Yrys aldy – yntymaq

Qazaqstan Prezıdenti – Qazaqstan halqy Assambleıasynyń Tóraǵasy N.Á.Nazarbaevtyń Qazaqstan halqy Assambleıasy jylynyń resmı bastalýyna arnalǵan quttyqtaý sózi

 Qymbatty otandastar, qurmetti qazaqstandyqtar!

Búgin elimizde meniń Jarlyǵymmen jarııalanǵan Qazaqstan halqy Assambleıasynyń jyly resmı ashylyp, bastalady. Jyl eń basty ortaq qundylyqtarymyz – Táýelsizdigimizdi, egemendigimizdi, birligimizdi, Qazaqstan halqynyń beıbitshiligi men kelisimin saqtaýǵa arnalady. Osydan 20 jyl buryn, 1995 jyldyń 1 naýryzynda bizdiń qoǵamdaǵy beıbitshilik pen kelisimdi saqtaýǵa arnalǵan biregeı ıns­tıtýt – Qazaqstan halqy Assambleıasyn qurý týraly Jarlyqqa qol qoıdym. Osy ýaqyt aralyǵynda Assambleıa shynaıy túrde jalpyhalyqtyq, azamattyq, saıası múddelerden joǵary turǵan uıym retinde tanyldy, konstıtýsııalyq mártebege ıe boldy. Búgingi tańda Qazaqstan halqy Assambleıasy elimizdegi barlyq ult pen ulysty bir shańyraq astyna toptastyratyn mańyzdy qurylymǵa aınaldy. Sondyqtan Assambleıa jyly – 17 mıllıon qazaqstandyqtardyń ortaq merekesi. Elimizdiń árbir azamaty atamekenimizdegi beıbitshilik pen kelisimdi saqtaýǵa jaýapty ekenin aıqyn sezinýi kerek. Bul – Qazaqstan bolashaǵynyń negizi. Assambleıa jyly «Qazaqstan-2050» Strategııasynyń maqsattaryna jetýdiń naqty isteri men jańa jetistikteri jyly bolady. Biz «Nurly Jol – bolashaqqa bastar jol» dep atalatyn Jańa Ekonomıkalyq Saıasattyń negizgi mindetterin iske asyrýǵa kiristik. Assambleıa jyly Konstıtýsııanyń 20 jyldyǵy, Qazaq handyǵynyń 550 jyldyǵy jáne Uly Jeńistiń 70 jyldyǵy sııaqty mańyzdy oqıǵalarǵa toly. Bul jyl – ortaq tarıh pen taǵdyr máńgilikke biriktirgen halqymyzdyń birligin pash etetin jyl. Qazaqstan – bul birtutas jer, birtutas halyq, ortaq bolashaq! Sondyqtan, Assambleıa jylynyń basty ıdeıasy – «Meniń Elim – Máńgilik El!». Men barlyq qazaqstandyqtardy Assambleıa jylynyń bastalýy­men quttyqtaımyn! Egemendik, birlik jáne kelisim rýhy bolashaqqa degen senimimizdi arttyryp, kúsh-qýatymyzdy eselesin! Biz – taǵdyry ortaq, birligi jarasqan birtutas elmiz! Bizdiń qazaqstandyq jol – beıbitshilik, kelisim jáne damý joly!

Bıyl – Qazaqstan halqy Assambleıasynyń jyly. Sebebi, ótken jyly Memleket basshysy Nursultan Nazarbaevtyń Jarlyǵymen 2015 jyl – Qazaqstan halqy Assambleıasynyń jyly dep jarııalanǵan edi. Sondyqtan, halyqtyq sıpatqa ıe bul shara jyl boıy elimizdiń jer-jerinde aıryqsha mánde atalyp ótpek.

Keshe QHA jylynyń ashylýyna arnalǵan saltanatty rásim Beıbitshilik jáne kelisim saraıynda uıymdastyryldy. Oǵan Memlekettik hatshy Gúlshara Ábdiqalyqova, QHA Tóraǵasynyń orynbasary – Hatshylyq meńgerýshisi Eraly Toǵjanov, Astana qalasynyń ákimi Ádilbek Jaqsybekov, Aqmola oblysynyń ákimi Sergeı Kýlagın, Parlament depýtattary, Qazaqstan halqy Assambleıasynyń músheleri, tanymal qoǵam qaıratkerleri, zııaly qaýym, etnomádenı birlestikter men úkimettik emes uıymdardyń ókilderi, tanymal sportshylar men jastar qatysty.

