Bilim berý ınfraqurylymyn qoldaý qory esebinen salynatyn 28 jańa mektep – 22 myń oqýshy ornyna arnalǵan, dep habarlaıdy Egemen.kz.
Memleket basshysynyń tapsyrmasy boıynsha qurylǵan Qor jemqorlardan tárkilengen qarajat esebinen tolyqtyrylyp keledi, negizgi maqsaty bilim berý uıymdary úshin jańa ǵımarattar salý, keńeıtý arqyly apatty mektepterdi jáne oryn tapshylyǵyn joıý.
«Memleket balalar úshin qolaıly jaǵdaı jasaýǵa erekshe kóńil bólip keledi. Búginde 74,4 myń oryndyq 61 mektep paıdalanýǵa berildi, onyń 29-y aýyldyq eldi mekenderde ornalasqan», dep atap ótti Infraqurylymdy damytý departamentiniń basqarma basshysy Jaıyq Mahsýtov.
Sala mınıstrliginiń baspasóz qyzmetiniń málimetinshe bilim berý ınfraqurylymyn qoldaý qorynyń esebinen 100 myńǵa jýyq oqýshy ornyna arnalǵan 89 mekteptiń qurylysy qarjylandyrylǵan.
2024 jyly zamanaýı qural-jabdyqtarmen jabdyqtalǵan 25 mektep salynǵan, basym bóligi Astana qalasynda jáne Mańǵystaý, Almaty, Jambyl oblystarynda ornalasqan.