AQTО́BE. 6 qańtar. Qala turǵyndarynyń ótinishi boıynsha nómiri 2, 8, 23 jáne 39-shy avtobýstardyń baǵyttaryna ózgerister engizildi. Bul týraly egemen.kz tilshisi habarlady.
«Bıyl 19 qańtarda «Aqtóbe qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» memlekettik mekemesi «Aqtóbe qalasyndaǵy jolaýshylar men júkterdi avtomobılmen tasymaldaý quqyǵyn ıelený» boıynsha qaıta baıqaý ótkizdi. Bul joly konkýrs 50 baǵyt boıynsha 6 lot negizinde ótkizildi. Baıqaýǵa qaladaǵy eki tasymaldaýshy mekeme — «Avtopark» jáne «PATP», ıaǵnı burynǵy «Trolleıbýs parki» jaýapkershiligi shekteýli seriktestikteri qatysty. Baıqaý qorytyndysy boıynsha biz «Avtopark» seriktestigimen 4 lot, al «PATP» mekemesimen 2 lot negizinde kelisimshart jasastyq. Bir aıta keterlik jaıt, qaladaǵy 4 baǵyt, ıaǵnı nómiri 12, 13, 17 jáne 20-shy avtobýstardyń jumysyn endi «Avtopark» mekemesi qadaǵalaıtyn bolady», — dep málimdedi buqaralyq aqparat quraldary ókilderimen ótken baspasóz máslıhatynda «Aqtóbe qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» memlekettik mekemesiniń basshysy Naǵymjan Aldııarov.
Onyń aıtýynsha, nómiri 2-shi baǵyttaǵy avtobýstar júrý qozǵalysyn «Nur Aqtóbe» shaǵyn aýdanynan bastaıdy. Buǵan deıin bul aýdannyń turǵyndary Prıgorodnyı aýylynan keletin nómiri 29-shy baǵyttaǵy qoǵamdyq kólikke otyrý úshin tasjoldyń boıyna shyǵatyn. Endi nómiri 2-shi avtobýstar jańa aýdandaǵy kópqabatty úılerdiń janyna aıaldaıtyn bolady. Aldaǵy ýaqytta «Nur Aqtóbe» aýdanyna kireberistegi joldy jóndeý jumystaryn qolǵa alý kózdelýde.
Nómiri 2-shi baǵyttaǵy kólikter «Nur Aqtóbe» aýdany mańyndaǵy aınalma jol arqyly Sátpaev kóshesine túsip, joǵary tasjolmen Nekrasov kóshesi arqyly jańa kópirden ótedi. Bul baǵyttaǵy avtobýstar 11-shaǵyn aýdan arqyly Mánshúk Mámetova kóshesimen «Sapar» avtovokzalyna aıaldaıdy, osy baǵytpen keri qaıtady.
Al nómiri 8-shi baǵyttaǵy qoǵamdyq kólikter buǵan deıin Arynov, Pýgachev kósheleri arqyly júretin bolsa, endi bul baǵyttaǵy avtobýstar Malyshka aýdany arqyly Embi kóshesiniń boıymen temirjol ótkelin betke alady. Sosyn áýejaı jáne áýe qalashyqtaryna aıaldap, osy baǵyt boıynsha keri qaıtady. Bul baǵytqa qatynaǵan shaǵyn avtobýstardy 42 oryndyq ortasha syıymdylyqtaǵy kólikter almastyrypty. Buǵan deıin qaladaǵy nómiri 23-shi baǵytta 4 avtobýs jolaýshylar tasymaldasa, engizilgen ózgeristerden keıin bul baǵytqa taǵy eki avtobýs qosyldy. Naǵymjan Aldııarovtyń aıtýynsha, qaladaǵy nómiri 39 baǵyttaǵy avtobýstar buryn ýaqytsha baý-baqshalarǵa ǵana qatynasa, engizilgen ózgeristerge baılanysty endi bular kún saıyn jolaýshylar tasymaldaıtyn bolady. Bul baǵyttaǵy avtobýstar kúnine 6 ret Aqtóbe qalasy mańyndaǵy Sadovoe (Prıgorodnyı-2) eldi mekenine qatynaıdy.
Satybaldy Sáýirbaı.
Derek: egemen.kz.
Sýret: rikatv.kz.