О́ńirdegi birneshe aýdanda jasyl energııaǵa kóshý baǵytynda aýqymdy jobalar atqarylyp jatyr. Investorlardy tartý men memlekettik deńgeıdegi qoldaýdyń arqasynda qazir oblysta jalpy qýaty 571,3 MVt-ny quraıtyn 22 JEK nysany jumys istep tur.
«Bastapqyda jalpy qýaty 2 MVt quraıtyn 2 JEK nysany paıdalanýǵa berilse, ýaqyt óte kele bul kórsetkish aıtarlyqtaı eselendi. 2015 jyly jalpy qýaty 114 MVt quraıtyn nysan sany 9, al 2021 jyly jalpy qýaty 387,8 MVt quraıtyn nysan sany 17-ge jetkizildi. 2024 jyly stansalardyń sany 22-ge jetip, energetıkalyq qýat 571,3 MVt boldy», deıdi oblystyq Energetıka jáne turǵyn úı-kommýnaldyq sharýashylyq basqarmasynyń basshysy Ǵalym Isaqov.
Resmı málimetke súıensek, el boıynsha 150-ge jýyq jańartylǵan energııa kózderin óndiretin nysan bar bolsa, onyń 22-si Jambyl óńirinde ornalasqan. Ýaqyt suranysy qaı kezde de nazardan tys qalǵan emes. Naqtyraq aıtsaq, jumysyn erte bastaǵan «Burnoe Solar-1», «Burnoe Solar-2» stansalarynyń jumysy bir júıege túsken. Jaýapty basqarma ókilderi keltirgen derekke sensek, kúnnen elektr energııasyn óndiretin bul nysandar Ortalyq Azııadaǵy iri stansalar sanatyna jatady.
«О́ńirde jumys istep turǵan 22 JEK nysanynyń 6-ýy sý elektr stansasy bolsa, 10 nysan jelden, qalǵan 6 nysan kúnnen elektr energııasyn óndiredi. Oblys aýmaǵyndaǵy jel elektr stansalarynan – 275,65 MVt, kún elektr stansalarynan – 271,25 MVt, sý elektr stansalarynan 24,4 MVt energııa óndirilip jatyr», deıdi basqarma basshysy.
Aldaǵy jyly Jambyl oblysynda «Masdar» kompanııasynyń uıytqy bolýymen jalpy qýaty 1 GVt-ny quraıtyn jel elektr stansasynyń qurylysy bastalýǵa tıis. Jyl basynda kompanııa ókilderimen kezdesken óńir basshysy Erbol Qarashókeev jobany júzege asyrý boıynsha jergilikti atqarýshy bılik tarapynan jan-jaqty qoldaý kórsetiletinin aıtqan bolatyn.
Jaqynda Abý-Dabıge jumys saparymen barǵan Memleket basshysy Qasym-Jomart Toqaev «Masdar» kompanııasy men Qazaqstan arasyndaǵy seriktestik jańa deńgeıge kóterilgenin aıtyp ótken edi. Sondaı-aq Prezıdent kompanııa ókilderimen Jambyl oblysynda jalpy qýaty 1 GVt quraıtyn jel elektr stansasynyń qurylysyn júzege asyrýǵa qatysty kelisim jasalǵanyn da málimdedi. Bul iri jobaǵa 1,4 mlrd dollar kóleminde ınvestısııa salynbaq.
Joǵaryda aıtylǵan jel elektr stansasy salynǵan jaǵdaıda Jambyl oblysy jańartylǵan energııa kózderin óndirý boıynsha lokomotıv óńirge aınalmaq. 2024 jyldyń alǵashqy 10 aıynyń ózinde JEK nysandarynan saǵatyna 588,4 mln KVt elektr energııasy óndirilgen. Jaýapty basqarma basshylyǵy keltirgen derekke zer salsaq, 2021 jyly salynǵan «Jańatas» jel elektr stansasynyń da jumysy bir arnaǵa túsken. Jalpy quny 49 mlrd teńgeni quraıtyn nysannyń jyldyq óndiris qýaty – 100 MVt. Sonymen qatar Jambyl aýdany aýmaǵynda jyldyq qýaty 50 MVt bolatyn «AEC ASA» kún elektr stansasy, Talas aýdanynda jalpy qýaty 13,5 MVt bolatyn «Sheńgeldi», «Sheńgeldi-2», «Novateks JES» jel elektr stansasy jobasy júzege asyryldy.
Jambyl oblysy