Elorda ákimdigi vandalızmmen kúrestiń erekshe túrin tájirıbege engizdi, dep jazady Egemen.kz.
Endi Astana qalasynda memleket múlki men jekeniń dúnıesine zııan keltirgenderdiń sýreti bıiktigi 65 metr bolatyn aınalma dóńgeleginen kórsetiledi. Ákimdik bul ádis arqyly osy máselege qoǵamnyń nazaryn aýdaryp, buzaqylyqtyń aldyn alýdy kózdep otyr.
«Vandalızmniń aldyn alý jumystary qalalyq prokýratýra men polısııa departamentiniń úılestirýimen «Quqyq jáne tártip» aıasynda júrgizilip jatyr. 2025 jyldyń basynan beri buzaqylyq jasaǵany úshin 25 adam jaýapqa tartyldy. Onyń 11-ine aıyppul salynyp, 14-i ákimshilik qamaýǵa alyndy», delingen ákimdik habarlamasynda.
Byltyr Astanada buzaqylyq jasaǵan 350-ge jýyq adam jaýapkershilikke tartylǵan. Aıta keteıik, buzaqylyq úshin ákimshilik jáne qylmystyq jaýapkershilik qarastyrylǵan.