Bıyl Aqtaý qalasy – túrki áleminiń mádenı astanasy bolyp tanylǵaly aldaǵy is-sharalarǵa daıyndyq jumystary qyzý júrip jatyr. Osy oraıda, Aqtaý qalasy ákimdiginiń qoldaýymen «Aqtaý – Túrki áleminiń mádenı astanasy-2025» jobasy aıasynda qalalyq Abaı atyndaǵy mádenıet saraıyna 2 avtobýs pen 1 «Gazel» avtokóligi tabystaldy.
Uzyn sany 39 shyǵarmashylyq ujymy bar mádenıet úıi gastroldik saparlarǵa jıi shyǵatyny belgili. Sondaı-aq aýqymdy shara kezinde ártisterdi tasý úshin kólikterdiń qajet ekeni anyq. Jańa avtobýs ártisterdiń alys-jaqyn jol júrýleri úshin qolaıly bolsa, sol sııaqty kostıýmderin, rekvızıtterin, dekorasııalaryn tasymaldaýdy aıtarlyqtaı jeńildetedi. Mańǵystaý oblysy jáne Aqtaý qalasy ákimderiniń qoldaýymen Túrki áleminiń mádenı astanasy sheńberinde mádenı oshaqqa 47 orynǵa arnalǵan «Daewoo» markaly qos zamanaýı avtobýs pen «Gazel» avtokóligi berilgeni – ujym jumysyna serpin syılary sózsiz.
– Bizde búgin úlken mereke. О́ıtkeni oblys jáne qala ákimdigi 2 birdeı avtobýs pen «Gazel» syılady. Bul – bizder úshin úlken kómek, – dedi Qazaqstannyń halyq ártisi Gúljan Talpaqova.
Abaı atyndaǵy mádenıet saraıynyń ujymy zamanaýı úlgidegi avtobýstarǵa alǵash ret qol jetkizip otyr. О́ner ıeleri mundaı tosyn syıǵa tańdanysyn jasyrmady. «Bıyl Aqtaý Túrki áleminiń astanasy bolyp belgilendi. Qalanyń mártebesi óskeni áýeli mádenı oshaqtan bastalǵany da qýanysh syılap otyr», dedi mádenıet saraıynyń kórkemdik jetekshisi Qudaıbergen Ahmetov.
Mańǵystaý oblysy