Ádil sot ınvestısııa tartady

Keshe Joǵarǵy Sot Tóraǵasy Qaırat Mámıdiń tóraǵa­lyǵymen «Ádil sot júıesi jáne turaqty zańnama – jaǵymdy ınvestısııalyq ahýaldyń negizi» taqyrybynda atty dóńgelek ústel ótti. Atalǵan is-sharany elimizdiń Joǵarǵy Soty munaı-gaz salasynyń qazaqstandyq zańgerler qaýymdastyǵymen jáne KAZBAR kommersııalyq zańgerler alqasymen birlesip uıymdastyrdy. Jıynǵa Prezıdent ja­nyn­daǵy sheteldik ınvestorlar keńesiniń quramyna kiretin kom­panııalardyń ókilderi qatys­ty. Dóńgelek ústeldiń ashylý rásiminde  sóz alǵan Joǵar­ǵy Sot Tóraǵasy Qaırat Mámı atalǵan basqosýdyń baǵyt­taryn atap ótti. Sondaı-aq, ol: «Halyqaralyq saýda-eko­no­mı­kalyq baılanystardyń damýy, álemdik ekonomıkadaǵy ıntegrasııalyq úderister jańa kóz­qarastar men jańa tásilderdi talap etedi. Sot tóreligin tıimdi júrgizý máselelerine qatysty da jańa tásilder jetildirilýde», deı kele, qazaqstandyq sot júıesi osy jalpy álemdik úderisten tys qala almaıtyndyǵyn basa jetkizdi. Joǵarǵy Sot Tóraǵasynyń aıtýynsha, atalǵan dóńgelek ústeldi ótkizý ıdeıasy – ınves­tısııalardy qorǵaý turǵysynda zańnamany jáne sot júıesin jetildirý máselelerine  baılanys­ty týyn­daǵan. Kelesi kezekte sóz alǵan Pre­mer-Mınıstrdiń  orynbasary Berdibek Saparbaev jınal­ǵandarǵa alǵys aıta kele, Premer-Mınıstr Kárim Másimovtiń: «Elbasy Nursultan Nazarbaev  Qazaqstan sýdıalarynyń VI sezinde sóılegen sózinde: «HHI ǵasyrdaǵy ulttyń damýynyń mańyzdy ólshemi – minsiz jáne tıimdi ulttyq sot tóreligi júıesi. Táýelsiz jáne ádiletti sot – quqyqtyq memlekettiń negizi. Onsyz álemniń birde-bir elinde, tipti, eń damyǵan memleketterde qolaıly ınvestısııalyq ahýaldyń da, azamattar ál-aýqatynyń joǵary deńgeıiniń de, qoǵamnyń tabysty damýynyń da bolýy múmkin emes», degen bolatyn. Osyǵan oraı ádil de táýelsiz sot ınvestısııalaýǵa qolaıly orta jasaýda negiz bola alady. Búgingi tańda memlekette sot júıesin qalyptastyrý ba­ry­synda kóptegen oń ister atqa­rylýda», degen sózderin jetkizdi. Dóńgelek ústel otyrysyna qatysýshylar ınvestorlardyń quqyqtaryn qorǵaý, ın­ves­tı­sııalyq daýlardy sheshý, ınvestorlarǵa arnalǵan salyq artyqshylyqtary, ınvestısııalar jáne tórelik týraly zańnamany jetildirýdiń ózekti máselelerin talqyǵa saldy. Sol sııaqty elimizdiń Azamattyq prosestik kodeksiniń jańa redaksııasyndaǵy ınvestorlardyń qatysýymen daý­lardy qarastyrý jáne sheshý bóligindegi novellalary boıynsha syndarly pikir almasýlar boldy. Osylaısha, dóńgelek ústel jumysynyń qorytyndysy boıynsha tıisti usynymdar ázirlendi. Elmıra MÁTIBAEVA, «Egemen Qazaqstan».