Ulttyq ulan men Qarjylyq monıtorıng agenttigi qarjy pıramıdalarymen kúreste kúsh biriktirýge bekindi. Iаǵnı atalǵan qurylymdar birlesip, qarjy pıramıdalaryna qarsy is-qımyl jónindegi sharalardy kúsheıtýge baǵyttalǵan jańa joba týraly bastama kóterdi.
Joba áskerı qyzmetshilerdiń zańsyz shemalardyń qaterleri týraly habardar bolýyn arttyrýǵa jáne alaıaqtyq qurylymdardyń taralýyna jol bermeýge baǵyttalǵan. Bastama aıasynda Ulttyq ulan Bas qolbasshylyǵynda áskerı qyzmetshiler QMA Prevensııa basqarmasynyń basshysy Andreı Davydovpen jáne «AML Academy» akademııasynyń mamany Darhan Qusaıynovpen kezdesti. Olar qarjylyq pıramıdany qalaı taný kerektigin, qandaı ınvestısııalyq usynystardy muqııat tekserýdiń mańyzdylyǵyn, sondaı-aq árbir azamat kúdikti jobany «Baiqa, piramida» resmı Telegram-boty arqyly qalaı teksere alatynyn egjeı-tegjeıli aıtyp berdi. Mamandar sondaı-aq ǵalamtorda droptar týraly kúmándi vakansııalar kezdesetinin, olardyń artynda alaıaqtar bolýy múmkin ekenin eskertti jáne azamattardyń jeke derekteri men qarjylaryn urlaý úshin qoldanylatyn fıshıng jáne vıshıng shemalaryna toqtaldy.
– Ulttyq ulanmen birlesip, biz áskerı qyzmetshilerdiń qarjylyq saýatyn arttyrý jáne olardy yqtımal táýekelder týraly eskertý mindetin aldymyzǵa qoıyp otyrmyz. Aldaǵy ýaqytta osyndaı is-sharalardy tek Bas qolbasshylyq bazasynda ǵana emes, sondaı-aq óńirlik qolbasshylyqtarda da ótkizý josparda bar. Sonda áskerı qyzmetshiler barynsha qajetti bilim alyp, ózderin jáne jaqyndaryn alaıaqtyqtardan qorǵaı alady, – deıdi QMA Prevensııa basqarmasynyń basshysy Andreı Davydov.
Bastama kóterip otyrǵan taraptar osy baǵyttaǵy jumysty odan ári kúsheıtpek. QMA men Ulttyq ulan arasyndaǵy naqty nátıjege baǵyttalǵan kezdesýlerdi áskerdiń óńirlik qolbasshylyqtarynda da ótkizý josparlanyp otyr. Alaıaqtyqtardyń aldyn alý maqsatynda atalǵan kúreske áskerı tárbıeshiler de jumyldyrylady. Qos vedomstvo osylaısha, mańyzdy aqparattardyń árbir sarbazǵa jetýin kózdep otyr.
Ulandyqtar QMA-men aradaǵy yntymaqtastyq qarjylyq alaıaqtyqqa baılanysty qaterlerge den qoıýǵa, sondaı-aq áskerı qyzmetshilerdiń qarjylyq saýat deńgeıin arttyrýǵa múmkindik beretinin atap ótti. Sonymen qatar jobany iske qosý memlekettik organdardyń eldiń ekonomıkalyq turaqtylyǵy men qaýipsizdigin qamtamasyz etý baǵytyndaǵy mańyzdy qadam ekenin de aıtty.