Úndistannyń bas shahary – Nıý-Delıdegi «Tıagaradj» ulttyq stadıonynda qazaq kúresinen álem chempıonaty aıaqtaldy. Eki kúnge sozylǵan saıysta jer jahannyń 20-dan asa memleketinen kelgen 200-ge jýyq balýan baq synady. Olar 16 salmaq dárejesi boıynsha medaldar jıyntyǵyn sarapqa saldy.
Jarystyń ashylý saltanatynda Qazaq kuresi qaýymdastyǵynyń bas dırektory Damır Bekbosynov: «Úndistanda qazaq kúresi belsendi túrde damyp keledi. Búginge deıin atalǵan memlekette sporttyń osy túrinen tórt ret el chempıonaty uıymdastyryldy. Sizderdiń tól ónerimizge qyzyǵýshylyq tanytyp júrgenderińiz – biz úshin úlken maqtanysh. Ekijyldyqtyń basty dodasynda baq synaıtyn balýandarǵa sáttilik tileımin, dedi.
Erler arasyndaǵy báseke segiz salmaqta ótip, sonyń jeteýinde bizdiń jigitter qarsylas shaq keltirmedi. Atap aıtsaq, Bekjan Tólepov (55 kg), Meıirjan Bereketov (60 kg), Nur Amanshúkirov (66 kg), Jumajan Qojambekov (74 kg), Ersin Seıitqazynov (82 kg), Aıdos Ǵalymov (90 kg), Ersultan Muzafarov (100 kg) bas júldeni qanjyǵalaryna baılady. Tek asa aýyr salmaqta qazaq balýandary top jara almady. Fınalda Nurdáýlet Jarylqapov jeńilistiń kermek dámin tatty. О́zbekstannyń alyby Muqsyn Hýssımýdınovqa ese jiberdi. Júldeli oryndy ıelengender qatarynda Úndistan, Grýzııa, Ázerbaıjan, Polsha, Tájikstan, Estonııanyń apaıtósteri bar.
Áıelder saıysynda Aıjan Jylqybaeva (48 kg), Raýza Nurmuhambetova (56 kg), Zarına Záripova (65 kg), Álbına Baqıeva (+77 kg) altynnan alqa taqty. Roza Nysantaıqyzy (70 kg) fınalda nıderlandtyq Sem Van Dýnnan utylyp, kúmis medaldy enshiledi. Arýjan Adasqan (52 kg) men Gúlim Elýbaı (60 kg) qola medaldy ıelendi. О́zge salmaq dárejelerinde Sıtora Elmurodova (52 kg), úndistandyq Anný Anný (60 kg), grýzııalyq Nıno Odzelashvılı (77 kg) ozdy.
Sporttyq is-shara barysynda UWW tehnıkalyq delegaty Onýr Shımshek Qazaq kuresi qaýymdastyǵynyń bas dırektory Damır Bekbosynovtyń Birikken kúres áleminiń (UWW) ulttyq kúres túrleri komıteti atqarýshy keńesiniń músheligine qabyldanǵanyn jarııalady.
Taǵy bir aıta keterlik jaıt, tórtkúl dúnıeniń 40-tan astam memleketinde Qazaq kúresi federasııalary jumys isteıdi. Búginge deıin sporttyń osy túrinen 10 álem chempıonaty, 12 Azııa birinshiligi, 6 Álem kýbogi men 6 Eýropa chempıonaty ótti. 2023 jyly qazaq kúresi Er-Rııad qalasynda ótken Dúnıejúzilik jekpe-jek oıyndarynyń baǵdarlamasyna tuńǵysh ret endi. 2024 jylǵy V Dúnıejúzilik kóshpeliler oıyndary aıasyndaǵy qazaq kúresi jarysyna 46 memleketten 300-den astam sportshy qatysty. Qazaq kúresi oıyndardaǵy eń kóp sportshy qatysqan sport túri bolyp tanyldy.