Bizdiń otanymyz – birliktiń berekeli besigi

Turaqtylyq tuǵyryndamyz

* Almaty Almaty qalasyndaǵy Qazaqstan halqy Assambleıasynyń «Dostyq úıinde» «Qazaqstan halqy Assambleıasy jylyn bastaý» sınhrondy-aksııasyna arnalǵan merekelik shara bolyp ótti. Oǵan Jetisý jerin meken etken túrli ult ókilderi, qalada ornalasqan etnomádenı birlestikterdiń belsendi músheleri men ónerpazdary, joǵary oqý oryndarynyń stýdentteri men qaladaǵy túrli memlekettik emes uıymdardyń ókilderi qatysty. Qazaqstan halqy Assambleıasynyń týyn kóterý saltanatty rásiminde qala ákimi Ahmetjan Esimov jıylǵan kópshilik aldynda sóz sóılep, Memleket basshysy Nursultan Nazarbaevtyń Jetisý jurtyna, merekelik jıynǵa qatysyp otyrǵan kópshilik qaýymǵa arnaǵan quttyqtaý sózin oqyp berdi. – Qurmetti qala turǵyndary men qonaqtary. Sizderdi halqymyzdyń birligi men yntymaǵyn pash etetin mereıli merekeniń bastalýymen quttyqtaımyn. Bizdiń qalamyzda ornalasqan 34 etnomádenı birlestiktiń músheleri Elbasymyz Nursultan Nazarbaev nasıhat etip kele jatqan beıbitshilik pen ulttar dostyǵy, memleketimizdegi turaqtylyq pen berekeli ómirge zor úlesin qosyp otyrǵandyǵyn aıtqym keledi. Biz, barsha qazaqstandyqtar «Bir el – bir halyq» degen uly uranmen bir jaǵadan bas, bir jeńnen qol shyǵaryp, tatý-tátti ómir súretinimizge senimdimiz, – dedi qala basshysy. Yntymaq pen birliktiń, tatýlyq pen turaqtylyqtyń týy kóterilgen sátte aspanǵa beıbitshiliktiń sımvoly retinde kógershinder ushyrylyp, túrli ult ókilderinen quralǵan ónerpazdar merekelik konsertti bastap jiberdi. Bul kúni «Dostyq úıinde» ár ulttyń salt-dástúri men ádet-ǵurpyn baıandaıtyn kórmeler men el birligin nasıhattaıtyn stendiler qoıyldy. Qanat ESKENDIR, «Egemen Qazaqstan». Sýretti túsirgen Aıtjan MYRZANOV. *Aqtaý Mereke lebi esken kún Kezinde irgetasyn bilek pen tilek qabystyra júrip ár ulttyń ókilderi qalaǵan, ári «dostyq teńizi» dep atalatyn Kaspııdiń jaǵasyn jaılaǵan Aqtaý qalasy búginde dostyq pen peıil jarastyǵyn bıik ustaǵan san ult perzentterine meken bolyp keledi. Respýblıkamyzda bastalǵan Assambleıa jyly merekesiniń shymyldyǵyn Mańǵystaý oblysy da sán-saltanatpen ashty. Akademık Sh.Esenov atyndaǵy Kaspıı memlekettik tehnologııalar jáne ınjınırıng ýnıversıteti aldyna memlekettik organdar ókilderi, áskerı bólimder sarbazdary men jastar, Assambleıa músheleri, qala turǵyndary kóp jıyldy. Ár ulttyń ulttyq kıimderin kıgen jastar ádebı-mýzykalyq kompozısııa aıasynda patrıottyq baǵyttaǵy bı úlgilerin kórsetti. Qoldaryna Assambleıa jalaýy men belgisin ustaǵan sharaǵa qatysýshylar elimizdiń Ánuranyn qosyla shyrqady. Assambleıa jylynyń bastalýymen aımaq basshysy A.Aıdarbaev quttyqtap, yntymaqqa uıyp, birligi jarasqan san ultty memleketimizdiń táýelsizdigi baıandy bolyp, bereke-birligi nyǵaıa berýine tilektestigin bildirdi. Al Assambleıa jalaýyn kóterý qurmeti dúıim jurttyń maqtanyshyna aınalǵan qos sportshy – biri Olımpıada shyńyn baǵyndyrsa, ekinshisi kezekti Olımpıadanyń alǵashqy joldamasyn qanjyǵasyna baılaǵan Á.Nııazymbetov pen B.Ábdirahmanovqa buıyrdy. Mańǵystaý ónerpazdarynyń dýly konsertine ulasqan sharada ánshiler men kúıshiler rýhty kóterer patrıottyq baǵyttaǵy shyǵarmalardy usyndy. Bıylǵy jyly elimizde Qazaq handyǵynyń 550 jyldyǵy men Uly Jeńistiń 70 jyldyǵy toılanatyndyǵynan bolýy kerek, osy merekelerdiń lebi búginnen bastalyp, Assambleıa jyly merekesimen astasyp ketti. Aýqymdy ekrannan taqyryptyq beınebaıandar kórsetilip, oryndalǵan shyǵarmalarmen úndestik taýyp jatty, jastar qolynan ushyrylǵan kók, sary, aq tústi júzdegen sharlar kókke kóterildi. Tutas bir kúnge sozylǵan mereke oblystyń barlyq aýdan, qalalarynda jalǵasyn tapty. Gúlaıym ShYNTEMIRQYZY, «Egemen Qazaqstan». *Aqtóbe

