Oblystyq tarıhı ólketaný mýzeıiniń qorynda yqylym zamannan syr shertetin baıyrǵy jádigerlermen qatar, tanymal tulǵalardan qalǵan túrli buıymdar da barshylyq. Mýzeıge kelýshiler jergilikti azamattar tapsyrǵan tarıhı qundylyqtarmen birge esimi elge eleýli azamattardyń buıymdaryn da qyzyǵa tamashalaıdy.
IýNESKO deńgeıinde moıyndalǵan áıgili ánshi-kompozıtor Anna Germandy burynǵy Jambyl qalasynan bólip qaraýǵa bolmaıdy. Álem bas ıgen án perishtesiniń ózi baıyrǵy Jambyl shaharyn «meniń qalam, men osynda mektep tabaldyryǵyn attaǵanmyn» dep ataǵany esimizde. Taǵdyrdyń jazýymen bala kúniniń birneshe jylyn Jambyl qalasynda ótkizgen ánshiniń kóne shaharǵa degen qurmeti bólek bolǵan.
Oblystyq tarıhı-ólketaný mýzeıinde áıgili ánshiniń birneshe buıymy saqtalǵan. Solardyń biri – tarazdyq Zeıtýna Skrıpachenkoǵa Anna German syıǵa tartqan monshaq. Monshaqty Zeıtýnanyń qyzy Galıma on jyldan astam ýaqyt buryn mýzeıge tapsyrypty.
«Bul monshaqty Anna German 1979 jylǵy óner saparynda meıramhanadaǵy jas jumysshyǵa syılapty. Tipti ol kisini áıgili ánshi polıak tilinde «Zosıa» dep ataǵan kórinedi. Zeıtýna bul buıymdy uzaq jyl boıy óz otbasynda saqtapty. 2013 jyly onyń qyzy Galıma qundy buıymdy mýzeı qoryna tabystady. Osylaısha, bizdiń mýzeıdegi qundylyqtar qatary áıgili ánshiniń monshaǵymen tolyqty», deıdi oblystyq tarıhı-ólketaný mýzeıiniń qyzmetkeri Laýra Baıtursynova.
Jalpy, oblystyq tarıhı-ólketaný mýzeıiniń qorynda ataqty ánshiniń buıymdarynan jasaqtalǵan arnaıy vıtrına bar. Mýzeıge kelýshiler tarıhı jádigerlerden bólek, taǵdyrdyń jazýymen birneshe jyl Jambyl qalasynda turǵan áıgili ánshiniń buıymdaryn da asa qyzyǵýshylyqpen tamashalaıdy.
Taraz