Ádilet salasynyń sandyq júıege kóshýi azamattardyń quqyqtyq qyzmet alýyn ońtaılandyrdy. Máselen, sala mınıstrligi «DigitalJustice» jobalar portfelin iske qosqaly Qostanaı oblystyq Ádilet departamenti qarjy jáne ýaqyt shyǵynyn únemdep, qyzmetterdiń sapasy men qoljetimdiligin arttyrýǵa, sondaı-aq jasandy ıntellektini paıdalanýǵa qol jetkizip otyr.
Departament basshysy Álııa Amanjolovanyń aıtýynsha, búginde óńir turǵyndaryna onlaın rejimde quqyqtyq kómek kórsetetin «E-ZanKomegi» biryńǵaı quqyqtyq kómek aqparat júıesi qyzmet kórsetedi. Atalǵan júıege 2 myńǵa jýyq zań keńesshisi men qorǵaýshy tirkelgen. Mysaly, keıingi eki jyl ishinde 7 myńǵa jýyq turǵyn osy portalǵa kirip, bilikti zań mamandarynyń kómegin alǵan. Sondaı-aq aqparattyq júıe arqyly 88 738 is qaralǵan.
Taıaýda quqyqtyq aqparat qyzmeti operatorlary «Beıneqońyraý» qyzmetin iske qosty. Bul azamattarǵa táýlik boıy quqyqtyq keńes alýǵa múmkindik beredi. Qazirgi tańda jasandy ıntellekt elementteri bar taǵy bir quqyqtyq keńes beretin chat-bot ázirlenip, «Zan Komegi» mobıldi qosymshasynda synaqtan ótkizilip jatyr.
«Jasandy ıntellektini engizý maqsatynda mınıstrlik zań qyzmetterin usynatyn platformalardy ázirleýge baǵyttalǵan IT uıymdarynan jumys tobyn qurdy. Biz kepildendirilgen memlekettik zań kómegin «E-ZanKomegi» júıesi arqyly usyný úshin 131 advokatpen, 27 zań keńesshisimen kelisimshartqa otyrdyq. Byltyr departamentke respýblıkalyq bıýdjetten 150 mln teńge bólingen. Bul qarjy sıfrlyq qyzmet kórsetýdi jetildirýge jumsaldy. Nátıjesinde, 17 630 azamatqa 13 360 qylmystyq is, 19 azamattyq is, 206 ákimshilik isi boıynsha sapaly quqyqtyq kómek kórsetildi. Sonymen qatar 4 myńnan asa adamǵa quqyqtyq keńes berildi», deıdi Á.Amanjolova.
О́ńirde «Sıfrlyq sot oryndaýshysy» jobasy da ońtaıly júzege asyrylyp jatyr. Buǵan deıin aqyly qyzmet kórsetetin jeke sot oryndaýshylaryna júginip kelgen azamattar atalǵan tegin qyzmettiń kómegimen 4 aı ishinde 550 mln teńge únemdegen. Ádilet mınıstrliginiń bastamasymen jeńildetilgen óndiristiń jańa ınstıtýty aıasynda jumys istep jatqan jobanyń artyqshylyǵy kóp. Mysaly, buryn nesıe qaryzyn ýaqtyly óteı almaǵany úshin jeke sot oryndaýshynyń qyzmetine aıyppuldyń syrtynda qosymsha 25% qarajat tóleýge mindetti bolǵan. Azamattar osy shyǵyndardan jáne jeke sot oryndaýshylarǵa júginýden bosatylyp otyr.
«Máselen, 20 AEK-ke deıingi somadaǵy ońaılatylǵan óndiris boıynsha azamattar eGov Mobile qosymshasy arqyly is týraly egjeı-tegjeı aqparaty bar sms habarlamalar men push-habarlamalar alatyn boldy. Halyqqa yńǵaıly bolý úshin qazir boryshkerdiń esepshotyn burynǵydaı buǵattap tastamaıdy. Bereshekti onlaın tóleý qoljetimdi. Osylaısha, adamı faktor tolyǵymen alynyp tastaldy», deıdi ol.
О́tken jyldyń qorytyndysy boıynsha óńirde joǵarydaǵydaı jeńildetilgen óndiris tártibimen kólemi 211 396 214 teńge qarjyǵa atqarýshylyq óndiris qozǵalǵan. Bul oblys turǵyndaryna 6,5 mln teńgeden asa qarajatyn únemdeýge múmkindik berip otyr.
Búginde óńir turǵyndarynyń deni jyljymaıtyn múlikti onlaın tirkeýdi de úırenip aldy. Iаǵnı quny 50 mln teńgege deıingi jyljymaıtyn múlik ıeleri notarıýspen beıneqońyraý arqyly baılanysyp, kelisimshart jasaı beredi. Shart jasaý barysynda bıometrııalyq sáıkestendirý jáne elektrondyq sıfrlyq qoltańba paıdalanylady.
Qostanaı oblysy