Túsinistik – bar tabystyń bastaýy

Oblys ortalyǵyndaǵy «Dostyq úıi­niń» aldyndaǵy alańǵa qala turǵyn­da­ry mol jınaldy. Burynnan da úlken mere­kelik sharalardyń ortasy bolyp taby­latyn bul úı sán-saltanatymen erek­shelenedi. Shara ótip jatqan alańda elimiz­diń Kók baıraǵy jelbirep, ult­ara­­lyq kelisimniń izgi nıetindeı bolǵan jalaý­lar men jalaýshalar qala turǵyn­da­ry­nyń kóńilderinde kórikti oıdy órbitip, birtutas memleketimizdiń birligi men tatý­­lyǵyn taǵy da pash etkendeı. Olar­­dyń arasynda san ulttardyń ókilderi bar. Qazaqstan halqy Assambleıasy jylynyń bastalýyna baılanys­ty bul úlken sharada aqtóbelikter taǵy da bereke-birliktiń, tatýlyq pen turaqtylyqtyń aıqyn nyshanyn ańǵartty. Oblysty mekendegen toq­sanǵa jýyq etnostyń ókilderi ulttar dostyǵynyń berik bekemdigin kórsetti. Bul óńir qashanda ultaralyq kelisim men halyq dostyǵynyń mekeni bolyp keledi. Oblys ákimi Arhımed Muhambetov Qazaqstan Prezıdenti, Assambleıa Tóraǵasy N.Nazarbaevtyń aldaǵy jyldy Qazaqstan halqy Assambleıasy jyly dep jarııalaǵanyn jurtshylyqqa jetkize kelip, Elbasynyń quttyqtaýyn oqyp berdi. О́ńir basshysy men Qazaqstan halqy Assambleıasynyń ardageri, «Qazaq­stan koreıleri qaýymdastyǵy» respýblı­kalyq qoǵamdyq  birlestigi Aqtóbe fılıalynyń tóraǵasy Konstantın Shaı  Qazaqstan halqy Assambleıasy jylynyń týyn kóterdi.Tý kóterý saltanatynda teatrlandyrylǵan kórinister qoıylyp, flesh-mob uıymdastyryldy jáne QHA emblemalary bar sharlar ushyryldy. Qazaqstan halqy Assambleıasy jy­l­y­nyń bastaý alýyna oraı oblystyq «Dostyq úıinde» úlken merekelik konsert boldy. Merekelik konsertte Ǵazıza Jubanova atyndaǵy oblystyq fılormonııanyń, qalalyq oqýshylar saraıynyń jáne Qudaıbergen Jubanov atyndaǵy Aqtóbe óńirlik memlekettik ýnıversıtetiniń  kórkemónerpazdary jurtshylyqqa óz ónerlerin kórsetti. Satybaldy SÁÝIRBAI, «Egemen Qazaqstan». * Atyraý

Kelisim – eń qymbat qazyna

Munaıly óńirde de túrli etnostyń ókilderi bir el – bir taǵdyr ustanymymen elimizdiń qýatty órkendeýine laıyqty úlesin qosyp keledi. Qazir Atyraýda ár ulttyń tarıhy men mádenıetin, tili men salt-dástúrin keńinen nasıhattaıtyn 17 etnomádenı birlestik qurylǵan. Olardyń jetekshileri tek óz birlestikteriniń ǵana emes, sonymen birge, basqa etnostardyń da ótkizgen sharalaryna belsene aralasady. Al keshe sol birlestikterdiń jetekshileri men músheleri Qazaqstan halqy Assambleıasy jylynyń bastalýyna arnalǵan sharada taǵy da bas qosty. Bul shara H.Dosmuhamedov atyndaǵy Atyraý memlekettik ýnıversıtetiniń «Jaıyq» sport kesheninde ótti. Shara barysynda aldymen oblys ákimi Baqtyqoja Izmuhambetov sóz alyp, Elbasy Nursultan Nazarbaevtyń Qazaqstan halqy Assambleıasy jylynyń bastalýyna oraı qazaqstandyqtarǵa arnaǵan quttyqtaýyn oqyp berdi. Al ózge ult ókilderi arasynan «Vaınah» cheshen-ıngýsh etnomádenı birlestiginiń ardageri, qazaq qyzymen otaý quryp, qazaq jerin qasıetti mekenine balaıtyn Seıtamın Akaev, «Tatýlyk» tatar-bashqurt etnomádenı birlestiginiń jetekshisi Gúl­sına Baıkenova, H.Dosmuhamedov atyn­daǵy Atyraý memlekettik ýnıversıte­tiniń stýdenti Veronıka Lı quttyqtady. – Qazaqstan halqy Assambleıasy qurylǵannan bergi 20 jyldyń ishinde biz tatýlyq pen dostyqtyń, birlik pen kelisimniń eń qymbat qazyna ekenin uǵyndyq. Osy kezeńde keń-baıtaq qazaq jerin mekendegen túrli etnos ókilderiniń bir-birimen qarym-qatynasy jaqsaryp, dostyǵy men birligi nyǵaıdy, –dedi gazet tilshisine «Iverııa» grýzın etnomádenı birlestiginiń jetekshisi Zýrab Bobohıdze. –Men Qazaqstandaı ekonomıkasy qarqyndy damyǵan, turaqtylyǵy myqty, tatýlyǵy jarasqan qýatty elde turatynymdy ár ýaqyt maqtan tutamyn. Balalarymnyń tek óz ultynyń ǵana emes, Qazaqstanda turatyn ózge de etnostardyń qundylyǵyna qurmetpen qaraýyn udaıy qadaǵalap otyramyn. Bul kúni túrli etnostyń ókilderi óz tilderinde de, ózge etnos tilderinde de ánder shyrqady. Jalpy, jyl aıaǵyna deıin ultaralyq dostyq pen tatýlyqty bekite túsýge yqpal etetin túrli sharalar uıymdastyrylatyny kózdelip otyr. Joldasbek ShО́PEǴUL, «Egemen Qazaqstan». Sýretti túsirgen Rahym QOILYBAEV. *Kókshetaý

