Qazir elimizde Memleket basshysynyń tapsyrmasymen «Jaıly mektep» ulttyq jobasy iske asyp jatyr. Osy joba aıasynda Abaı oblysynda jyl sońyna deıin 2 700 oqýshyǵa arnalǵan tórt jańa mektep ashylady. Buǵan qosa, bıyl taǵy bir mekteptiń qurylysy bastalmaq.
Byltyr Semeı qalasynda 1 200 oryndyq IT-mektep-lıseıi salyndy. Bul shahardaǵy mekteptegi oqýshy orny tapshylyǵyn edáýir azaıtty. Jańa mektep zamanaýı tehnologııamen jabdyqtalǵan. Úsh qabatty ǵımaratta fızıka, hımııa, bıologııa, ınformatıka kabınetteri, mýltımedııalyq synyptar, grafıka jáne modeldeý kabıneti, sondaı-aq zerthanalar, telestýdııa, smart-synyptar, 3D-prınterler men robottehnıka kabınetteri jumys isteıdi. Sondaı-aq 280 oryndyq májilis zaly men 420 oryndyq ashana bar.
Jańa mektepte oqýshylardyń shyǵarmashylyq jáne ıntellektýaldyq qabiletin damytýǵa yqpal etetin orta qurýǵa da basa nazar aýdarylǵan. Erekshe bilim berý qajettiligi bar balalar úshin jeke sanıtarlyq bólmeleri bar keń kabınetter qarastyrylǵan. Jedelsatylar, pandýstar jáne arnaıy baǵyttaýshy belgiler ornatylǵan. Ár mektepte psıholog, logoped jáne defektologter qyzmet isteıdi. Bul bilim ordasynyń basty ereksheliginiń biri – jumsaq jıhazdarmen, kitaptarmen, mýzykalyq aspaptarmen jáne ústel oıyndarymen jabdyqtalǵan oqýshylar men oqytýshylar arnalǵan demalys orny bar. Sonymen qatar bilim mekemesinde balalardyń qaýipsizdigin qadaǵalaıtyn zamanaýı beınebaqylaý júıesi ornatylǵan.
«Buǵan deıin 4 bilim mekemesi kúrdeli jóndeýden ótip, robottehnıka, hımııa, bıologııa, fızıka jáne «STEM» baǵyttaǵy pánder boıynsha 56 zamanaýı pándik kabınet jabdyqtaldy. Pedagogterdiń biliktiligin arttyrý da mańyzdy qadam. Búgini kúni 5 300-den astam muǵalim tegin biliktilikti arttyrý kýrsynan ótti. Qazirgi tańda Abaı oblysynda orta bilim berý uıymdarynyń 38% aýdandyq jáne aýyldyq mektepti quraıdy. Olardyń 86-y jańǵyrtylǵan», dedi oblys ákiminiń orynbasary Jasulan Sársebaev.
Abaı oblysy