Ult ádebıeti men mádenıeti qara jamyldy. Qazirgi ádebıetimizdiń alyp báıteregi, jazýshy-dramatýrg, Memlekettik syılyqtyń ıegeri, Qazaqstannyń Eńbek eri, Halyq jazýshysy Dýlat Isabekov baqıǵa ozdy.
Sonaý soǵys jyldarynda týǵan qabyrǵaly qalamgerdiń esimi elge erte tanyldy. Qolyna qalam ustap, ult ómiriniń kórkem sýretinen turatyn alǵashqy áńgimelerimen-aq aǵa býyndy eleń etkizgen klassık jazýshy qalyń eli qýansa – birge qýandy, qaıǵyrsa – qaıǵysyn bólisti. Tuńǵysh jarııalanǵan «Jolda», «Shoıynqulaq» áńgimelerinen bastap qalamynan týǵan qadaý-qadaý týyndylary oqyrman oljasyna aınalǵany ámbege aıan. «Gaýhartasy» men «Dermenesi», «Tirshiligi», «Qarǵyny» men «О́kpek jolaýshysynyń» qaı-qaısysy bolsyn oqyrman súıip oqyǵan, halyqtyń rızashylyǵyna bólengen biregeı shyǵarmalar.
Birneshe hıkaıalary negizinde kórkem fılm túsirilip, el arasyna keń taralǵany da jurttyń ystyq yqylasynan bolsa kerek.
Asqar taýǵa bergisiz órlik, kisi balasy kórmeýge tıis qorlyq, ómir boıyna, ǵumyr nuryna jetetin izgilik pen saǵynysh adam túgili aıýanǵa tilemeıtin qatygezdik jáne zulymdyqpen keskilesken shyǵarmalary oqyrmannyń rýhanı qubylasyna aınalǵanyn ańdaý qıyn emes. Sondyqtan bolar, qazaq dramatýrgııasyn álem elderiniń sahnasyna shyǵaryp, keńinen tanytqan Isabekov pesalary qoıylmaǵan el az búginde. Adam janyna tereń úńiletin shıelenisti shyǵarmalary arqyly qazaq dramatýrgııasyn jańa deńgeıge kótergen qalamgerdiń qazasy – ult rýhanııatyndaǵy orny tolmas ókinish.
Arysyn joqtap, aqtyq saparǵa shyǵaryp salǵan eldiń qaıǵy-qasiretinen Alataýdyń keýdesi qars aıyrylyp, qaraly jurt kúńirenip ketti. Marqumdy Alla panasyna alyp, aldynan jarylqasyn!
«Egemen Qazaqstan» qalamgerleri