Baq-berekeniń besigi

Kókshetaýda mańyzdy saıası oqıǵa­lardyń barlyǵy derlik Táýelsiz­­dik ala­ńynan bastalyp, «Meniń Qazaq­stanym» sáýlet-kompozısııalyq keshenin­­de keńinen jalǵasyn tabatyn dástúr qalyp­tasqan. Elbasy Nursultan Nazarbaev­tyń Jarlyǵymen jarııalanǵan Qazaqstan halqy Assambleıasy jylynyń shymyl­dyǵy da osynda túrilip, memlekettik organdardyń, eńbek ujymdarynyń, etnomádenı jáne qoǵamdyq birlestik­ter­diń, ardagerler men jastar uıymdarynyń ókilderinen qurylǵan merekelik sherý Abaı kóshesin shattyqqa toltyryp, «Me­niń Qazaqstanyma» mereılenip jetti. Qazaqstan Respýblıkasynyń mem­lekettik rámizderimen bezendirilgen ke­shen­niń týtuǵyrynda Qazaqstan halqy Assam­bleıasy jylynyń jalaýy kóterilip, jınalǵan 500 adam bir aýyzben elimizdiń Ánuranyn oryndady. Patrıottyq án-kúı­ler jiger tasytyp, jastardyń «Dos­tyq» flesh-moby kóńil terbedi. Jan-jaǵymyz el tarıhy belesterin eles­­tete­tin týlarǵa, memleketimizdiń asyl maq­­­sattaryn asqaqtatqan Qazaqstan halqy Assam­bleıasynyń logotıpterine tol­dy da ketti. Jurtshylyq qosylyp án salyp, qu­shaq­tasyp amandasyp jatyr. Bul búkil álemge aty tanylǵan Qazaq eli beıbit­­shilik pen baq-berekeniń besigi, ult­tardy uıystyrǵan aldyńǵy qatarly jaı­ma-shýaq memleket ekendiginiń belgisi edi. Oblys ákiminiń orynbasary Nurlan Nurkenov jurtshylyqty quttyqtaý sózin Elbasy, Qazaqstan halqy Assam­bleıasynyń Tóraǵasy Nursultan Nazarbaevtyń Assambleıa jylyna arnalǵan úndeýin oqyp berýmen bastady. – Búginde bizdiń birligimiz – «2050» Strategııasyn júzege asyrýdyń sheshýshi faktory. Strategııada kópetnosty halqymyzdyń danalyǵy kórinis tapqan. Ol bizdiń bitimniń, rýhanı kelisimniń aıryqsha mádenıetiniń joǵary qaǵıdattarynan arqaý alady. Elbasynyń tatýlyq pen qoǵamdyq kelisim ıdeıalaryn keńinen kórsetýge baǵyttalǵan búgingi úlken shara – memleketimiz úshin mańyzdy oqıǵa. Biz, aqmolalyqtar «Qazaqstan halqy Assambleıasy – 20 ıgi is» estafetasyn birinshi bolyp qabyldap otyrmyz. Bul biz úshin úlken abyroı jáne joǵary jaýapkershilik júkteıdi. Aıtýly oqıǵaǵa oraılastyrylǵan ǵylymı-tanymdyq, buqaralyq sharalar Kókshetaýdaǵy «Dostyq úıinde», bilim oshaqtaryndaǵy «Qoǵamdyq kelisim» uıymdarynda, kitaphanalar men mýzeılerde, sondaı-aq oblystyń barlyq eldi mekenderinde ótkizildi. Baqbergen AMALBEK, «Egemen Qazaqstan». *Qaraǵandy

Maqsat aıqyn, mindet belgili

Keshe Qaraǵandy qalasynda tatý­lyǵymyzdyń tuǵyryn bekitken túrli etnos ókilderiniń qatysýymen Qazaqstan halqy Assambleıasy jylynyń sóreden shyǵýyna baılanysty saltanatty sharalar bolyp ótti. Oǵan oblys ákimi Nur­m­u­hambet Ábdibekov qatysyp, Elbasy Nursultan Nazarbaevtyń Qazaqstan halqy Assambleıasy jylynyń ashylýyna oraı joldaǵan quttyqtaýyn oqyp berdi. Munyń aldynda Qaraǵandynyń ortalyq alańynda Assambleıa týyn kóterý rásimi ótti. Týdyń oblysqa tanymal adamdardyń qatysýymen kóterilgenin atap ótken jón. Al bul sharadan soń ár ulttyń ulttyq kıimderin kıgen jastar ádebı-mýzykalyq kompozısııa sheńberinde patrıottyq baǵyttaǵy teatrlandyrylǵan kórinister kórsetti. Qoldaryna Assambleıa jalaýshasyn ustaǵan jurtshylyq ókilderi Qazaqstan Respýblıkanyń Ánuranyn qosyla shyrqady. Qazaqstan halqy Assambleıasy jylynyń bastalýyna oraı bul úlken shara barysynda qaraǵandylyqtar taǵy da yntymaq pen birliktiń, tatýlyq pen dostyqtyń elimizde saltanat quryp otyrǵanyn ózderiniń kóńil-kúılerimen pash etti. Bul óńir ejelden ultaralyq kelisim men halyq dostyǵynyń oshaǵyna aınalǵan. Al Qazaqstan halqy Assam­­­bleıasy jylynyń bastaý alýyna oraı oblys ortalyǵynda úlken merekelik konsert uıymdastyrylǵanyn da aıta keteıik. Kezinde irgesin bilek sybana, tilek qosa júrip ár ulttyń ókilderi bekite túsken kenshiler qalasy qazirgi tańda dostyǵy men birligi jarasqan san ulttyń perzentteri tatý-tátti ómir súrip jatqan óndiristi qala sanalady. Otanymyzdyń ortalyǵynda tý tikken shahar qazirgi tańda ózinde turatyn barlyq etnostar birliginiń naǵyz nyshanyna aınalǵan. Dostyq pen túsinistiktiń arqasynda Qaraǵandy qalasynda ǵana emes, jalpy óńir eldi mekenderinde bir jeńnen qol, bir jaǵadan bas shyǵara yntymaqpen eńbek etken halyqty kóresiń. Keshke salym qala ortalyǵyndaǵy alańda Assambleıa jylyna arnalǵan sharalar odan ári jalǵasyn tapty. Aıqyn NESIPBAI, «Egemen Qazaqstan». * Qostanaı

