Este qalarlyqtaı erekshe konsert

Kórermenderdiń zor yqylasyna ıe bolǵan «Altyn besik – týǵan el!» konserti osymen óńirimizde ekinshi ret ótkizilip otyr. Isa Baızaqov atyndaǵy oblystyq fılarmonııa uıytqy bolǵan rýhanı is-sharada birqatar ánder orkestrdiń súıemeldeýimen oryndalyp, ansamblder men jeke oryndaýshylar kóńil ­hoshyn ashatyn shyǵarmalarmen qulaq quryshyn qandyrdy.

Joba avtory, Rústembek Omarov atyndaǵy qazaq ult aspaptar or­kestriniń kórkemdik jetekshisi Talǵat Kárimov Arqa dalasyndaǵy án oryndaý­shylyq óneri osyndaı konsertter arqyly jalǵasyp, jańǵyryp otyratynyn aıtady.

– Keshegi Jarylǵapberdi, Jaıaý Musa, Isa, Estaı, Maıra, Imanjúsip sııaqty halyq kompozıtorlary án-jyrǵa bólegen Ertis–Baıan óńirinde búginde ulttyq kolorıtimiz – dástúrli ánshilik óz deńgeıinde saqtalyp otyr. Qanshama jas­tarymyz el jadynan óship bara jatqan kóne shyǵarmalardy qaıta jańǵyrtty. Endi biri zamanǵa saı laıyqtap, keıbir ánderge ekinshi ómir syılady. «Altyn besik – týǵan el!» jobasynyń maqsaty – el ishindegi talanttarymyzdy úlken sahnaǵa jeteleý, jergilikti kompozıtorlardyń ánderin nasıhattaý. Baıanaýyldaǵy «Beý, jigitter» halyq ansambliniń oryndaýynda uzaq jyldar oryndalyp kele jatqan Aman Baıazıtovtiń «Baıanym», marqum kompozıtor Qaıyrbek Sátıev­tiń «Aqmaral» ánderi búgin orkestrmen oryndalyp, jurt jyly qabyldaǵanyn kózimiz shaldy. Biz úshin bıyl jas kúıshi Uǵybaıdolla Múftánniń «Alash amanaty», belgili kúıshi, Mádenıet salasynyń úzdigi Serik Syzdyqovtyń «Terisqaqpa tol­ǵaýy», «Turar Aqjeleń» kúıleri erek­she jańalyq bolyp otyr. U.Múf­tánniń atalǵan týyndysyn bizdiń orkestr byltyrǵy Dombyra kúninde Ertis jaǵalaýynda ornalasqan «Ertis Pro­menade» sahnasynda oryndap, kórer­mender zor qoshemetpen qabyldaǵan edi, – deıdi Qazaqstannyń eńbek sińirgen mádenıet qaıratkeri Talǵat Kárimov.

Bıyl «Beý, jigitter» ansambliniń qurylǵanyna 40 jyl tolyp otyr. Halyq ansambliniń músheleri osy jyl­dar ishinde úsh márte aýysqan. 1986 jyly Baıanaýyl aýdanyndaǵy mádenıet úıiniń janynan úgit-nası­hat brıgadasy retinde qurylǵan óner ujymynyń alǵashqy jetekshisi – Júrsinbaı Muqaev edi. Kileń jigit­terden quralǵan ansambl 1991 jyly Qabardın – Balqar elinde ótken dúnıe­júzilik túrkitildes festıvalinde jáne 1993 jyly Daǵystanda ótken «Radıga» festıvalinde óner kórsetip, laýreat atanady. Odan beri de kóptegen respýblıkalyq jáne halyqaralyq konsertter men keshterge qatysyp, Arqa dalasynyń ónerin pash etti. Jýyqta Almaty qalasynda ótken respýblıkalyq «Samǵaý» baıqaýynda dástúrli án atalymy boıynsha júldeli orynǵa ıe boldy.

– Tuńǵysh ret orkestrdiń súıemel­deýimen úlken sahnada án oryndadyq. Isa Baızaqov atyndaǵy oblystyq fılarmonııa ujymy bizge osyndaı múm­kindik syılaǵanyna rızamyz. Bıyl jeltoqsan aıynda ansambli­mizdiń qurylǵanyna 40 jyl tolǵaly otyr. Soǵan oraı birneshe ándi reper­týarymyzǵa qospaq oıymyz bar. Mysa­ly, sózin áıgili Muza­­far Álimbaev jaz­ǵan «Maraldym» ánin, Nurǵısa Tilen­dıevtiń «Baıanaýyl valsin» ózgeshe mánerde, jańasha yrǵaqta jazyp jatyrmyz. Jyl so­ńynda Pavlo­dar jáne Qaraǵandy ob­lys­­tarynyń aýdan-qala­laryn aralap, kon­sert berý oıy­myzda tur, – dep jos­parlarymen bólisti «Beý, jigitterdiń» oryn­­­daý­shysy Jandos Adamov.

Talǵat Kárimov atap ótkendeı, dás­túrge aınalyp kele jatqan bıylǵy konsert Jaıaý Musanyń – 190, Abaıdyń – 180, Maıranyń – 135, sondaı-aq Isa Baızaqovtyń 125 jyldyǵyna arnaldy. Aldaǵy ýaqyt­ta jergilikti avtorlardyń án-jyry taspaǵa túsirilip, saz jınaǵyn shyǵarý oıda bar. Al odan soń mundaı rýhanı keshterdi ózge aýdan-qalalarda uıym­dastyrý kózdelip otyr.

Konserttik keshte jergilikti kom­pozıtorlardyń 20-dan astam án-kúıi oryndaldy. Keshte R.Omarov atyndaǵy qazaq ult aspaptar orkestrinen bólek, «Shernııaz» bı ansambli, kameralyq hor, «Samiyan» vokaldyq toby, «Retro» vokaldyq ansambli, fılarmonııanyń jeke oryndaýshylary, ánshiler Erbo­lat Bortybaı, Arman Raı, Altyngúl Baqythan, Esim Beıbithan, «RUH» etno-mıks ansambli, Dáýrenbek Slámǵalı, Shyńǵys Asyǵatuly, taǵy basqalary óner kórsetti.

Pavlodar oblysy