Elimizdegi balalar hırýrgııasynyń negizin qalaǵan kórnekti akademık, Memlekettik syılyqtyń laýreaty Kamal Sárýáruly Ormantaev 89 jasqa qaraǵan shaǵynda dúnıeden ozdy.
Joǵary bilikti dáriger bar sanaly ǵumyryn otandyq balalar hırýrgııasyn qalyptastyryp damytýǵa arnady. Osy salany joǵary deńgeıge kóterdi. Eleýli ǵylymı jańalyq ashty. Aıtalyq, balalardyń bassúıegi men mıy zaqymdanǵanda qoldanylatyn emdeý ádisin jetildirip, onyń patogenezin anyqtaýda keshendi nátıjege qol jetkizdi. Bassúıek pen mıǵa jasalatyn operasııanyń jańa 5 ádisin tájirıbege engizdi. Hımııalyq jolmen bolatyn óńesh kúıigin zerttep, ony emdeýdiń 6 ádisin tapty. Irińdi perıtonıt pen jedel gematogendi osteomıelıt bolǵan jaǵdaıda irińdi ish qýysynan tútik arqyly shyǵarýdyń birneshe tásilin usyndy. Sondaı-aq Kamal Ormantaev elimizdegi anestezıolog-reanımatologteriniń, ortoped-travmatologteriniń ǵylymı mektebiniń negizin qalady. Biregeı hırýrg balalardyń kókirek qýysy, ókpe, óńesh, qursaq qýysy, bassúıek pen búırek múshelerine, bas-aıaǵy 24 myńǵa jýyq kúrdeli ota jasaǵan. Qysqasy, qanshama balany ajaldan arashalap qalǵan.
Sonymen qatar Kamal Sárýáruly Qazaq ulttyq medısına ýnıversıtetinde 1968 jyldan 2012 jylǵa deıin balalar hırýrgııasy kafedrasyn basqardy. Akademık ǵylym jolynda júzdegen shákirt tárbıelep, otandyq medısınanyń damýyna zor úles qosty. Ǵalym – 320-dan asa ǵylymı maqalanyń, 9 monografııanyń avtory. El aldyndaǵy eńbegi úshin memlekettik birneshe orden-medalmen marapattaldy.
Shyn máninde, Kamal Ormantaev tek ǵalym, dáriger ǵana emes, qoǵam qaıratkeri edi. Ol medısınanyń abyz aqsaqaly deńgeıine kóterildi. Táýelsizdik jyldary ult múddesi jolynda basyn báıgege tigip, qanshama batyl bastamalardy iske asyrdy. Mundaı aıtýly tulǵanyń esimi eshqashan umytylmaıdy. Baqul bolyńyz, birtýar hırýrg!