Byltyr 600-den asa almatylyq oqýshy halyqaralyq olımpıadalarda jeńiske jetken. Almaty qalasynyń óńirlik kommýnıkasııalar qyzmetinde ótken baspasóz máslıhatynda «Daryn» ortalyǵynyń dırektory Gúlnur Kárimǵajy qala oqýshylarynyń jetistikterimen bólisti.
Byltyr ortalyq tarapynan 200-den asa zııatkerlik olımpıada men baıqaýlar uıymdastyrylyp, oǵan 250 myńnan astam oqýshy qatysqan. 30-dan asa halyqaralyq olımpıada men baıqaýǵa qatysqan 894 oqýshynyń 604-i jeńimpaz bolǵan.
Búginde qala oqýshylarynyń halyqaralyq olımpıadalardaǵy jetistigin erekshe atap ótýge bolady. Byltyr el quramasy sapynda Almatydan 4 oqýshy óner kórsetip, kúmis medal ıelendi. Al respýblıkalyq jarystarda qala komandasy 63 medaldy enshilep, «Úzdik olımpıadalyq komanda – 2024» ataǵyn jeńip aldy.
Búginde almatylyq oqýshylar halyqaralyq olımpıadalarda ǵana emes, robottehnıka salasynda da joǵary jetistikterge jetip júr. Byltyr qala komandasy AQSh-tyń Dallas qalasynda ótken chempıonatta úzdik ondyqqa endi. Olar aldaǵy jyldarda Jeneva, Sıngapýr jáne Afınada úsh márte álem chempıony atanǵan.
№140 gımnazııa-mektebiniń «Uly Dala» múshesi Aıǵanym Shamshadın robottehnıkadaǵy komandanyń alǵashqy jeńisi 2022 jyly «First Lego League» týrnırinen bastalǵanyn aıtty. Keıinnen «First Tech Challenge» deńgeıine ótken komanda ár jarysqa tabandylyqpen daıyndalyp, qadamdardy, baǵdarlamalardy turaqty jetildirip otyratynyn atap ótti.
«Sana Team» kapıtany Smaıl Daryn eki jyldan asa ýaqytta robottehnıkanyń álippesin tereń meńgerip, nátıjesinde, Aýstralııa, Kıpr, Úndistan jáne Qyrǵyzstanda elimizdiń namysyn qorǵap, komandanyń joǵary marapattarǵa ıe bolǵanyn jetkizdi. Qazir komanda Hıýstonda ótetin álemdik jarysqa daıyndalyp jatyr.
ALMATY