Saltanatty shara bastalmas buryn Beı­bitshilik jáne kelisim saraıynyń aldynda «Jastar qoǵamdyq kelisimdi qoldaıdy» taqy­rybynda flesh-mob, al flesh-mob aıaqtalǵannan keıin Qazaqstan halqy Assambleıasy jylynyń Týyn kóterý rásimi ótti. Týdy alańǵa Olımpıada chempıondary Olga Shıshıgına men Ermahan Ybyraıymov, eki dúrkin álem chempıony jáne eki dúrkin Azııa chempıony Iýrıı Melnıchenko, bylǵary qolǵap sheberi Ilııas Súleımenov, qazaq kúresinen álemniń úsh dúrkin chempıony, 2013 jyldyń «Qazaqstan barysy» Aıbek Nuǵymarov alyp shyǵyp, ony Assambleıa ardagerleri – Oralbaı Ábdikárimov pen Oleg Dymovqa tabys etti. Al Assambleıa ar­dagerleri QHA jylynyń Týyn kóterý rá­simin oryndaǵan soń, qatysýshylar nazary­na etnomádenı birlestikterdiń qolóner sheber­leriniń dúnıeleri qoıylǵan «Halyq murasy» kórme-jármeńkesi usynyldy. Budan keıin salttanatty rásim Beıbitshilik jáne kelisim saraıynyń Opera zalynda jalǵasty. Alǵashqy bolyp sóz alǵan Mem­le­ket­tik hatshy Gúlshara Ábdiqalyqova bıylǵy jyl Qa­zaqstan tarıhynda aıryqsha máni men mańyz­ǵa ıe mereıtoılar jyly bolyp qalaty­nyn já­ne bul jyl Qazaq eliniń birligi men ynty­ma­ǵyn aıqyndaıtyn belesti kezeń ekenin atap ótti. О́tken jyly Memleket basshysy Nursultan Nazarbaevtyń Jar­ly­ǵymen «2015 jyl – Qazaqstan halqy Assambleıasynyń jyly» dep jarııa­lanǵan edi. Osyǵan oraı, arnaıy ult­tyq jospar qabyldandy. Qazirgi kezde elimizdiń barlyq óńirinde, elordamyz Astanada osy jylǵa baılanys­ty, ulttar arasyndaǵy dostyqty, bir­lik­ti, bolashaqqa degen senimdi pash ete­tin úlken is-sharalar bastalyp ketti, dedi Memlekettik hatshy. Osylaı deı kele, Gúlshara Naýshaqyzy Assambleıa jy­lynyń ashylýyna baılanysty Qazaq­stan Prezıdenti, Qazaqstan halqy Assam­bleıasynyń Tóraǵasy Nursultan Nazar­baevtyń quttyqtaý sózin oqyp berdi. Memlekettik hatshynyń só­zi­nen keıin «QHA – 20 izgi is» at­ty estafetanyń sımvoly – Taı­qazandy Astana qalasynyń áki­mine tapsyrý rásimi ótti. Qasıetti Taıqazannyń kóshirmesi 1 aqpan kúni Túrkistandaǵy Qoja-Ahmet Iаsaýı kesenesinen jetkizilgen edi. Elordaǵa ákelingen bul sımvol aldaǵy ýaqytta elimizdiń barlyq óńirlerine jiberilip, Qazaqstan halqy Assambleıasynyń XXII sessııasynyń ashylýy qarsańynda qaıtadan Astanaǵa oralatyn bolady. Osynaý rásimnen keıin sóz alǵan QHA Tóraǵasynyń oryn­basary Eraly Toǵjanov pen Astana qalasynyń ákimi Ádil­bek Jaqsybekov Assambleıa jylynyń qoǵam ómirinde alatyn ornyna toqtalyp ótti. Máse­len, Eraly Toǵjanov: «Elba­sy 2015 jyldy Qazaqstan hal­qy Assambleıasynyń jyly» dep beker jarııalaǵan joq. Sebe­bi, QHA – birliktiń, eldik­tiń, turaqtylyqtyń belgi­si. Sondyqtan, árbir Qazaq­stan aza­matynyń tikeleı atsaly­sýy­nyń arqasynda ǵana bizdiń birligimiz odan ári nyǵaıa túsedi. Sizderdiń aldaryńyzǵa qasıetti Taıqazan keldi. Ony bizdiń bir top delegasııa ókilderi Túrkistan qalasynan osydan 4 kún buryn alyp kelgen edi. Taıqazan – qıyn-qystaý kezeńde eldiń basyn biriktirýge sep bolǵan qasıetti mura», deı kele, QHA jylynyń ashylýymen barsha qazaqstandyqty quttyqtady. Al Astana qalasynyń ákimi Ádilbek Jaqsybekov te Mem­leket basshysynyń Jarlyǵy negizinde qurylǵan Assambleıa búginde qoǵam úshin mańyzdy jumystardy atqaryp kele jat­qanyn tilge tıek etti. Halqymyzda «Yntymaqty eldiń yrysy mol» degen dana sóz bar. Búginde biz kelisim men birliktiń, tatýlyq pen yntymaqtyń arqasynda álem moıyndaıtyn elge aınaldyq. Demek, bul biz úshin erekshe mereıtoı. Biz «QHA – 20 izgi is» estafetasyn bastap otyrmyz. Bul estafetanyń sımvoly – Taıqazan. Aldaǵy ýaqytta biz osy estafetanyń aıasynda jáne Assambleıaǵa qoldaý kórsetý maqsatynda 20 mańyzdy is-sharany atqaratyn bolamyz. Búgin biz kelisim men birliktiń mekeni – Astanadan bastalǵan estafetany Aqmola oblysyna, onyń ákimi Sergeı Kýlagınge tapsyramyz, dedi Á. Jaqsybekov.