Dostyq pen birlik baıany

Qazaqstan halqy Assambleıasy jylynyń qadamy Qostanaıda «Jastar qoǵamdyq kelisimdi qalaıdy» atty jastar flesh-mobynan bastaldy. Qoldaryna alýan tústi gúl, lenta, shar ustaǵan jastardyń «Qazaqstan halqy Assambleıasyna – 20 jyl!», «17 mıllıon qazaqstandyqtyń qalaýy – dostyq, birlik!», «Jastar qoǵamdyq kelisimdi qoldaıdy!» degen daýysy jarqyn estiledi. Qazaqstandy qut meken etken ártúrli ulttardyń áýeni qalyqtady. Dostyq pen birlik, adamdar arasyndaǵy shynaıy syılastyq jáne jastar jalyny barda, qys aýasynyń qytymyrlyǵy da yǵysatyndaı. Flesh-mobtyń saltanatyn keltirip turǵan jastardyń alaýlaǵan júzin aıaz óbedi. Jastar jıynynda Assambleıa jylynyń týy saltanatty kóterildi. Ony kóterý qurmeti oblysqa, respýblıkaǵa belgili sportshy jastar Toqtar Jıentaev, Ivan Gerber, Elızaveta Iаkovleva, Mars Aqbalınov, Jadyra Qalıeva jáne Uly Otan soǵysynyń ardageri Mıhaıl Podolıakov pen búgingi kúnniń batyry, birneshe adamnyń ómirin órtten qorǵap qalǵan aǵa serjant Erlan Dúzenovke be­rildi. Tý saltanatty kóterilgennen keıin jastar aspanǵa dostyqtyń, beıbit ómir­diń belgisindeı túrli-tústi sharlar ushyrdy. Munan keıin Qazaqstan halqy Assam­bleıasynyń ashylý saltanaty I.Omarov atyndaǵy oblystyq qazaq drama teatrynda jalǵasty. Onda oblys ákimi Nuraly Sádýaqasov qostanaılyqtardy Qazaqstan halqy Assambleıasy jylynyń ashylýymen quttyqtady. – Elbasy Nursultan Nazarbaevtyń bastamasymen qurylǵan Qazaqstan halqy Assambleıasy 20 jyl boıy qoǵamdyq kelisimniń qazaqstandyq úlgisiniń basynda turdy, – dedi Nuraly Mustafauly. – 2015 jyl Elbasy Jarlyǵymen Qazaq­stan halqy Assambleıasynyń jyly bo­lyp­ jarııalandy. Osylaı degen ákim Qa­­zaq­stan halqy Assambleıasynyń Tór­aǵasy Nursultan Nazarbaevtyń qazaq­stan­­dyqtarǵa quttyqtaý sózin oqyp berdi. Saltanatty jıyndaǵy Qazaqstannyń ótken tarıhı joly túrli ult ókilderiniń án-jyrymen, bıimen beınelendi. Názıra JÁRIMBETOVA, «Egemen Qazaqstan». *Qyzylorda

Yrys uıyǵan el

Syrdyń boıynda Assambleıa jylynyń ashylýy sán-saltanatymen bastaldy. Turaqtylyq pen toleranttylyqtyń, yrys pen yntymaqtyń uıytqysyndaı bolǵan uıymnyń mereıin asyryp, meımanasyn tasytatyn sharalar kún uıasynan kóterile týyn tiktedi. «Muz aıdynynda» estafetalyq jarys ótti aldymen. Halyq merekeniń berekesine aýylsharýashylyq jármeńkesinde kýá boldy. Onan soń «Syr Ana» monýmentinen bastaý alǵan avtosherý búkil qalany aralap, Ortalyq alańǵa kelip toqtady. Bul sátte Qazaqstan halqy Assambleıasy jylynyń týy resmı túrde kóterilip, «Jastar qoǵamdyq kelisimdi qoldaıdy» atty flesh-mob ótip jatqan. Onan keıingi saltanatty jıyn Nartaı Bekejanov atyndaǵy drama teatrdyń sahnasynda jalǵasty. Túrli ult pen ulystyń ókilderi ózderiniń ulttyq kıimin kıip, bir-birimen aıqara qushaqtasyp amandasyp, mereıli merekemen quttyqtasyp, abyr-sabyr kúı keshti. Teatrdyń kire berisine ár halyqtyń ómirinen syr shertetin buıymdar qoıylyp, kórme uıymdastyrylypty. Assambleıa jylynyń ashylý saltanatyna qatysqan oblys ákimi Qyrymbek Kósherbaev Elbasynyń hatyn oqyp berip, quttyqtaý sóz sóıledi. Aımaq basshysy óz baıandamasynda atalǵan uıymnyń máni men mańyzyna toqtalyp, qoǵamdaǵy erekshe rólin atap ótip, birlik pen yntymaq bolǵan jerge bereke ornaıtynyn aıtty. Saltanatty sharanyń sońy «Meniń elim – Máńgilik El» atty teatrlandyrylǵan qoıylymǵa ulasty. Árbir ulttyń áni oryndalyp, bıi bılenip, sahna jaınap sala berdi. Rasynda, Qazaqstan halqy Assambleıasy sekildi qoǵamdyq ınstıtýt álemniń eshbir elinde joq. Elbasy Nursultan Nazarbaevtyń tikeleı bas­tamasymen qurylǵan uıym elimizdegi turaqtylyq pen damýdyń ózegindeı dúnıe ekeni anyq. Erjan BAITILES, «Egemen Qazaqstan». *Oral

