Taraz qalasyndaǵy «Qazaq halqyna myń alǵys» monýmenti 2020 jyly ashyldy. Bıiktigi 30 metrdi quraıtyn nysan alystan menmundalaıdy.
Qalanyń kórnekti jerinde ornalasqan monýmenttiń qurylysyn «Temir-Baılyq» JShS júrgizgen. Nysannyń qurylys jumysyna 158 mln teńge shamasynda qarajat jumsalǵan. Al monýmenttiń arhıtektýralyq sheshimin sol kezdegi oblys ákimi Berdibek Saparbaev tikeleı ózi qadaǵalaǵan.
Tuǵyrly eskertkish «Arbat-1» alleıasymen qatar ashyldy. Kóne shahardyń jańa kelbetin kórýge kelgen týrıster de «Kóne Taraz» tarıhı etnomádenı kesheni boıymen júrip, «Arbat-1» alleıasyna baryp aıaq sýytady.
5 jyl buryn boı kótergen nysan mańynda adam qarasy úzilmeıdi. Túrli is-sharalar jıi uıymdastyrylady. Sondaı-aq 1 naýryz Alǵys aıtý kúninde qazaq halqyna shynaıy rızashylyǵyn bildirgisi kelgen 90-ǵa jýyq etnos ókilderi osynda arnaıy kelip, gúl shoqtaryn qoıyp, taǵzym etip jatady. Olardyń júzinen, qıyn-qystaý kezeńde tamyrlastyǵyn baıytyp, baýyryna basqan jergilikti halyqqa degen rııasyz alǵysty ańǵarǵandaı bolamyz.