Májilis depýtaty Magerram Magerramov bastaǵan birqatar azamat elimizde jynys aýystyrýǵa zańmen tyıym salýdy usyndy, dep habarlaıdy Egemen.kz.
«Halyq densaýlyǵy jáne densaýlyq saqtaý júıesi týraly kodekske sáıkes 21 jasqa tolǵan, psıhıkalyq minez-qulqynda aqaýy joq jandardyń jynysyn aýystyrýǵa quqyǵy bar. Alaıda, «jynystyq sáıkestendirý buzylysy bar adam» uǵymynyń ózi qandaı da bir buzýshylyqtyń baryn kózdep otyr. Bul adamdarda fızıkalyq aýytqýlar bolmaǵandyqtan, buzylys psıhıkasynda nemese minez-qulqynda dep boljaýǵa bolady. Tıisinshe, psıhıkalyq nemese minez-qulyq aspektileri buzylǵan adamnyń saý denesine gormonaldy jáne hırýrgııalyq ota jasaýdy aqtaýǵa bolmaıdy, - dedi Magerram Magerramov Úkimet basshysy Oljas Bektenovtiń atyna depýtattyq saýal joldaı otyryp.
Osy oraıda M.Magerramov Úkimet basshysynan kelesi saýaldarǵa jaýap berýin surady:
1. Eger siz er adamnan áıeldi, al áıelden er adamdy hırýrgııalyq túzetý arqyly jynysyn aýystyrýǵa jol berseńiz, «Deni saý ult» ulttyq jobasyn qalaı júzege asyryp otyrsyz?
2. Minez-qulqynda, psıhıkasynda buzylýlar bar jandar nelikten hırýrgııalyq jolmen emdeledi?
3. Jynysty aýystyrýǵa qansha ota jasaldy? Olardyń ishinde qansha adam jynysyn keri qaıtarýǵa nıet tanytty?
4. Búginde qansha adam jynysyn aýystyrýǵa ótinish berdi?
5. Mundaı manıpýlıasııalar negizgi medısınalyq prınsıpter men ult densaýlyǵyna keri áser etpeı me?
«QKP fraksııasy jynysyn aýystyrýǵa ruqsat berý bóliginde zańnama ózgergenge deıin osy manıpýlıasııaǵa tyıym salýdy talap etedi», dedi Májilis depýtaty.
Esterińizge sala keteıik, budan bir aı buryn Májilis depýtaty Edil Jańbyrshın de osy máseleni kótergen bolatyn. AQSh prezıdentiniń ózi jynysyn ózgertkenderdi zańmen qýdalaýǵa qol qoıǵanyn eskerte kelip, onyń «Dıadıa Donaldtan jalyndy sálem!» degen sózi áleýmettik jelide keń taralyp ketken edi.