Elge qyzmet etýdi bárinen joǵary qoıa bilý – erdiń eriniń ustanymy. Berdibek Saparbaevtyń zamandas áriptesi Qyrymbek Kósherbaev ǵulama jazýshymyz Ábish Kekilbaevtan: «Siz shyǵarmashylyq adamysyz. Alǵa qoıǵan josparlaryńyz, jazsam degen dúnıelerińiz kóp. О́te talantty jansyz. IýNESKO-nyń saraptamasymen HH ǵa-syrdaǵy 100 oıshyldyń qataryna endińiz. Osy sizge bıliktiń keregi ne?», dep surapty. Sonda abyz Ábish: «memleketke, táýelsizdikke nemquraıdy qaraı almaımyn. Eldiń namysy ketip, eńsesi túsken kúıin kórgim kelmeıdi. Táýelsizdik jolynda bizdiń jasaǵan eńbegimizdiń jemisin óskeleń urpaq kórýi qajet. Sol úshin abyroıly qyzmet atqaryp, olarǵa óshpes mura qaldyrý úshin men sol bıliktiń ishinde bolýym kerek. О́ıtkeni kóshede turyp aqyl aıtqannan góri, memlekettiń isine aralasyp, sonyń durys júrýine, jaqsy damýyna óz úlesimdi qosqan áldeqaıda qymbat», dep jaýap bergen eken.
Al endi Berdibek Máshbekuly jýrnalıske bergen bir suhbatynda: «Kóńilińniń tynyshtyǵy úshin jáne ózińdi baqytty seziný úshin ultqa adal qyzmet etýden asqan abyroıly is joq. Sanaly ómirimdi osy jolǵa arnaǵan adam retinde batyl aıta alamyn: elge qyzmet etý isinde demalys jat. Dese de elińe paıdaly bolý dáıim kresloda otyrý degen sóz be? Ákimniń oryntaǵynsyz da jurttyń bolashaǵy úshin kúresýge bolatynyn talaı tulǵalar dáleldep ótken. Qol qýsyryp qarap otyra almaıtynymdy óziń de aıtyp qaldyń. Árıne, solaı. Tuǵyrdan taıyp turǵandaı bolyp sóılegennen Qudaı saqtasyn. Áli de bolsa, elime eńbek sińiremin dep oılaımyn. Sebebi men ózimdi jumys istegende ǵana baqytty sezinemin. Jalpy, kez kelgen adamnyń peshenesine óziniń súıikti isimen aınalysýdy jazsa, jer betinde baqytty jandar kóbirek bolatynyna bás tigemin», degen ómirlik tanymyn ashyp aıtady.
El úshin eren eńbektiń, qaıtpas qaısarlyqtyń, namys pen ardyń joǵary úlgisin kórsete bilgen eki tulǵanyń arasynda tabıǵı tylsym baılanys bar ekenin joqqa shyǵarý qıyn. Sol Ábish aǵamyz Bekeńniń alpys jasyna arnap keń kólemdi maqala jarııalady. Sóziniń sońyn «Berdibek Saparbaev burynǵysynsha vahtada. Árbir keshińiz tabysty aıaqtalyp, ár tańyńyz sátti bastalǵaı, alǵadaı azamat» degen batamen aıaqtapty.
