Qostanaı oblysynda 2014 jyly bastalǵan «Serpin» baǵdarlamasy pandemııadan keıin toqtap qalyp edi. Bilim basqarmasynyń baspasóz qyzmeti atalǵan jobanyń bıyl qaıta bastalyp jatqanyn málimdedi, dep habarlaıdy Egemen.kz.
Qazir Qostanaı kolledjderiniń úgit-nasıhat brıgadalary jastarǵa kásiptik baǵdar berý, soltústikke oqýǵa shaqyrý maqsatymen elimizdiń ońtústik óńirlerin aralap júr.
«Ekinshi aı qatarynan Almaty, Jambyl, Túrkistan, Qyzylorda jáne Jetisý oblystarynda kásiptik baǵdar berý jumystary júrgizilip jatyr. 20-24 qańtar aralyǵynda quramynda kolledj dırektorlary men muǵalim mamandar bar úgit-nasıhat brıgadalary jumysynyń birinshi tolqyny ótti. Olar jumys tapshylyǵy bar óńirlerdi aralyp, 87 mektepte bilim alyp jatqan 7 myńnan astam oqýshymen kezdesip qaıtty. 24 aqpanda kásiptik baǵdar berý toptary ekinshi saparǵa attandy. Olar bes kún ishinde Qyzylorda oblysy Qarmaqshy aýdanyna qarasty 23 mektepke, Almaty oblysy Uzynaǵash aýdanynyń 19 mektebine, Qarasaı aýdanynyń 21 mektebine, Túrkistan oblysy Báıdibek aýdanynyń, Jetisý oblysy Aqsý, Sarqan, Alakól aýdandarynyń mektepterine, Jambyl oblysy Jambyl, Merki, Talas, Jýaly aýdandaryndaǵy bilim oshaqtaryna barýdy josparlap otyr», deıdi oblystyq bilim basqarmasynyń baspasóz hatshysy Anna Lazareva.
2014 jyldan 2021 jylǵa deıin Qostanaı oblysyndaǵy 10 kolledjde Almaty, Ońtústik Qazaqstan, Jambyl, Qyzylorda, Mańǵystaý oblystarynan uzyn sany 337 serpindik jas kásibı bilim alyp shyqqan.