Depýtat Aınur Arǵynbekova álemde medısınalyq mańyzdy sheshimder bolsa da otandyq emdelýshiler dıagnostıka men emdeýdiń jańa ádisterin jyldar boıy kútýge májbúr ekenderin aıtty, dep habarlaıdy Egemen.kz.
Depýtattyń aıtýynsha, densaýlyq saqtaý júıesi, eń kúrdeli uıymdastyrylǵan qurylymnyń biri. Onyń qıyndyǵy aýrýdyń kóptigi men qazirgi zamanǵy ekologııaǵa jáne basqa qaýipterge baılanysty jańa aýrýlardyń paıda bolýyna, ár pasıenttiń ereksheligine, medısınalyq kómektiń udaıy qajet bolýyna jáne adam aǵzasynyń áli de jan-jaqty zerttelmeýine baılanysty.
Álemde nanotehnologııa, sáýlemen dıagnoz qoıý, gendik ınjenerııa jáne ıadrolyq medısına sııaqty ınnovasııalyq emdeý ádisteri paıda boldy. Alaıda, olardy Qazaqstanda engizý uzaqqa sozylyp barady.
Aınur Arǵynbekova álemde engizilgen tehnologııalardy elimizdiń densaýlyq saqtaý júıesine jedel engizý óte qıyn ekenin atap ótti. О́ıtkeni, jeńildetilgen ruqsat berý rásimderin qoldaný qıyn, jańa ádisterdi qoldanýǵa berilgen ótinimdi sheshý merzimi naqty rettelmegen, túrli memlekettik organdarda saraptamalyq qorytyndyny qaıtalap otyrady.
«Qalqansha bez aýrýyn emdeýge arnalǵan Iod-131 radıofarmasevtıkalyq preparatyn tirkeý 8 jylǵa sozylǵany osynyń jarqyn mysaly boldy demeske laj joq. Qalqansha bezdiń qaterli isigin radıoaktıvti ıodpen emdeý ádisi 1943 jyly alǵash ret qoldanylǵan bolatyn. Shetelde burynnan qoldanylyp kele jatqan galıı, S-metıonın, Samarıı-153 jáne Lıýtesıımen PET-dıagnostıka tehnologııasyn tirkeýde de osyǵan uqsas jaǵdaı baıqalyp otyr. Bul másele boıynsha Qazaqstanda uzaq saraptamalyq kelisý áli bitken joq. Sondyqtan osy ádisterge muqtaj pasıentterdi ázirshe shetelge jiberýge týra kelýde», dedi Aınur Arǵynbekova.
Depýtattyń densaýlyq saqtaý tehnologııalaryn baǵalaý kezeńderin reglamentteý merzimin ońtaılandyrý jáne ruqsat berý rásimderin ońaılatý, túrli memlekettik organdardan jańa tehnologııalarǵa qaıtalama saraptamalardy alyp tastaý, sondaı-aq ınnovasııalardy kelisýge qatysatyn mekemeler boıynsha konsýltatıvtik-keńesshi organdardyń sanyn qaıta qaraýdy usynyp otyr.