Týystyq týy qashanda joǵary

Keshe Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń aldyndaǵy alańǵa batysqazaqstandyq jurtshylyq ókilderi óte kóp jınaldy. Olar munda Assambleıa jylynyń ashylýyna oraı ótkizilgen sharalarǵa qatysty. Assambleıa jylynyń ashylý rásimi aıasynda Máńgilik El kóshine bettep bara jatqan Qazaq eliniń keshegisi men búgingisine qatysty oqıǵalardy qamtıtyn teatrlandyrylǵan kórinister tereń áser qaldyrdy. Budan soń Qazaqstan halqy Assam­­bleıa­sy jylynyń emblemasy belgilen­gen­ Jer sharynyń beınesi men Assam­­bleıa jyly­nyń týy kókke kóterile berdi. Bul ta­masha qaıtalanbas sát «Jastar qoǵam­d­yq kelisimdi qorǵaıdy» atty 400-ge tarta stýdent pen jastar qatys­qan flesh-mobtyń túıinine aınaldy. Kelesi kezekte atalǵan aımaqtyq joǵary oqý orny­nyń májilis zalynda ulttyq-mádenı birlestikter ókilderiniń bastamasymen «Assam­b­leıanyń 20 jyldyǵyna – 20 jaq­sy is» atty estafetanyń betashary ótkizildi. Bul kúni shoqtyǵy bıik sharalarǵa jınalǵan jurtshylyq ókilderi aldynda Batys Qazaqstan oblysynyń ákimi Nurlan Noǵaev batysqazaqstandyqtarǵa arnalǵan Elbasynyń quttyqtaýyn oqyp berdi. Budan ári oblys basshysy Qazaqstan halqy Assambleıasynyń buǵan deıingi tarıhy birlik pen kelisim, dostyq pen týysqandyq barsha qazaqstandyqtyń basty quńdylyǵy ekenin dáleldep bergendigi jóninde oı qorytty. Assambleıa jylyn merekeleý rýhanı kelisim men tatýlyqqa negizdelgen bizdiń osyndaı tereń mazmundy baılanystarymyz ben qarym-qatynasymyzdy odan ári tereńdetýge qyzmet jasaı alady, dedi odan ári ol. Bir sózben aıtqanda, elimizdiń batys­taǵy qaqpasy – Oralda ótkizilgen Assam­bleıa jylynyń ashylý sáti jarqyn merekege aınaldy. Oral óńirin mekendeıtin ti­legi bir, maqsat-múddeleri ortaq ártúrli etnos ókilderi de gazet tilshisine óz oı-pikir­lerin jetkizdi. Solardyń biri Oral – Ja­ıyq kazachestvosy basqarmasynyń tór­aǵasy Anatolıı Avılov bizge bylaısha ún qatty: – Qazaqstan halqy Assambleıasy jyly – Elbasymyz Nursultan Nazarbaevtyń barshamyzǵa ortaq qazaqstandyq qoǵam­dyq kelisimdi ornyqtyrý men qalyp­tas­tyrýdaǵy baǵa jetpes qyzmetin ósirmeı, dabyralamaı, ásirelemeı aıtatyn ýaqyt. Bizde búkil álemge úlgi bola alatyndaı etnosaralyq jarasymdylyq pen úılesimdiliktiń qaıtalanbas modeli jasaldy. Bizdiń kúshimiz – birlikte. Biz Assambleıa róli budan ári de kóteriletinine, onyń atqaratyn qyzmeti odan ári nyǵaıa beretinine senemiz. Temir QUSAIYN, «Egemen Qazaqstan». * О́skemen

