Astana qalasynda «Taldau Run» sporttyq júgirý jarysy ótti. Sporttyq is-sharaǵa Sarapshylar klýbynyń músheleri, Senat janyndaǵy «Taldaý mektebiniń» túlekteri jáne salamatty ómir saltyn dáriptep júrgen belsendi azamattar qatysty.
Senat tóraǵasy Máýlen Áshimbaev jarysqa qatysýshylarǵa iltıpat bildire kelip, Memleket basshysy Qazaqstanda sportty damytýǵa úlken kóńil bólip otyrǵanyn atap ótti. Sport – elimizde qolǵa alynǵan aýqymdy áleýmettik saıasattyń mańyzdy baǵyttarynyń biri. Sonyń aıasynda bul salany ilgeriletýge qajetti jaǵdaı jasaý úshin keshendi sharalar qabyldanyp jatyr.
«Prezıdent Qasym-Jomart Toqaev elimizde sportty damytýǵa árdaıym basa mán berip keledi. Memleket basshysynyń tapsyrmasymen bul baǵytta júıeli jumys atqarylyp jatyr. Qazaqstannyń barlyq óńirinde kásibı, buqaralyq jáne ınklıýzıvti sportty damytýǵa arnalǵan mańyzdy jobalar sátti júzege asyrylyp jatyr. «Taldaý mektebiniń» uıytqy bolýymen ótken is-shara sol saladaǵy bastamalarǵa qosylǵan aıtarlyqtaı úles ekeni sózsiz», dedi M.Áshimbaev.
Sonymen qatar Qytaıdyń Harbın qalasynda IH Qysqy Azııa oıyndary aıaqtalǵany, onda otandastarymyz jarqyn jeńisterge qol jetkizgeni sóz bolyp, buqaralyq sportty damytýdy kózdeıtin jobanyń osyndaı úlken sport merekesimen tuspa-tus kelýiniń rámizdik mánine nazar aýdaryldy. Osyǵan baılanysty Máýlen Áshimbaev aldaǵy ýaqytta «Taldau Run» júgirý jarysy «Taldaý mektebiniń» qatysýshylary úshin ıgi dástúrge jáne mańyzdy netvorkıngke aınalatynyna senim bildirdi.
Sondaı-aq spıker «Taldaý mektebiniń» tórtinshi kezeńiniń aıaqtalýyna nebári eki apta ýaqyt qalǵanyn tilge tıek etti. Sondyqtan ıdeıalardy birlesip talqylaý, usynystar men bastamalardy ázirleý úshin árbir kezdesýdi belsendi jáne sapaly paıdalanýdyń mańyzy zor. Aıta keteıik, «Taldaý mektebi» jobasy memlekettik basqarýda, áleýmettik jáne gýmanıtarlyq zertteýlerde, BAQ-ta analıtıkalyq tásilderdi kúsheıtýdi kózdeıdi.