«О́mir degen zyryldap ótip ketken kúnderdiń tizbesi emes, solardyń ishinde óshpesteı este qalǵandary ǵana» depti ǵoı bir danyshpan. Maǵan marqumdy eske alýǵa arnalǵan barlyq óńirdegi sharalarǵa qatysý buıyrdy. Sondaǵy halyqtyń ystyq yqylasy, atqarǵan isine bergen baǵasy taýsylyp bolmady ǵoı. Astanadaǵy asta Berdibek Máshbekulyna «memleketshil tulǵa», Almatydaǵy mádenı qaýym «ult zııalylarymen sabaqtas tulǵa» dep baǵa berdi. Astana, Almaty, Qyzylorda qalalarynda ótken jıyndardan keıin Shyǵys Qazaqstan oblysynyń ákimi bolyp jańadan taǵaıyndalǵan Ermek Kósherbaev bastama kóterip, Berdibek Máshbekulyna arnap is-shara ótkizdi. B.Saparbaev Shyǵys Qazaqstan oblysy ákimdigine kelgen kezden bastap, jergilikti problemany eńserýge kirisedi. Turǵyndardyń aıtýynsha, etigimen sý keshe júrip tabıǵı apattardyń qıynshylyǵyn retteı bilgen. Ulttyq qundylyqtardy dáripteı otyryp, Shyǵystyń tarıhı shyraıyn kirgize alady. «Altaı – túrki áleminiń altyn besigi» atty halyqaralyq keńes búkil túrik dúnıesin dúr silkindiredi. Abaı bastaǵan qazaq ultynyń maqtanyshtarynyń eskertkishteri árbir qazaqqa rýh berip tur. Alleıa boıyndaǵy Abaıdyń qara sózderin oqydyq, qala bıigindegi «Qazaqstan» degen ataýdy kórip tolqydyq. Turǵyndar qaladaǵy ortalyq meshittiń paıdalanýǵa berilýdegi oblys basshysynyń jergilikti turǵyndarmen birge bilek sybana kiriskenin ańyz qylyp aıtyp berdi. О́skemendi aralaý barysynda ulttyq namysty jigerlendirer jasampaz isterdiń nátıjesine kóz jetkizdik.
Burynǵy Ońtústik Qazaqstan oblysynyń ortalyǵy Shymkent qalasynda úlken astyń basynda shyraıly shahar ákimi men zııaly qaýym ókilderi Berdibek Máshbekulynyń jumysyna joǵary baǵa berdi. О́ńirdiń ózekti problemalaryn túrli kedergige qaramastan, aınalasyndaǵylarmen keńesip sheshý joldaryn taba bilgenin el aǵalary erekshe atap ótti. Sol kezdegi jalaqynyń, zeınetaqynyń, túrli áleýmettik járdemaqynyń kesheýildeýine, gazdyń, jaryqtyń joqtyǵyna narazy halyqtyń jaǵdaıyn jaqsartý ońaı is emes edi. Onyń ústine turǵyndardyń ómir sapasyna tikeleı áser etetin qurylymdar jekeshelenip, eldik múddeden jeke múdde basym túse bastaǵan ýaqyttyń synyna Berdibek shydas bere aldy degen sózder qulaqqa shalyndy. Oblystaǵy elektr energııasyn, jylý men gazdy óndiretin, ony jetkizetin kásipodaqtardy jekeshelendirý jumysynyń zańdylyqtary qatań tekserilip, 3,2 mlrd teńgeniń múlki memleketke qaıtarylypty. Keıbir basshylar qurmettemek túgili, atyn aıtýǵa batyly barmaı júrgende, respýblıkamyzdyń birtýar azamaty Asanbaı Asqarovqa «Qurmetti azamat» ataǵyn berip, astyna avtokólik mingizgenin erlikke balaǵanyn da estidik. Úısiz-kúısiz júrgen BAQ, shyǵarmashylyq ortanyń ókilderine kúrdeli jóndeýden ótken úıden páter bergenine zor rızashylyq bildirdi. Birshama zııaly qaýym ókili Túrkistannyń 1500 jyldyǵyn IýNESKO aıasynda atap ótý is-sharalaryna eldi jumyldyra bilgenin eske alysty. Elimizdiń tanymal tulǵalarynyń basyn qosyp, halyqaralyq «Paryz» qoryn quryp, 2,3 mlrd teńge qarjy jınaǵan. Árbir tıynyn uqypty jumsap, túrki áleminiń rýhanı astanasy Túrkistannyń atyn álemge tanyta túsken.
