Bıyl 7 mamyrda elimizde Jeńistiń 80 jyldyǵyna, sondaı-aq Otan qorǵaýshy kúnine oraı áskerı sherý ótedi. Oǵan ózge de kúshtik qurylymdarmen qatar Ulttyq ulannyń 400-den asa áskerı qyzmetshisi qatyspaq. Búginde ulandyqtar jaýapty sátke qyzý daıyndyqqa kirisip ketti.
Jeńis sherýi ádettegishe áskerı quramdardyń sappen júrýi, áskerı tehnıkanyń kórsetilimi jáne avıasııanyń áýede ushyp ótýi sekildi úsh kezeńnen turmaq. Ulttyq ulan qatarynan áskerı qyzmetshilerdiń eki kolonnasy sap túzep ótedi dep josparlanyp otyr. Onyń birin kún saıyn elimizdiń qalalarynda qoǵamdyq tártip pen qaýipsizdikti qamtamasyz etetin patrýldik-bekettik qyzmettiń áskerı qyzmetshileri, al ekinshi kolonnany arnaıy maqsattaǵy «Búrkit» bólimshesiniń áskerı qyzmetshileri quraıdy. Bul bólimshe jýyrda «UAE SWAT Challenge» halyqaralyq jarysynda úzdik ondyqqa engenin aıta keteıik.
Sonymen qatar sherýge úlgili-kórsetilimdik orkestr men is-sharany uıymdastyrýǵa jaýapty áskerı qyzmetshiler de qatyspaq. Olardyń qatarynda júrgizýshiler, tehnıka jetekshileri, medısınalyq qamtamasyz etý mamandary men ekıpaj músheleri bar.
Jaıaý áskerden bólek, Ulttyq ulannyń 17 áskerı tehnıkasy sherýge qatysady. Olardyń ishinde «Barys» 6h6 jáne «Cobra II» kólikteri bar. Bul brondy mashınalar kepilge alynǵandardy bosatý, mańyzdy nysandar men kólik kolonnalaryn qorǵaý boıynsha tapsyrmalardy oryndaýǵa arnalǵan. Al «Ýral VV» jáne «Alan-2» tehnıkalary kúzetiletin nysandarǵa shabýyl jasalǵan jaǵdaıda qoldaý kórsetý men qorǵanysty kúsheıtý úshin qoldanylady. Bul tehnıkalardyń sherýdegi kórsetilimi Ulttyq ulannyń el azamattary men ulttyq múddelerdi qorǵaýǵa daıyndyǵyn aıqyn dáleldeıdi.
Bıylǵy sherýdiń burynǵylardan ereksheligi – sap túzegen kolonnalar soǵys jyldaryndaǵy kıim úlgisinde bolady jáne alǵash ret elimizdiń aýmaǵynda qurylǵan áskerı bólimderdiń jaýyngerlik týlaryn saltanatty jaǵdaıda alyp ótedi. Bul – eldiń batyrlyq tarıhyna qurmet kórsetip, birligin aıshyqtaıtyn mańyzdy is-shara bolmaq. Sherýge jalpy sany 4,5 myń adam qatysady dep kútilip otyr. Sondaı-aq qarý-jaraq pen áskerı tehnıka kórmesi uıymdastyrylady. El tarıhyndaǵy mańyzdy kún Qarýly kúshterimizdiń de kez kelgen jaýdyń betin toıtarýǵa saqadaı saı daıyn ekenin áıgilemek.