Astana qalasynyń ákiminen estafetany qabyldap alǵan Aqmola oblysynyń ákimi Sergeı Kýlagın: «Bul – biz úshin erekshe kún. Qazaqstan – postkeńestik keńistiktegi etnostardyń birligi men tatýlyǵyn pash etken birden-bir el. Al qazirgi tańda aınalamyzda elderdiń kóbisinde jaǵdaı kúrdeli bolyp tur. Sondyqtan, mundaı qoǵamdyq ınstıtýttyń róli qashanda mańyzdy. Elbasy konstıtýsııalyq mártebege ıe osyndaı ınstıtýtty etnosaralyq tatýlyqty qamtamasyz etý maqsatynda qurdy. Bul – bárimiz maqtan etýge tıis qurylym. Sondyqtan, QHA jylynyń 20 jyldyǵy biz úshin erekshe mereıtoı. Bizdiń memleketimiz ózi aıqyndaǵan joldan adaspaı, eldiń tatýlyǵy men birligi jolynda odan ári damı beredi dep senemiz», dedi. Beıbitshilik jáne kelisim saraıynyń Opera zalynda ót­ken mereıtoılyq shara kezinde, sondaı-aq, Qazaqstan halqy Assambleıasy jyly aıasynda uıymdastyrylatyn 9 túrli respýblıkalyq baıqaýlardyń bas­talǵany jarııalandy. Olar: «Tarıhtan – taǵylym, ótken­ge – taǵzym», «Myń bala», «Arman­daǵan mamandyq», «Júrek­ten júrekke», «Meıirim­dilikten birlikke», «Ult rýhy», «Shańyraq» sekildi taqy­ryptar aıasynda ótpek. Bul kon­kýrstardyń qorytyndysy osy jyldyń jeltoqsan aıynda uıymdastyrylatyn Qazaqstan halqy Assambleıasynyń forýmynda shyǵarylatyn bolady.

Láıla Edilqyzy, Joldybaı Bazar, «Egemen Qazaqstan».