Yntymaqtyń altyn arqaýy

Elimizde Qazaqstan halqy Assambleıa­sy jylynyń ashylýyna oraı ótken jal­pyhalyqtyq sınhron-aksııaǵa shyǵys­qazaqstandyqtar da aıryqsha ún qosty. Erteńgilik erke Ertistiń sol jaǵasyndaǵy Komsomol aralyna halyq tolassyz aǵyldy. Oblys basshylarymen birge óńir­degi QHA músheleri, etnomádenı birles­tikterdiń ókilderi, joǵary oqý orynda­rynyń stýdentteri jáne qala turǵyndary men qonaqtary qatysqan aksııaǵa barlyǵy 7 myńnan astam adam jınaldy. Atalǵan shara Qazaqstan halqy Assam­bleıasynyń merekelik týyn zeńgir kókke saltanatty túrde kóterýden bastaldy. Týdy Uly Otan soǵysynyń ardagerleri Ábilmájin Baıjumanov, Dmıtrıı Moskalsov, Olımpıada chempıony Olga Rypakova jáne óńirdegi túrli etnomádenı birlestikterdiń jastary kóterdi. Memleket basshysy, Qazaqstan halqy Assambleıasynyń Tóraǵasy Nursultan Nazarbaevtyń aksııanyń qatysýshylaryna joldaǵan quttyqtaý lebizin oblys ákimi Danıal Ahmetov oqyp berip, bıyl elimizde birqatar aıshyqty mereıtoılar ótetinin, onyń ishinde Qazaqstan halqy Assambleıasy jylynyń ashylyp otyrǵanyn jetkizdi. – Elbasy Nursultan Nazarbaevtyń kemel saıasatymen qurylǵan Qazaqstan halqy Assambleıasy birlik pen tatýlyqtyń biregeı úlgisine aınaldy. Dostyqqa dáneker ulaǵatty isterdiń uıytqysy boldy. Bıyl elimizdegi beıbitshilik pen yntymaqtyń altyn arqaýyna aınalǵan Assambleıaǵa 20 jyl tolady, – dedi óńir basshysy Danıal Ahmetov. Shara sońy merekelik konsertpen jal­ǵasyp, Dostyq úıleri men etno­mádenı bir­lestikterdiń quramyndaǵy shyǵarma­­­shylyq ujymdar óz ónerlerin pash etti. Sondaı-aq, shańǵydan jarys uıymdas­tyryldy. Aksııaǵa qatysýshylar barlyq ult pen ulys ókilderiniń ulttyq taǵam mázirinen daıyndalǵan «Dostyq dastarqanynan» dám tatty. Muz aıdynynda «Biz dostyǵymyzben qýattymyz!» atty jastardyń flesh-mob aksııasy da jurt nazaryn aýdardy. Atalǵan sınhron-aksııanyń negizgi tini – Elbasy Nursultan Nazarbaevtyń qoǵamdyq kelisim jáne beıbitshilik ıdeıalary ustanymyn pash etýge, «Nurly Jol – bolashaqqa bastar jol» Joldaýyndaǵy mindetter men tapsyrmalaryn júzege asyrýǵa, «Máńgilik El» ıdeıasynyń tóńiregine toptasýǵa jáne Qazaqstan halqy Assambleıasy jylynyń aıasynda bereke-birligimiz ben dostyǵymyzdy nyǵaıtýǵa baǵyttalǵan. Dýman ANASh, «Egemen Qazaqstan». *Pavlodar

Tańdaýymyz – tatýlyq

Oblystaǵy Assambleıa músheleri, etnomádenı birlestikterdiń jetekshileri, Assambleıanyń jastar qanaty, Ulttyq jańǵyrý mektebiniń ustazdary, soǵys jáne eńbek ardagerleri, stýdentter, mádenıet, bilim, sport salasynyń qyzmetkerleri oblys ortalyǵyna kireberistegi «Birlik jáne kelisim monýmenti» janynan Astanadan kelgen Assambleıa jylynyń týyn kútip aldy. – Bul kún bárimiz úshin erekshe este qalady, elimizge taǵy bir mereke kelip qosylǵandaı, – dedi etnobirlestikter jastar keńesiniń tóraıymy  Elına Paýlı.  Iá, Elbasy Jarlyǵymen 2015 jyl Qazaqstan halqy Assambleıasynyń jyly bolyp jarııalandy.  Tý kótergen estafeta músheleri oblystyq Júsipbek Aımaýytov atyndaǵy mýzykalyq-drama teatryn, Memlekettik rámizder alańyn, Sh.Ýálıhanov pen G.Potanın eskertkishterin, Saıası qýǵyn-súrgin qurbandaryn eske alý eskertkishin, «Dańq» obelıskisin aınalyp ótip, eskertkishterge gúl shoqtaryn qoıdy. Sodan soń, Qazaqstan halqy Assambleıasy jylynyń týy  oblys ortalyǵyndaǵy «Dostyq úıiniń» alańyna kelip jetti. Alańǵa Assambleıa týyn saltanatty túrde aqyn Arman Qanı, konkıshi Lıýdmıla Prokasheva, stýdent Anjelıka Kreımer, cheshen-ıngýsh etnomádenı birlestiginiń tóraǵasy Mýmadı Abdýrashıd, kúıshi Oljabaı Temirlan, tatar-bashqurt ókili Rınat Abdýlkaıýmov alyp shyqty.  Tý kóterýdiń saltanatty rásimin oblys ákimi, oblystyq Qazaqstan halqy Assambleıasynyń tóraǵasy Qanat Bozymbaev, «Vatan» ázerbaıjan qoǵamynyń tóraǵasy Djafar Mahmýdov, etnomádenı birlestikterdiń tóraıymy Elına Paýlı jasady. Oblys ákimi Q.Bozymbaev Elbasy Nursultan Nazarbaevtyń quttyqtaý sózin oqyp berdi.  Sonymen birge, «Dostyq úıiniń» alańynda «Halyq dostyǵy» atty flesh-mob uıymdastyryldy.  Oblystyq QHA jastar birlestikteriniń kóshbasshylary «Meniń tańdaýym – birlik» degen jazýy bar sharlar ushyrdy. Ortalyq alańda ártúrli  ulttardyń áýenderinde án aıtylyp,  bı bılendi. «Dostyq úıinde» ártúrli ult ókilderiniń  halyq qolóneriniń kórmesi ashyldy. Oblystyq etnomádenı birlestikterdiń basshylarymen túrli kezdesýler ótkizildi.  Apta boıy  Assambleıa jylyna arnalǵan túrli sharalar oblystaǵy aýdan, qala, aýyldarda da atalyp ótedi. Mektepterde  Qazaqstan halqy Assambleıasy tarıhynyń qurylýy, qazirgi jumysy, bolashaǵy taqyrybynda leksııa sabaqtary júredi. Sonymen qatar, oblystaǵy kitaphanalarda kitap kórmeleri, kezdesýler jáne taǵy basqa sharalar uıymdastyrylady. Farıda BYQAI, «Egemen Qazaqstan». Sýretti túsirgen Vladımır BÝGAEV. *Petropavl

