Dáýirinde qolyndaǵy syrnaıyn saq-saq kúldirip, dombyrasyn bebeýletip, topqa tússe shashasyna shań juqpaǵan aqyn, sazger, ánshi Taıjan Qalmaǵambetuly esimi Ulytaý óńirine ǵana emes, elimizge tanymal. On eki jasynda án aıtyp, on bes jasynda Úkili Ybyraıdan bata alyp, Ulytaý, Kókshe, Syr boıy jurtyn ónerimen tánti etken Taıjan murasy – ult óneriniń qazynasy.
Eki kún boıy Sátbaev qalasyndaǵy Shynbolat Dildebaev atyndaǵy kenshiler saraıynda IV respýblıkalyq «Ulytaýdan qanat qaqqan aqyn Taıjan» atty dástúrli ánshiler baıqaýy ótti. Sátbaev qalasy ákiminiń qoldaýymen uıymdastyrylǵan óner dodasyna elimizdiń on oblysynan 18–35 jas aralyǵynda 18 ánshi qatysty. Baıqaýǵa qatysýshylardy Sátbaev qalasynyń ákimi Murat Bóribaev quttyqtap, osyndaı óner baıqaýlary jyl saıyn ótetinin jáne qoldaý kórsetetinin atap ótti.
Qazylar alqasynyń tóraǵasy – taıjantanýshy, ánshi Ǵalym Muhamedın aqynnyń taǵdyry men sońynda qalǵan murasy jóninde maǵlumat berdi.
Baıqaý aldynda Taıjan Qalmaǵambetuly atyndaǵy Ulytaý oblystyq fılarmonııasynyń aıtýly ánshileri shyǵyp, áýelete salǵan ánimen qatysýshylardyń delebesin qozdyryp, shabyttandyrdy. Alǵashqy kúni baıqaýǵa qatysýshy árbir úmitker Taıjan, Nartaı, Úkili Ybyraıdyń ánderinen barlyǵy úsh án oryndady.
Dombyra, syrnaımen shyqqan daryndy jastardyń oza shapqany da, baby kelispegeni de boldy. Batys Qazaqstan oblysy, Báıterek aýdanynyń mádenı-saýyq ortalyǵyna qarasty «Shyń» drama-mýzyka teatrynan kelgen Kenesary Bulǵanbaev – eń jas qatysýshy. Ol Taıjannyń áni «Saq-saq», Úkili Ybyraıdyń áni «Qaldyrǵan» jáne Nartaıdyń termesin oryndady. Alǵashqy áninen-aq jas darynnyń óner áleminde óz qoltańbasy bary baıqaldy.
Túrkistandyq Arýjan Úkili Ybyraıdyń «Gákký» ánin óziniń taqııasyna taqqan úkisindeı qulpyrtyp jiberdi. Qaraǵandylyq Alıana Berǵazyqyzynyń oryndaýyndaǵy Taıjannyń «Sholpanǵa» áni de kóńilden shyqty.
О́nerli jastarǵa baǵa beretin Qazaqstannyń eńbek sińirgen ártisi, ánshi Ǵalym Muhamedın basqarǵan qazylar alqasynyń músheleri osal emes. Sonaý Oraldan Qazaqstannyń eńbek sińirgen qaıratkeri Hatımolla Berdiǵalıev, Qaraǵandydan Táttimbet atyndaǵy óner kolledjiniń ustazy, ánshi Jaqsykeldi Kemalov, Ulytaýdan ánshi, ónertanýshy Serik Ospanov, Almatydan Qurmanǵazy atyndaǵy ulttyq konservatorııanyń dosenti, Mádenıet salasynyń úzdigi Kúzeýbaı Amankeldi, Qyzylordadan Mádenıet salasynyń úzdigi, Respýblıkalyq aqyn-jyraýlar odaǵynyń múshesi Aqmaral Noǵaıbaeva, Astanadan Qazaqstannyń eńbek sińirgen qaıratkeri, jyrshy, termeshi Qoshan Mustafauly, Temirbek Júrgenov atyndaǵy Qazaq ulttyq óner akademııasynyń dosenti, Mádenıet salasynyń úzdigi Sholpan Darjan, dástúrli ánshi Dárigúl Aldajanova bar.