Oqıǵaǵa oraılas oı

Assambleıa eldik múddege qyzmet etýde

Kamal BURHANOV, Parlament Má­jilisiniń depýtaty. Qazaqstan halqy As­sambleıasy – Elbasy Nur­sultan Nazarbaevtyń týyndysy. Sonaý 1995 jyly qurylǵan bul uıymnyń moınynda úlken jaýapkershilik bar. Ol óz qyzmetin bastaǵaly beri el ıgiligi jolynda kóptegen sharalardy júzege asyrdy. Bárinen de, Qazaqstandaǵy ózge ult ókilderiniń basty kisilerine eldik múddege qyzmet etýge múmkindik berdi, sondaı-aq, olardy bir maqsatqa jumyldyra bildi. Yntymaq-birligi jarasqan elimizdiń órkendeýine Assambleıanyń qosyp otyrǵan úlesi zor. Sonyń aıǵaǵy retinde memleketimizde ultaralyq kelisim men tynyshtyqtyń saqtalyp otyrǵanyn aıtar edim. Assambleıanyń basshysy, Elbasymyz Nursultan Nazarbaevtyń arqasynda, sondaı-aq, osy ınstıtýttyń saýatty is-áreketteriniń yqpalymen qo­ǵamymyzda qalyptasqan tatý­lyqty Qazaqstannyń eń basty qun­dylyqtarynyń biri dep sanaımyn. Ony biz kózimizdiń qarashyǵyndaı saqtaı bilýimiz kerek. Qazirgi álemde túrli qaqtyǵystar men  keleńsiz oqıǵalar oryn alýda. Olardyń atyn atap, túsin tústemeı-aq qoıaıyn. Mine, sondaı jaǵdaılar bizden aýlaq tur. Buǵan toqmeıilsimeı, birligimizdi odan ári nyǵaıta bergenimiz jón. Yntymaǵy joq elde bereke bolmaıtynyn aıtyp jatýdyń ózi artyq. Sondyqtan, memleketimizdiń ishki birligi úshin atqarylyp jatqan árbir shara biz úshin mańyzdy.

 Qazaqstan – birligi jarasqan el

Mýhammad Farýk BARAKI, Aýǵanstan Islam Respýblıkasynyń Qazaqstandaǵy Tótenshe jáne ókiletti elshisi. Meniń bul elge degen kóz­qara­sym óte jaq­sy. Memlekettiń ishki tatý­lyǵy talaıǵa úlgi. Qazaqstanda jarasym­dy ister óte kóp. Munyń barlyǵy Prezıdent Nur­sultan Nazarbaevtyń bastamasymen, uıymdastyrýymen jú­zege asyrylyp jatqanyn bile­min. Jalpy, yntymaǵyn bárinen joǵary qoıǵan memleket eshqashan utylmaıdy. Jeńis te, jemis te sol elden ketpeıdi. Qazaqstandyqtar muny jaqsy túsinedi dep oılaımyn. El Prezıdenti osydan 20 jyl buryn qurǵan Qazaqstan halqy Assambleıasy búginde úlken qoshemetke ıe bolyp otyr. Budan biz jaqsylyqtyń nyshanyn kóremiz. Qazaqstan halqy Assambleıasy jylynyń ashylý saltanaty joǵary deńgeıde ótti. Maǵan qatty unady. El aǵalarynyń birlikke shaqyrǵan sózderi qulaǵyma jyly tıdi. Ásirese, shara barysynda halyqtyń atalǵan qurylymǵa degen yqylasyna tánti boldym. Bul Assambleıanyń Qazaqstan úshin bereri áli alda. Men sony uqtym. О́ıtkeni, tatýlyqty tý etken uıym qashanda ómirsheń keledi.

