Turǵyn úı zańynyń ońtaıly tetigi

Memleket járdemge muq­taj otbasylarǵa áleýmettik tólem­derden bólek te jan-jaq­ty qoldaý kórsetip keledi. Mysaly, osy kúnge deıin jetim balalar, kópbalaly, az qamtylǵan, múgedek bala tárbıelep otyrǵan, taǵysyn-taǵy osal toptaǵy otbasylar túrli baǵdarlamalar arqyly jalǵa baspana alyp, sonda turyp keldi. Iаǵnı olar jalǵa alǵan baspanaǵa naryqtaǵy baǵadan áldeqaıda az aqy tóleı­tin. Osylaısha, áleýmettik osal toptaǵy otbasylar jalǵa alǵan páterde ýaqytsha turýǵa múmkindik aldy. Qazir mundaı úılerde 70 myńnan astam adam turady. Osyǵan deıin satyp alý quqyǵynsyz jalǵa berilgen páterde turatyn otbasylarmen qosa, apatty turǵyn úıdiń ornyna dep usynylǵan baspanada turatyn otbasylar páterdi zań júzinde jekeshelendire almaıtyn. Al Prezıdent qol qoıǵan jańa zań talaptary úı alýdy kóksep júrgen talaı shańy­raqqa úmit syılaǵaly otyr.

Biz aıtyp otyrǵan qujat­tyń jekeshelendirýge qatysty normalary byltyr jeltoqsan aıynyń basynda qoldanysqa engenin eskersek, turǵyndar ózgeristiń sharapatyn sol kezden-aq kóre bastady. Iаǵnı turǵyn úı qorynan jalǵa alǵan úıdi jekeshelendirýge quqyq berildi. Aıtalyq, jeltoq­san­nan beri 400-ge jýyq adam páterin jekeshelendirip úl­ger­gen. Mysaly, jýyrda Májilis depýtaty Erlan Ábdıev áleýmettik jelidegi paraq­shasynda Jadyrasyn Sádýaqasov esimdi turǵynnyń satyp alý quqyǵynsyz berilgen páte­rin jekeshelendirgenin jarııalady. Qýanyshty habardy qarııaǵa Erlan Ábdıevtiń ózi jetkizip, úıdiń daıyn qujatyn qolyna ustatqan.

– Jadyrasyn Sádýaqasov 2007 jyldan beri Astana qala­synda I top múgedektigi bar tulǵa retinde úı kezegine tur­ǵan. 13 jyl kezek kútip shar­sha­ǵan aǵamyz 2020 jyly satyp alý quqyǵynsyz páter beretin baǵdarlamaǵa qatysýǵa amal­syz bel býǵan. Ol kezde baǵdarlama sharty bo­ıynsha úı memlekettiń balansynda, aǵamyzdyń úıdi jekeshelendirýge quqy bolmady. Byltyr Parlament osy sanattaǵy azamattarǵa baǵ­dar­lama arqyly alǵan úı­lerin tegin jekeshelendirý qu­qy­ǵyn beretin zań qabyl­dady. Prezıdent zańǵa 4 jel­toq­sanda qol qoıdy. Sodan beride osy sanattaǵy kóptegen azamat baspanaly boldy. Bir qýantarlyǵy, memleketten jalǵa alǵan páterdi tegin jeke­shelendiretin tulǵalar sany 11 myń dep jobalanady. Bul degenimiz – 11 myń otbasy kópten kútken páter kiltin qolyna alady degen sóz. Budan basqa sanattaǵy 30 myń azamat qaldyq qunymen úılerin jekeshelendire alady, – deıdi E.Ábdıev.

Talaı jyl ańsaǵan arma­ny­na jetken Jadyrasyn Sádýaqasov turǵyn úıge qatys­ty oılastyryp otyr­ǵan basqa da josparlary bar ekenin jasyrmaıdy. Qarttar úıinen pana tapqan aqsaqal turǵyn úı sharshy metrin kóbeıtse, nemerelerine oralǵysy keledi. Sebebi aı men kúnniń amanynda qarttar úıine aýysýyna úıdiń tarlyǵy máj­búr­lepti. Mine, bul, satyp alý quqyǵynsyz úıli bolǵan bir ǵana adamnyń taǵdyry, al Jadyrasyn qarııa sekildi bolmasa da tarshylyqta kún keship júrgen qansha otbasy bar?

Osy tusta, túsiniktirek bolý úshin aıta ketsek, azamattardyń keıbiri jalǵa alǵan úıiniń qunyn tolyq tólep alsa, taǵy bir bóligi qaldyq qunymen jekeshelendire alady. I, II top­taǵy múgedek jandar, soǵys ardagerleri, Chernobyl AES apatynda bolǵandar, Semeı ıadrolyq polıgony men Aral mańy ekologııalyq apa­­ty­nyń zardabyn kórgen azamat­tar úıin esh aqysyz tegin jeke­she­len­diredi. Jadyrasyn aqsaqal osy sanatqa kiretin bolǵan soń, satyp alý quqyǵynsyz turyp kelgen páterin óz atyna tegin aýystyryp otyr.