Taıjan Qalmaǵambetulynyń nemere kelini Gúldári Ospanova: «Jarym, aqyn atamyzdyń nemeresi Ábdikárim Shýbaıuly 2006 jyly qaıtys boldy. Aqyn atamyz naǵashysy Úkili Ybyraıdan bata alǵan. Keýdesi ánge, tolqyndy jyrǵa tolǵan. Atamyz kez kelgen jerde aǵashtan jonyp dombyra jasap alady eken. Ándi kóbine syrnaımen aıtady. Kenen Ázirbaevpen aıtysqan, sýyrypsalmalyq óneri bar. Qarsaqbaıdyń mys zaýyty endi ashylyp jatqanda jan-jaqtan aqyn-jazýshylar kelip, atamen tanysady. «Qyzyl kenish» gazetiniń redaktory Ábdildá Tájibaev aqynmen jaqyn tanysyp, óleńderin osy gazetke beredi. Aqyn atamyz Qanysh Sátbaevpen tanysyp, ataqty geologke qoldaý kórsetken. 1934–1936 jyldary Máskeýde ótken qazaq óneriniń onkúndigine qatysqan. Syrnaıdy qulashtap án aıtqanda daýsy eki kóshtik jerden estiledi eken», dep biraz derek aıtty.
Sonymen baıqaý márege jetti. Bas júlde Túrkistan qalasynan kelgen Arýjan Saǵyndyqqa buıyryp, 1 500 myń teńgeniń sertıfıkaty berildi. Birinshi oryndy T.Qalmaǵanbetuly atyndaǵy Ulytaý oblystyq fılarmonııasynyń ártisi Madııar Maqsutov (1 mln teńge), ekinshi oryndy Almatydaǵy Qurmanǵazy atyndaǵy Qazaq ulttyq konservatorııasynan Madııar О́mirǵaly (700 myń teńge), úshinshi oryndy Batys Qazaqstan Báıterek aýdanynyń mádenı-saýyq ortalyǵyna qarasty «Shyń» drama-sazdy teatrynan Kenesary Bulǵanbaev (500 myń teńge) ıelendi.
Taıjan Qalmaǵambetuly atyndaǵy arnaıy júlde Qaraǵandy oblysy Shet aýdanynyń ortalyǵy Aqsý-Aıýlydan Aqjigit Dáýletbekke, Jaqsygeldi Seıilov atyndaǵy arnaıy júlde Astanadaǵy Qazaq ulttyq óner ýnıversıtetinen Aqnıet Serǵazınaǵa, Shynbolat Dildebaev atyndaǵy arnaıy júlde Qurmanǵazy atyndaǵy qazaq ulttyq konservatorııasynan kelgen Sáýlet Amanǵazınge buıyrdy.
Qostanaılyq Jasulan О́temuratov pen Qurmanǵazy atyndaǵy Qazaq ulttyq konservatorııasynan kelgen Abdýrrahman Estaıuly dıplomant atandy.
Sahna shymyldyǵy Taıjan Qalmaǵanbetuly atyndaǵy Ulytaý oblystyq fılarmonııasynyń ánshisi, respýblıkalyq baıqaýlardyń laýreaty Ádilet Turlyǵojaevtyń oryndaýyndaǵy «Atameken» ánimen jabyldy.
Mádenıet saraıyndaǵy zaldyń ár jerinde tarydaı shashylǵan sanaýly kórermendi kórgende kóńilimiz túsip qalǵan. Esti ánge emes, eser ánge úıir jastardyń boı kórsetpeýi kóńilge kirbiń uıalatty. Estrada ánshisi keldi dese, zalda ıne shanshar oryn bolmaıtyny anyq. Bárinen buryn dástúrli ándi nasıhattaǵan daryndy jastardyń ánin óz qatarlastary tyńdamaıtyny qabyrǵaǵa batady.
Ulytaý oblysy