Yntymaqty eldiń yrysy ortaımaıdy

Hasan ShARIPOV, Astana qalalyq Qazaqstan halqy Assambleıasy ózbek etnomádenı birlestigi tóraǵasynyń orynbasary. Memleket basshysy Nursultan Nazarbaevtyń bastamasymen qurylǵan Qa­zaqstan halqy Assam­bleıasynyń nátıjeli jumystaryna kýá bolyp kelemiz. Osy qurylymnyń qoǵamymyzda tatýlyq pen birliktiń berik ornaýyna súbeli úles qosyp otyrǵanyn eshkim joqqa shyǵara almaıdy. Bul – Prezıdenttiń júrgizip kele jatqan sarabdal saıasatynyń jarqyn kórinisi. Munyń barlyǵy túptep kelgende, el birligin nyǵaıtyp, erteńgi kúnge senimmen qadam basý maqsatyndaǵy aýqymdy ister. Bıyl Qazaqstan halqy Assambleıasynyń qurylǵanyna 20 jyl tolady. Osynyń kurmetine oraı tutastaı bir jyl Qazaqstan halqy Assambleıasyna arnalyp otyr. Túsingen janǵa bul tek atalǵan ınstıtýtqa ǵana emes, búkil elimizge, onyń yntymaǵy men birligi jarasqan halqyna degen shynaıy qurmet. Muny árbir qazaqstandyq azamat tereń uǵynýy kerek. Elordadaǵy О́zbek etnomádenı birlestigi elimizdegi ultaralyq kelisimniń nyǵaıa túsýine bar múmkindiginshe qoldaý bildire beredi. Bul – biz úshin abyroıly mindet. Qazaqstan halqy Assambleıasynyń jyly qutty bolsyn, aǵaıyn!

Eń bastysy – ultaralyq kelisim

Atsalım IDIGOV, cheshen ultynyń ókili, Almaty oblystyq «Ognı Alataý» qoǵamdyq-saıası gazetiniń bas redaktory. Elbasy Nursultan Nazarbaevtyń ózi bas bolyp qurǵan Qazaqstan halqy Assambleıasynyń ataq-dańqy qazirgi tańda elimizdiń aýmaǵynan asyp, álemge tanyldy. Bul – biz úshin úlken maqtanysh. Atalǵan qoǵamdyq ınstıtýttyń baǵyt-baǵdaryna, alǵa qoıyp otyrǵan maqsatyna talaılar qyzyǵyp qaraıdy. Álem elderi arasynda zaman talabyna oraı óz qyzmetin uqypty atqaryp kele jatqan bizdiń Assambleıadan úlgi alǵysy keletinder jetkilikti. Budan biz Prezıdentimizdiń ustanǵan saıasatynyń durystyǵyn anyq ańǵaramyz. Ortaq shańyraǵymyz – Qazaqstanda ómir súrý qolaıly. Buǵan kóptegen mysaldar keltirýge bolady. Ásirese, elimizde  jasap jatqan túrli etnostardyń tilin, dilin, mádenıetin, salt-dástúrin qurmettep qana qoımaı, olardy damytýǵa baǵyttalǵan jumystar kóńil tolqytady. El men jerdiń ıesi – qazaqtyń ata-babalary kezdesken qıyndyqtardyń barlyǵyn jeńe otyryp, keıingige kóptegen ıgilikterdi muraǵa qaldyrdy. Endi biz keshegiler amanatqa qaldyrǵan osy qundylyqtardy keler urpaqtyń qolyna shashpaı-tókpeı tapsyrýymyz kerek. Osynaý qasıetti paryzdy oryndaýymyz úshin bizde eń bastysy aýyzbirshiliktiń bolǵany jón. Onsyz eshqandaı nátıjege jete almaımyz.

Elbasyna alǵysymyz mol

Tamara ShIRMER, Astana qalasyndaǵy «Obereg» ýkraın etnomádenı birlestiginiń jetekshisi. Qazaqstan halqy Assambleıasynyń jumysyn qalaı aıtsań da jarasady. Onyń aıasynda «Obereg» ýkraın etnomádenı birlestigi de kóptegen ıgi isterdiń uıytqysy bolyp júr. Biz túrli mádenı-rýhanı, qaıyrymdylyq sharalaryn ótkizýde eshkimnen kende qalǵan emespiz. Munyń bári Qazaqstannyń damýyna, alǵa jyljýyna az da bolsa óz úlesimizdi qossaq degen ystyq yqylastan týyndaıtynyn aıtqym keledi. Biz birligi myǵym, halqynyń turmysy jaqsy, beıbitshilikti tý etken Otanymyz – Qazaqstanda ómir súrip jatqanymyzdy maqtan etemiz. Prezıdent Nursultan Nazarbaevqa, qazaq halqyna alǵysymyz sheksiz. Osyndaı memlekettiń azamaty bolý – biz úshin taǵdyrdyń syıy. Qazaqstan halqy Assambleıasynyń áleýeti arta bersin. Yntymaq úshin, birlik úshin jasalǵan árbir qadamymyz jemisti bolǵaı! Qysqasy, birlik, tatýlyq – qasıetti uǵymdar. Ony qasterleı bilýimiz kerek. Qazaq «Birlik, birlik túbi – tirlik» dep teginnen-tegin aıtpaǵan. Muny uqqan – irilik.

