Soltústik Qazaqstan oblysy Qyzyljar aýdanyndaǵy «Qulager» ıppodromynda Qazaqstan Respýblıkasynyń qusbegilek ónerden kezekti chempıonaty aıaqtaldy. Eki kúnge sozylǵan saıatshylardyń saıysyna Astana men Almaty qalalarynan jáne 12 oblystan iriktelgen úzdik qusbegiler 62 búrkit, 29 qarshyǵa jáne 17 ıtelgisin ákelip qatysty.
Jarystyń alǵashqy kúni búrkit qustarynyń básekesimen bastaldy. Qusbegiler búrkitti qolǵa shaqyrý, shyrǵaǵa salý kezeńderinde óz sheberlikterin kórsetti. Jarys qorytyndysy boıynsha úzdik shyqqan 18 qusbegi aqtyq márege joldama aldy.
Saıystyń ekinshi kúni qarshyǵa men ıtelgilerdiń synǵa túsýimen jalǵasty. Bul jarystarda da qustardyń alǵyrlyǵy, ushýǵa daıyndyǵy, ań men qusty alý qabileti jáne qusbeginiń baptaý sheberligi sarapqa salyndy.
Chempıonat qorytyndysyna sáıkes búrkit qusy sanatynda bas júldeni Aqmola oblysynyń ókili Erlan Kenjetaev jeńip aldy. Ekinshi oryndy Abaı oblysynyń ókili Erzat Baıqadamov enshiledi. Júldeli úshinshi oryn Aqmola oblysynyń taǵy bir ókili Rýslan Týmyrzınge buıyrdy.
Qarshyǵanyń alǵyrlyǵy men eptiligi synalǵan jarysta birinshi oryndy Túrkistan oblysynyń ókili Arshabaı Dáýren aldy. Odan keıingi oryndardy jambyldyq Serikbolsyn Jalǵasuly jáne taǵy bir túrkistandyq Zákı Mahmuthan qanjyǵalaryna bókterdi.
«Iegi ıtelginiń tamaǵyndaı» dep sulý qyzdyń ıegin sýrettegende qoldanylatyn shaǵyn turyqty ıtelgilerdiń saıysynda qaraǵandylyq Tańat Ospanqulovtyń qusy aldyna jan salmady. Ekinshi oryndy pavlodarlyq Ermek Imanzaıyp jáne júldeli úshinshi oryndy Almaty qalasynyń ókili Sultanseri Esentaevtyń qustary ıelendi.
Chempıonat kúnderinde Qyzyljar óńiriniń aspany jarqyrap, naǵyz «qar appaq, túlki qyzyl, búrkit qara» dep sypattalatyn qansonardaǵy ásem sýret turdy. Bul qusbegiler men kórermenderdiń de delebesin qozdyryp, qyzýlyqtaryn arttyrdy. «Eshkimge zııany joq ózim kórgen Bir qyzyq isim eken sum jalǵanda» dep uly Abaı aıtqandaı ultymyzdyń keremet óneriniń biri halyqqa rýhanı lázzat syılady.
Chempıonatty ótkizýge Respýblıkalyq Qusbegilik federasııasynyń bas seriktesi – «Samuryq Qazyna» UÁQ» AQ, sondaı-aq, Týrızm jáne sport mınıstrligi, Soltústik Qazaqstan oblysynyń ákimdigi, «Týrızm ındýstrııasy men sportty qoldaý qory» KQ jáne QR Ulttyq sport qaýymdastyǵy demeýshilik jasaǵany belgili boldy.