Qazaqstan stýdent sportshylary qazirgi kúnderi Ispanııanyń Granada qalasynda ótip jatqan Qysqy Ýnıversıadada burnaǵy kúni taǵy 2 altyn, 1 kúmis medalǵa qol jetkizdi. Olardy frıstaıldyń mogýl túri boıynsha Iýlııa Galysheva (sýrette) men Pavel Kolmakov túsirdi. Al kúmis medaldy qorjynǵa Dmıtrıı Reıherd saldy.
Iýlııa Galysheva birinshi oryndy 66,00 upaımen jeńip aldy. Ekinshi orynǵa 59,90 balmen reseılik Marıka Pertahııa ornalassa, úshinshi oryn 51,86 upaı jınaǵan koreıalyq So Chjı Vonǵa tıesili boldy.
Qazaqstanǵa bul kúni ekinshi altyn medaldy alyp bergen frıstaılshy Pavel Kolmakov 72,45 balmen top jardy. Ekinshi orynǵa onyń komandalasy Dmıtrıı Reıherd 68,73 upaımen jaıǵasty. Al úshinshi tuǵyr reseılik Sergeı Shımbýevke (62,11) buıyrdy.
Bul jolǵy Qysqy Ýnıversıadanyń ekige bólinip ótip jatqany belgili. Onyń alǵashqy bólimi Slovakııanyń Osrble qalasynda oınalsa, sońǵy kezeńi aqpan aıynyń basynan bastap ıspan jerine aýysty. Osy kezge deıin Qazaqstan quramasy eki jaqtan 10 medal alyp úlgerdi. Olardy 5 altyn jáne 5 kúmis medaldar quraıdy. Osynshalyqty medal qorymen bizdiń sportshylar komandalyq esepte Reseı stýdentterinen keıingi ekinshi orynda keledi.
Damır QOJAMQUL.