 Biz – týra joldamyz

Ivan SAÝER, «Rodına» JShS agrofırmasynyń bas dırektory. Elimizdiń búgingi tynys-tirshiligine qarap otyryp, Prezıdent Nursultan Nazarbaevtyń kórsetýimen týra jolda kele jatqanymyzdy bilemiz. Muny bári de moıyndaıdy. Bul bizdiń maqtanysh sezimimizdi týdyrady. Otanymyzda qolǵa alynǵan, júzege asqan iri jobalar mol. Solardyń arasynda men úshin Qazaqstan halqy Assambleıasynyń orny bólek. Osy qurylymnyń el ómirindegi orny halyq tarapynan oń baǵasyn alýda. Buǵan qosa aıtarym, 2015 jyl Assambleıa jyly dep jarııalandy. Menińshe,  bul jyl el tarıhynda altyn árippen jazylyp qalady. Buǵan qosarym, Assambleıa bizdiń qoǵamymyzda joǵary mańyzǵa ıe. О́ıtkeni, ol el birligin nyǵaıtý maqsatynda qurylǵan. Atalǵan ınstıtýttyń qandaı jumys atqaryp otyrǵanyn halyq biledi. Sondyqtan da ol qoǵamymyzda joǵary baǵalanýda. Qazaqstandaǵy tatýlyq pen birlikke qyzyǵa qaraıtyndar kóp. Bul, árıne, bizdiń úlken jetistigimiz. Álemde bolyp jatqan túrli oqıǵalarǵa qarap, elimizdegi mamyrajaı tirshilikke razy bolasyń. Osy oraıda Prezıdent Nursultan Nazarbaevqa alǵystan basqa aıtarymyz joq.

Birligimiz – bolashaǵymyzdyń kepili

Elena MAShINSKAIа, Aqmola oblystyq máslıhatynyń depýtaty, chývash etnomádenı birlestiginiń tóraıymy. Qazaqstan halqy Assambleıasynyń 20 jyldyń ishinde atqarǵan sharýasyn birer sózge syıdyryp aıtý múmkin emes. Uıymnyń barlyq kúshi, Elbasy Nursultan Nazarbaevtyń aıtýy boıynsha, el yntymaǵyn saqtaýǵa jumyldyryldy. Nátıjesin qazir kórip otyrmyz. Bizdiń Qazaqstan – óz jolyn durys tańdaǵan el. Osy baǵyttan aınymasaq, áli talaı belesterden ótemiz. Memleketimizde ornyqqan ultaralyq kelisimdi odan ári nyǵaıta túsýge yqpal etetin tetikter kóp. Olardyń barlyǵy da joǵary mánge ıe. Solardyń arasynda Assambleıanyń jóni basqa. Bul ınstıtýttyń negizin qalaǵan Elbasy ekeni daýsyz. Men Prezıdenttiń bul saýatty bastamasyn joǵary baǵalaımyn. О́z eliniń keleshegi úshin jany aýyratyn adam ǵana osyndaı izgi nıetti, aýqymdy isterdi jolǵa qoıady. Elimiz jasaı bersin! Qolymyzdaǵy barymyzdy baǵalap, yntymaǵymyzdyń qadirin bilip júreıik. Birligimiz – jarqyn bolashaǵymyzdyń kepili. Assambleıa jylymen barsha qazaqstandyqtardy quttyqtaımyn. Barsha qazaqstandyqty Assambleıa jylyn tabysty ótkizý úshin úles qosýǵa shaqyramyn.

Sýretterdi túsirgen Erlan Omarov, «Egemen Qazaqstan».