Aqtóbe qalasyna Syr óńirinen barǵan delegasııany sol kezdegi oblys basshysy Eraly Toǵjanov arnaıy qabyldady. Berdibek aǵamyzǵa tapsyryp úlgermegen «Aqtóbe oblysynyń qurmetti azamaty» ataǵy belgisin otbasyna tapsyrdy. Is-sharalar arasynda ózgergen, jańarǵan, sáýlettendirilgen qalany kórdik. Qaz-qatar salynǵan «Shyǵarmashylyq akademııasy», «О́ner ortalyǵy», «Jubanovtar álemi», «Anaǵa taǵzym», oblystyń jedel járdem qyzmeti, oblystyq murajaı, neke saraıy, jekpe-jek saraıy, muz aıdyny, tennıs ortalyǵy, t.b ǵımarattar alystan kóz tartyp, kóńilge qýanysh uıalatady eken. Jańadan boı kótergen shaǵyn aýdandardyń sáýleti de erekshe. Sonymen birge aýdandandardy abattandyrý jumystarynyń nátıjelerine kóz jetkizdik. Is-shara kezinde sóz alǵan oblys turǵyndary ózderi «nar tulǵa» dep ataıtyn Berdibek Máshbekulynyń kezek kúttirmes máselelerdi elmen keńese otyryp sheshkenine rızashylyq bildirdi.
Arnaıy shaqyrýmen Jambyl oblysynda boldyq. Sol kezdegi oblys ákimi Nurjan Nurjigitov jáne turǵyndardyń pikirlerinen Qordaıdaǵy qaqtyǵys kezinde adam óliminen ashynǵan turǵyndardy sabyrlyqqa shaqyryp, sabasyna túsirý ońaı bolmaǵanyn tereń sezine tústik. Rasynda, el ishindegi ahýaldy baıyptap, yntymaqtastyqqa zııan keltirmeı ádilet tarazysyn teń ustaý qashannan kele jatqan ıgi dástúr. Qalyptasqan shıelenisti sheshý úshin áýeli kópshiliktiń kókiregine osy senimdi uıalatý kerek. Sondyqtan da bolar, Memleket basshysy Berdibek Saparbaevty osyndaı syn saǵatta Jambyl oblysyna ákimdikke taǵaıyndaǵan.
Jambyldaǵy qyzmet ýaqyty jahandy jaılaǵan «koronavırýs» indetimen sáıkes keldi. Osy bir syndarly sátte, álemde alǵashqy bes memlekettiń qatarynda otandyq vaksınany shyǵarýdaǵy eńbegi ólsheýsiz ekeni belgili. Bul jóninde Prezıdenttiń ǵylym men ınnovasııa jónindegi keńesshisi Kúnsulý Zakarıa: «Keshegi pandemııa kezinde halyq densaýlyǵyna arasha bolǵan otandyq «QazVac» vaksınasynyń shuǵyl shyǵarylýynda Berdibek Máshbekulynyń zor úlesi bar ekenin ekiniń biri bile bermeıdi», dedi.
Qandaı qıyndyq, kedergi bolsa da úılestirilmeıtin, rettelmeıtin problema, sheshilmeıtin túıin joq ekendigine, tek sony úılestire, uıymdastyra almaıtyn basshylar bar ekenine osyndaıda kózimiz jetedi.
Oblys ákiminiń áleýmettik máseleler jónindegi orynbasary retinde ol kisiniń qyzmettik jınalystaryna qatysyp, saparynda birge júrý baqyty buıyrdy. «Adamdaǵy ynsap, ádilet, meıirim úsheýin qosyp aıtqanda «Ujdan» degen uǵym shyǵady» degen Shákárimnen qalǵan sóz bar. Sol ar-ojdandy joǵary ustaı bilgen ustazdyń ómir tájirıbesin zerttep, úlgi qylý – bizge mura bolmaq. Qaıratker ónegeli ómirimen búgingi jáne keıingi urpaqqa elge adal eńbek etýdi amanattap ketti.
Naýryzbaı BAIQADAMOV,
Senat depýtaty