanyn rastady.
Oqıǵaǵa qatysty «О́zin-ózi óltirýge ıtermeleý» babymen qylmystyq is qozǵaldy.
Eske sala keteıik, 5 aqpan kúni Qostanaı qalalyq ishki ister basqarmasynyń qyzmetkeri óz mashınasynda tabel qarýymen ózin-ózi basynan atqan edi. Oqıǵa ornyna jedel járdem kelip, ony aýrýhanaǵa jetkizdi. Polıseı jansaqtaý bólimine jatqyzylǵan bolatyn.
Qurysh Nurymbet.
Derek, foto: «Kostanaıskıe novostı».