Maqsat – jumys oryndaryn saqtaý

Oralda jergilikti qamtýdy damytý jáne jumys oryndaryn saqtaý máselelerine arnalǵan keńes ótkizildi. Oǵan arnaıy kelgen Investısııalar jáne damý mınıstri Áset Isekeshev álemdik ekonomıkanyń bir bólshegi bolyp tabylatyn Qazaqstanǵa álem elderindegi ekonomıkalyq qarjy daǵdarysy men Reseı rýbli qunsyzdanýynyń janama áseri tıip otyrǵanyn aıtty. Osyndaı kezde kásiporyndardy jumyspen qamtamasyz etý, olardyń óndiristik qýatyn qajet­ti deńgeıde ustaý, jumys oryndaryn saqtaý asa mańyzdy dedi ol. Bul úshin memlekettik organdar ulttyq kompanııalarmen birge otandyq taýarlardyń básin kóterý máselelerimen aınalysýlary qajet. Mınıstrdiń aıtýynsha, qazirgi kúni munaı-gaz kompanııalary bıýdjetteri kemýi saldarynan olardan tapsyrys­tar alatyn orta jáne shaǵyn bızneske qatysty túıtkildi máseleler týyndap otyr. Sondaı-aq, qazirgi kezde jer­gilikti óndirisshini qol­dap, qajetti taýarlar alý­dyń múmkindikterin izdes­tirý isiniń de mańyzy zor. Mun­daǵy maqsat – óndiris oryn­­daryn­daǵy turaqtylyqty saq­taýǵa baǵyttalǵan. Memleket bas­shy­synyń tapsyrmasy boıyn­­­sha respýblıkada óndiris úderis­­terin turaqtandyrý jáne ju­mys­kerlerdiń eńbek quqyqtary men kepildikterin qamtamasyz etý jóninde oblys ákimdikteri men iri kásiporyndar arasynda ózara yntymaqtastyq týraly memorandýmdar jasaý boıynsha keń aýqymdy ister bastaldy. Elimizdiń barlyq aımaǵynda osyndaı sharalar ótkizilýde. Qazirdiń ózinde osyndaı 12 keńes ótkizilip, barlyǵy 200 memorandýmǵa qol qoıylǵan. Budan ári Energetıka mınıstri Vladımır Shkolnık Úkimet Elbasy Joldaýyna sáıkes orta merzimde ekonomıkany damytýdyń basty quraly bola alatyn 2020 jylǵa deıingi merzimge ar­nalǵan «Nurly Jol» atty ınfra­qurylymdy damytý boıynsha keń aýqymdy memlekettik baǵdarlama ázirlen­genin alǵa tartty. Munda qazaq­standyq qamtýdy damytý men otandyq bıznesti qoldaýdyń ózekti máseleleri qamtylǵan. Al Batys Qazaqstan oblysy­nyń ákimi Nurlan Noǵaev kún tártibine qoıylyp otyrǵan máse­leler boıynsha oblysta 303,3 mıllıard teńgeniń 38 jobasy qolǵa alynǵanyn jetkizdi. Sonymen birge, aldaǵy ýaqytta óńirde 2100 jańa jumys orny ashylmaq. Investorlar jobalaryn júzege asyrý barysynda qýat únemdeıtin jáne ónimniń ózindik qunyn azaıtýǵa baǵyttalǵan jańa tehnologııalar qoldanyla bastady. Osy arqyly oblys kásiporyndarynda básekege qabilettilik deńgeıin kóterý kózdelgen. Forým aıasynda atqarýshy bılik ulttyq kompanııa basshy­lary, kásipodaq uıymynyń jetek­shileri oblystyń irgeli kásiporyn­darymen jumys ornyn saqtaý máseleleri 8 jáne ulttyq kompanııalar men jer qoınaýyn paıdalanýshylar arasynda 20 memorandýmǵa qol qoıyldy. Onyń jalpy quny 47 mıllıard teńge quraıdy. Temir QUSAIYN, «Egemen Qazaqstan». Batys Qazaqstan oblysy.