Jyl basynan beri múgedektigi bar adamdarǵa, asyraýshysynan aıyrylǵan otbasylarǵa memlekettik áleýmettik járdemaqy tóleýge respýblıkalyq bıýdjetten 53,2 mlrd teńge jumsalǵan. Osyǵan qosymsha Memlekettik áleýmettik saqtandyrý qorynan eńbekke qabilettiliginen aıyrylý, asyraýshysynan aıyrylý boıynsha shamamen 7,4 mlrd teńge somasyna áleýmettik tólemder tólengen.
Derekterge zer salsaq, múgedektigi boıynsha memlekettik áleýmettik járdemaqy alatyn azamattardyń sany – 541,7 myń, asyraýshysynan aıyrylǵanyna baılanysty kómek alatyndar – 193,3 myń adam. Munda múgedektigi boıynsha memlekettik áleýmettik járdemaqylardyń mólsheri múgedektik tobyna, sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady. Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine, eń tómen kúnkóris deńgeıine qaraı belgilenedi.
Budan bólek, mindetti áleýmettik saqtandyrý júıesine qatysýshylarda áleýmettik táýekelder týyndaǵan jaǵdaıda Memlekettik áleýmettik saqtandyrý qorynan áleýmettik tólemder tólenedi. 1 aqpandaǵy jaǵdaı boıynsha 86,1 myń adam eńbek etý qabiletinen aıyrylǵanyna baılanysty áleýmettik tólem alsa, 61,3 myńǵa jýyq otbasy asyraýshysynan aıyrylyp, áleýmettik tólem alǵan. Bul tólemderdiń mólsheri sońǵy eki jyldaǵy MÁSQ-ǵa áleýmettik aýdarymdar júrgizilgen ortasha aılyq tabysqa, eńbekke qabilettiliginen aıyrylý koeffısıentterine, asyraýyndaǵy adamdar sanyna, mindetti áleýmettik saqtandyrý júıesine qatysý ótiline, tabysty aýystyrýyna qaraı belgilendi. Tólemder respýblıkalyq bıýdjetten tólenetin uqsas járdemaqylarǵa qosymsha júredi.
Múgedektigi, asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qańtardan bastap eń tómen kúnkóris deńgeıiniń ulǵaıýyna baılanysty 6,5%-ǵa ósken. Eńbekke qabiletinen aıyrylý, asyraýshysynan aıyrylý boıynsha Memlekettik áleýmettik saqtandyrý qorynan tólenetin tólemderdiń mólsheri de 6,5%-ǵa artqan. Bıyl múgedektigi boıynsha memlekettik áleýmettik járdemaqy mólsheri 1-top úshin – 101 702 teńge, 2-top úshin – 81 362 teńge, 3-top úshin – 55 474 teńge bolyp belgilengen. 1 aqpandaǵy jaǵdaı boıynsha eńbekke qabiletinen aıyrylý boıynsha áleýmettik tólemderdiń ortasha mólsheri 71 245 teńge, asyraýshysynan aıyrylý boıynsha tólemder 72 214 teńgeniń shamasynda boldy.
Bıyl ataýly áleýmettik kómekke (AEK) bıýdjetten 132,9 mlrd teńge qarastyrylǵan. Aqpandaǵy derek boıynsha 31,9 myń otbasyndaǵy 169,1 myń adamǵa 2,3 mlrd teńge somasyna AÁK taǵaıyndalǵan. AÁK-tiń negizgi maqsaty – azamattardy aqshalaı tólemmen qoldaý ǵana emes, otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn jaǵdaıdan shyǵarý. Mysaly, AÁK sheńberinde tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndalady.Tabysy az otbasyndaǵy 1-6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem beriledi. 1 aqpanda AÁK alýshylar qatarynan mektep jasyna deıingi 52 myń balaǵa 305,1 mln teńge somasynda qosymsha tólem taǵaıyndaldy. AEK-tiń taǵy bir baǵyty – jumysqa ornalastyrý. Bul rette óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda), basqa da tásilder arqyly jumyspen qamtýǵa járdemdesý qarastyrylǵan.
Qazirde el azamattary AÁK taǵaıyndaýǵa ótinishti turǵylyqty jerindegi mansap ortalyǵynda, aýyl okrýginiń ákimine nemese elektrondyq úkimet portaly (egov.kz) arqyly bere alady. Qoryta kelgende, 1 qańtardan bastap eldegi kedeılik shegi óńirlik medıandyq tabystyń 35% deńgeıinde, biraq óńirlik eń tómen kúnkóris deńgeıinen 70%-dan tómen emes deńgeıde aıqyndaldy.