Elimizdiń bylǵary qolǵap sheberleri Sofııada ótken «Strandja» týrnırinde tabysty óner kórsetip, jalpykomandalyq esepte jeke-dara kósh bastady. Ásirese erler quramasy qýantty. Jigitter 18 (5 altyn, 9 kúmis, 4 qola) júlde alsa, qyzdar 15 ret (1 altyn, 6 kúmis, 8 qola) jeńis tuǵyryna kóterildi.
Áıelderdiń fınaldyq saıystary qazaq jankúıerleri úshin kóńilsizdeý bastaldy. Alǵashqy bolyp sharshy alańǵa shyqqan bes qyzymyz birinen keıin biri utyldy. Atap aıtsaq, Áıgerim Sáttibaeva (48 kg) bolgarııalyq Sevda Asenovaǵa, Ánel Saqysh (54 kg) túrkııalyq Iаren Djamǵa, Aıdana Zabynbekova (57 kg) taıpeılik Ý Shı Ige, Rımma Volosenko (60 kg) kosovalyq Donjeta Sadıkýǵa, Jibek Jarasqyzy (81 kg) qytaılyq Rıdý Býǵa ese jiberdi. Sońǵy jupta asa aýyr salmaqtaǵy qazaqtyń qos burymdysy – Lázzat Kúngeıbaeva men Dına Islambekova bas júldeni ózara sarapqa saldy. Ekeýi de tanymal boksshylar.
37 jastaǵy Lázzat álem chempıonatynda úsh ret (1 altyn, 2 kúmis), Azııa birinshiliginde bes márte (1 altyn, 1 kúmis, 3 qola) jeńis tuǵyryna kóterildi. 24 jastaǵy Dına 2019 jylǵy dúnıejúzilik dodada qola medaldy qorjynǵa saldy. Qos jerlesimizdiń aıqasy Kúngeıbaevanyń jeńisimen aıaqtaldy. Elıanur Turǵanova (50 kg), Jansaıa Raqymberdi, Jazıra Oraqbaeva (52 kg), Symbat Álıasqar (54 kg), Laýra Esenkeldi (63 kg), Gaýhar Shaıbekova (66 kg), Azıza Isına (70 kg), Shuǵyla Nálibaı (75 kg) qola medaldy ıelendi.
Jigitter de bul jarysty sátsiz bastady. Danııal Sábıt (51 kg) Sámet Gıýmıýshke jol berdi. Bul básekede qandasymyz jaqsy-aq judyryqtasqan edi. Alaıda tóreshiler Eýropa chempıony, Eýropa oıyndarynyń fınalısiniń qolyn kóterdi. Osy týrnırde ózin jaqsy qyrynan kórsetken Tımýr Qabdeshov sheshýshi tusta ózbekstandyq Shahzod Mýzaffarovtan aılasyn asyra almady. Birinshi raýndty óz paıdasyna sheshken Serik Temirjanov (60 kg) odan keıin Radoslav Rosenovke tizgindi berip qoıdy. Nátıjesinde, tóreshi jergilikti boksshynyń qolyn kóterdi.
Sport súıer qaýym 67 kg salmaqtaǵy boksshylardyń ortaǵa shyǵýyn taǵatsyzdana kútti. Sebebi jas juldyz Tórehan Sabyrhannyń ónerin tamashalaýǵa tek qazaqtar ǵana emes, basqa da memlekettiń jankúıerleri aıryqsha yqylas tanytty. Jastar arasynda álem, Azııanyń birneshe dúrkin chempıony degen ataǵy bar asa daryndy boksshymyz eresekter dýyna alǵash ret qosylǵanyna qaramastan Sofııada barlyq qarsylasyn erkin eńserdi. Fınalda ázerbaıjandyq Zaýr Gahramanovty utqan Tórehan «Strandja» týrnıriniń altyn tuǵyryna kóterildi.
Sońǵy eki jekpe-jek Qazaqstan men О́zbekstannyń boksshylar arasynda ótti. Bul tartysta «ala taqııalylardyń» asyǵy alshysynan tústi. Erasyl Jaqpekov (80 kg) Fazlıddın Erkınboevtan utylsa, Aıbek Oralbaıdy (+92 kg) tóreshiler Jahongır Zokırovqa «jyǵyp» berdi. Rıngtegi qazy bolmaıtyn jerde bizdiń jigitke nokdaýn ashty. Ol azdaı, kezdesýdi qaıta-qaıta toqtatyp, boldyryp qalǵan ózbek boksshysynyń biraz demalyp alýyna múmkindik berdi.
Erler fınalynda elimizdiń segiz boksshysy ózara kúsh synasýǵa tıis edi. Alaıda Nurbek Oralbaı (86 kg) Bekzat Nurdáýletovke jol berýdi jón kórdi. Tımýr Nurseıitov (75 kg) jaraqatyna baılanysty Sabyrjan Aqqalyqovpen aıqasýdan bas tartty. Kúni búginge deıin Muhamedsabyr Bazarbaıuly (63,5 kg) men Ertýǵan Zeınýllınovtiń joldary eki márte túıisken. Eki kezdesýde de Bazarbaıulynyń baǵy jandy. Bolgarııa astanasynda Ertýǵannyń mysy basym boldy. Talaı dúbirli dúrmekte ysylǵan Abylaıhan Júsipovke (71 kg) ulttyq komandanyń jeıdesin endi ǵana kıgen Farýh Toqtasynovty toqtatý aıtarlyqtaı qıyndyq týǵyzǵan joq. Jartylaı fınalda jeńilgen Temirtas Júsipov (48 kg), Orazbek Asylqulov (57 kg), Talǵat Syrymbetov (60 kg), Danııar Raqymberdınov (92 kg) qola medaldy qanaǵat tutty.