Taǵattylyq tamyry tereńde

Elimizdiń ózge aımaqtary sııaqty Qyzyljar óńirinde de Qazaqstan halqy Assambleıasy jyly saltanatty túrde ashylyp, halyqtyq merekege ulasty. Elbasy N.Nazarbaevtyń arnaıy Jarlyǵymen jarııalanǵan resmı shara oblys ákimi Erik Sultanovtyń qatysýymen M. Qozybaev atyndaǵy Soltústik Qazaqstan memlekettik ýnıversıtetinde «Jastar qoǵamdyq kelisimdi qoldaıdy!» atty flesh-mobpen ótip, eń basty qundylyqtarymyz – Táýelsizdigimiz, birligimiz ben yntymaǵymyz keńinen jyrlandy. Soǵys, eńbek ardagerlerinen, jastardan, qoǵamdyq uıymdar men ulttyq-mádenı birlestikter ókilderinen quralǵan myńdaǵan adam osynda jınalyp, biregeı ınstıtýt – Qazaqstan halqy Assambleıasynyń elimizdegi barlyq ult pen ulysty bir shańyraq astyna toptastyra bilgen tabandy da jigerli jumystaryna qoldaý kórsetti. Iá, Memleket basshysynyń salıqaly da baıypty saıasaty arqasynda Qazaqstannyń tatýlyq mekenine, dostyqtyń bekem ordasyna aınalǵanyna eshkim shák keltire almasy anyq. Erik Hamzauly soltústikqazaqstandyqtardy elimizdiń barlyq jerlerinde bir mezgilde alaýy tutanǵan saltanatty merekeniń máre alýymen quttyqtap, Elbasynyń Qazaqstan halqy Assambleıasynyń ashylýyna arnalǵan quttyqtaýyn oqyp berdi. Eńbek ardageri Grıgorıı Kýhar, №17 Ulttyq jańǵyrtý mektebi tarıh pániniń muǵalimi Irına Týhvatýlına óz sózderinde baq-bereke, yrys eselengen, ásem án men kúı terbelgen elimiz qoǵamdyq birlikti tý etip ustaý arqyly damyǵan, bolashaǵy jarqyn memleketke aınalǵanyn, kez kelgen ǵalamat josparlardy iske asyrýǵa qabiletti ekenin tolǵana jetkizdi. Oblysqa tanymal bir top soǵys, eńbek ardagerleri men sport maıtalmandary Assambleıa týyn kóterý qurmetine ıe boldy. Aksııa odan ári eńseli bilim ordasynyń akt zalynda jalǵasyp, Assambleıanyń Qazaqstan azamattaryn otansúıgishtik rýhta tárbıeleýdegi, olardyń arasyndaǵy dostyq pen yntymaqty nyǵaıtýdaǵy ólsheýsiz isi pash etildi. Sonyń naqty kórinisi retinde júzden astam etnostardyń basyn biriktirip otyrǵan óńirdiń berekeli de merekeli kelbeti ár júrekke nur bolyp quıylyp jatty. Merekelik konsert «Qazaqstan – ortaq úıimiz» atty vokaldi-horeografııalyq kompozısııamen ashylyp, sahnaǵa kezekpe-kezek kóterilgen «Araı», «Qarlyǵash», «Drýjnye rebıata», «Ekspromt», «Alýa», «Qýanamyn» bı ansamblderi ár halyqtyń bılerin naqyshyna keltire oryndap berdi. Túrli tilderde shyrqalǵan ánderdi kórermender óte jyly qabyldap, úlken yqylaspen tyńdady. О́mir ESQALI, «Egemen Qazaqstan». Sýretti túsirgen Talǵat TÁNIBAEV. *Taldyqorǵan

Jarasymdy jalǵaǵan jyl

Taldyqorǵandaǵy «Jastar» sport saraıynda Qazaqstan halqy Assambleıasy jylynyń ashylýyna oraı saltanatty jıyn ótti. «Ǵasyrlar úndestigi» atty Qazaq handyǵynyń 550 jyldyǵynan syr tartqan teatrlandyrylǵan kórinis Shoqan, Súıinbaı, Abaı týyndylaryn pash ete Kók baıraqty jelbirete el bolyp Ánurandy oryndaýmen ulasty. Elbasynyń Assambleıa jyly aıasyndaǵy halyqqa arnaǵan quttyqtaýyn Almaty oblysynyń ákimi Amandyq Batalov oqyp berdi. Assambleıa jylynyń týy kóterilip, ár etnos ókilderi ulttyq bılerin bılep, merekelik án shashýmen kóńilderge qýanysh nuryn sebe bildi. Belgilengen kestege sáıkes, «Qazaqstan halqy Assambleıasy – 20 izgi is» atty aýyspaly estafetasynyń sımvoly Aqsý aýdanynyń ókilderine tapsyryldy. Jyl sońyna deıin bul taıqazan Almaty oblysynyń aýdandary men qalalaryn aralata ótkizilip, Astanaǵa jetkiziletini de habarlandy. Sondaı-aq, respýblıkalyq, oblystyq deń­­­geılerde túrli salalar boıynsha baıqaýlar ótkiziletinin de sala ókilderi jarııalady. Belarýs maıdanyna qatysqan ardagerlerge «Belarýs memleketiniń nemis basqynshylarynan azat etilgenine – 70 jyl» medalin oblys ákimi osy kúni tabys etti. Aıtýly sharanyń taǵy bir artyqshylyǵy sahna tórine kóterilip, izgi nıetterin bildirgen túrli etnos ókilderiniń barlyǵy taza qazaq tilinde esh múdirissiz sóılep, jamıǵattyń qoshemetine bólendi. Osynaý izgilikti «Til-parasat» respýblıkalyq baıqaýynyń jeńimpazy Tatıana Bedareva «memlekettik tilge degen qurmetimiz» dep túıindedi. Jetisý jerinde turatyn 103 etnos ókili bas qosqan jıyn «Qazaqstan – Nursultan!» uranymen árlenip, baýyrsaq merekesimen shadyman shattyqqa bóledi. Nurbol ÁLDIBAEV, «Egemen Qazaqstan». *Taraz

