Búgin Saýd Arabııasynda AQSh pen Reseı delegasııasy Ýkraınadaǵy qaqtyǵysty toqtatýǵa baılanysty kelissózge kirisedi. 2022 jyldyń 24 aqpanyndaǵy kúrdeli oqıǵadan keıin dál mundaı joǵary deńgeıdegi talqylaý bolǵan emes. Alaıda buǵan Ýkraına qatyspaıdy. Kelissóz qandaı nátıje bermek?
AQSh prezıdentiniń Taıaý Shyǵystaǵy arnaıy ókili Stıv Ýıtkoff «Fox News»-ke bergen suhbatynda kelissózder oń nátıje beretinine senimdi ekenin aıtty.
«Men jeksenbi kúni Saýd Arabııasyna Ulttyq qaýipsizdik keńesshisimen birge keldim. Biz prezıdenttiń tapsyrmasy boıynsha kezdesýler ótkizemiz, Reseı men Ýkraınaǵa qatysty oń nátıjege qol jetkizemiz dep úmittenemiz. Sonymen qatar Ýkraına kelissózderge qatyspaıdy degenmen kelispeımin», dedi S.Ýıtkoff.
Ol sondaı-aq Ýkraına men Reseı aldymen ózara senim qurý kerek ekenin, osy oraıda amerıkalyq tarap ýkraın sheneýnikterimen bólek kelissóz júrgizip jatqanyn málimdedi.
Eske salsaq, Donald Tramp 13 aqpanda Saýd Arabııasynda Reseı, AQSh jáne Ýkraına ókilderiniń kezdesetinin jarııalaǵan edi. Al «Bloomberg» agenttiginiń málimetinshe, AQSh pen Reseı prezıdentteri aqpan aıynyń sońynda Saýd Arabııasynda kezdesip, Ýkraınadaǵy qaqtyǵysty toqtatý máselesin talqylaıdy. Qazir Vashıngton men Máskeýdiń joǵary shendi ókilderi eki eldiń prezıdenti qatysatyn sammıtke daıyndalyp jatyr.
AQSh prezıdentiniń Ýkraına boıynsha arnaıy ókili Kıt Kellog oǵan deıingi beıbit kelissózder ústelinde Eýropa qatyspaýy múmkin, biraq onyń múddeleri eskeriledi dep málimdedi. Al Donald Tramp Ýkraına kóshbasshysy Vladımır Zelenskıımen telefon arqyly sóıleskennen keıin ýkraın tarapy da kelissózderge qatysatynyn málimdegen edi. О́tken juma kúni Germanııada AQSh vıse-prezıdenti Djeı Dı Venspen kezdesken Ýkraına prezıdenti Vladımır Zelenskıı Ýkraına Saýd Arabııasynda kelissózder júrgizýge shaqyrylmaǵanyn jáne Kıev strategııalyq seriktestermen jaǵdaıdy talqylamaıynsha, Reseımen ózara baılanys ornatpaıtynyn aıtty.
Amerıkalyq «Axios» aqparattyq portalynyń málimeti boıynsha, AQSh delegasııasynyń quramynda memlekettik hatshy Marko Rýbıo, Aq úıdiń ulttyq qaýipsizdik jónindegi keńesshisi Maık Ýolts, Donald Tramptyń Taıaý Shyǵystaǵy arnaıy ókili Stıv Ýıtkoff bar. Al Reseı Federasııasy delegasııasynyń naqty quramy belgisiz. «Axios» habarlaýynsha, Er-Rııadqa Reseı SIM basshysy Sergeı Lavrov kelýi múmkin. Al «Bloomberg» agenttiginiń habarlaýynsha, Reseı prezıdentiniń kómekshisi Iýrıı Ýshakov pen Syrtqy barlaý qyzmetiniń basshysy Sergeı Naryshkın de bolady. Sonymen qatar kelissózderdi AQSh-ta bilim alyp, jumys istegen Reseıdiń jeke kapıtal qorynyń basshysy Kırıll Dmıtrıev qadaǵalaıdy.
Kıev tarapy Er-Rııadtaǵy kezdesýge shaqyrylmaǵan. Zelenskııdiń ózi 16 aqpanda keshke Birikken Arab Ámirlikterine resmı saparmen keldi. «FlightAware» portalynyń aqparatyna sáıkes, jeksenbide Ýkraına prezıdentiniń ushaǵy Mıýnhennen Polshanyń Jeshýv-Iаsenka áýejaıyna, sodan keıin Abý-Dabıge ushyp kelgen. Ári qaraı Er-Rııadqa taban tiregen.
«NBC» habarlaýynsha, Vashıngton qaqtyǵysty toqtatýǵa qatysty Máskeý jáne Kıevpen birdeı kelissóz júrgizedi. Alaıda aldymen jaǵdaıdy eki el ókilderimen jeke talqylap almaq, sodan keıin ǵana úshjaqty kelissózder júrgizýge bir ústel basyna jınalady. Osy sebepti Ýkraına delegasııasyn Saýd Arabııasyndaǵy Reseımen kelissózderge shaqyrmaǵan.
Jalpy, Tramptyń Pýtınmen telefon arqyly sóılesýi Reseı basshysynyń básin arttyra tústi deıdi sarapshylar. «Pýtınniń oqshaýlanǵan qoǵamy aıaqtaldy. Buǵan deıin ol áskerı qylmysker bolyp sanalyp keldi. Endi ol óziniń eń mańyzdy álemdik kóshbasshynyń teń quqyly seriktesi ekenin dáleldedi», degen pikirde polıaktyń «Rzeczpospolita» sholýshysy Rendjeı Beleskıı.
Al «New York Times» Tramp pen Pýtınniń áńgimesin Reseı prezıdentiniń «úlken jeńisi» dep atady. «Bul telefon qońyraýy Pýtınniń Ýkraına taǵdyryn anyqtap, basqa da mańyzdy máselelerdi Máskeý men Vashıngton sheshýi kerek degen oıǵa jeteledi», dep jazady baspasózdiń Máskeý bıýrosynyń basshysy Anton Troıanovskıı.