Shańyraǵy bıik shattyq mekeni

«El birligi – eń asyl qasıet» dep Elbasymyz aıtqandaı, Qazaqstan kóptegen ulttardyń basyn bir shańyraq astyna biriktirip otyrǵan tuǵyrly meken. Iá, osynaý ýaqyt aralyǵynda jas barys­taı qýatty memleketimiz álemge ózin tany­typ, damýdyń qaryshty qadamdaryn jasaǵan serpindi el retinde moıyndalyp úlgerdi. Eń bastysy, sútteı uıyǵan ulttar tatýlyǵynyń jarqyn úlgisine aınaldy. Keshe Qazaqstan halqy Assambleıasy jylynyń Jambyl jerinde bastalǵan saltanatty sátterin áýlıeatalyqtar bereke, birligimen qarsy aldy. Qasıetti Áýlıeata óńiri – ejelden dostyqtyń kıeli mekeni. Jalpy, Jambyl oblysynda seksennen astam ulttyń ókilderi turady. 26 oblystyq, 47 aýdan­dyq etnomádenı birlestik jumys isteıdi. Bul kúni Tuńǵysh Prezıdent saıaba­ǵynan bastalǵan marafon, «Balasaǵun» OKZ aldyndaǵy Qazaqstan halqy Assambleıa­sy jylynyń týyn saltanatty kóterý rásimimen jalǵasty. Jastar jetkizgen Dostyq týyn munan soń London Olımpıadasynyń qola júldegeri Aqjúrek Tańatarov, qoǵam qaıratkeri Aleksandr Savchenko jáne Jambyl oblysynyń ákimi Kárim Kókirekbaev tuǵyrǵa bekitip, saltanatty jaǵdaıda bıikke kóterdi. Sondaı-aq, «Jastar qoǵamdyq kelisimdi qoldaıdy» jastar flesh-moby, «Sheber» halyqtyq-qoldanbaly óner sheberleriniń kórme-jármeńkesi, «Qazaqstan halqy Assambleıasy jylynyń bastaý alýy» sınhron-aksııasynyń saltanatty ashylýy kópshilikke kóterińki kóńil-kúı syılady. Oralhan DÁÝIT, «Egemen Qazaqstan». * Shymkent

Jasa, samǵa, Qazaqstan!

Jańa ákimshilik-iskerlik ortalyǵyn­­daǵy alańda Qazaqstan halqy Assambleıasy jylynyń ashylýy saltanatty jaǵdaıda ótti. Ońtústik Qazaqstan oblysynda júz­den asa ártúrli etnos ókilderi, jıyr­ma mádenı-ulttyq birlestik jumys jasaı­dy. Qazaqstan halqy Assambleıasy jyly – beıbit­shilik pen kelisim, tatýlyq, «Máńgi­lik El» ıdeıasyn iske asyrý, «Nurly Jol – bolashaqqa bastar jol», ıaǵnı jańa­rý jylymen astasyp jatqan qut­ty jyl. Sóz alǵan etnos ókilderi oılaryn elimiz úshin basty qundylyqtar bolyp sana­latyn osy jaıttardan alyp jatty. Assambleıa týyn saltanatty túrde alyp shyqqan sportshylardy ýaqytynda Qazaq­stan boks quramasynyń kapıtany bolǵan, eńbek sińirgen sport sheberi, KSRO-nyń tórt dúrkin, Eýropanyń eki dúr­kin, Azııa men Azııa oıyndarynyń eki dúrkin chempıo­ny Nurjan Smanov bastap shyqty. Al 15 metrlik týdy kótergender – dańqty balýan Bısolt Desıev, aýyr at­­let­shi Andreı Makarov, boksshy, Olım­pıa­­danyń qola júldegeri Erkebulan Shynalıev. Bul saltanatty sharadan keıin «Jastar qoǵamdyq kelisimdi qoldaıdy» atty flesh-mob ońtústik órenderiniń oryndaýynda kópshilik nazaryna usynyldy. Al Ońtústikten baqytyn tapqan etnos ókilderiniń saltanatty sherýinen keıin oblystyq máslıhattyń depýtaty, «El bir­ligi» depýtattar tobynyń jetekshisi Ábil­qasym Dosbolov quttyqtaý sóz sóıledi. «Túrkistan» saraıynda jalǵasqan merekede oblys ákiminiń orynbasary Sapar­bek Tuıaqbaev Qazaqstan Respýb­lıkasy­nyń Prezıdenti – Qazaqstan halqy Assam­bleıasynyń Tóraǵasy Nursul­tan Nazarbaevtyń Qazaqstan halqy Assam­bleıasy jylynyń ashylýyna arnalǵan quttyqtaý sózin oqydy. Saltanatty kesh konserttik baǵdar­lamaǵa ulasty. Baqtııar TAIJAN, «Egemen Qazaqstan». Sýretti túsirgen Qaısar ShERIM.