Qarjylyq saýattylyqtyń tómendigi saldarynan azamattarymyz alaıaqtardyń quryǵyna jıi ilinetin boldy. Kúmándi kýrstardan aýlaq bolyńyzdar dep qansha aıtsa da, kópshilik en baılyqtyń ústinen top ete túskendi áli de qolaı kóretin syńaıly. Taldyqorǵanda memlekettik satyp alý kýrsyna qatysty shýly is sońyna jetti. Sot isti tender arqyly qomaqty aqsha tabýdy úırenemin dep, qarjysynan aırylǵan tutynýshylardyń paıdasyna sheshti.
Juldyz Idirisova esimdi azamat Jetisý oblysy Saýda jáne tutynýshylardyń quqyǵyn qorǵaý departamentine sapasyz kýrsqa qatysty shaǵym túsirgen. Máselemen tanysqan departament mamandary ótken jyly bul týraly áleýmettik jelilerde habarlap, azamattardy qabyldaý ótkizdi. Artynsha taǵy da osy koýchtyń jumysyna shaǵymdanǵan 8 azamattyń shaǵymyn qabyldady.
Departament júrgizgen jumys nátıjesinde kásipker koýchtyń Salyq kodeksin elemeı, resmı kelisimshart jasaspaǵany, tólem kezinde fıskaldy chek bermegeni belgili boldy. Koých ýáde etilgen 1 aılyq kýrstyń 3-4 dárisin ótkizip, oqý úderisin toqtatqan. Bul «Tutynýshylardyń quqyǵyn qorǵaý» zańynyń 13-babyn óreskel buzý bolyp sanaldy. Saldarynan azamattar oqýdan da, qarjydan da qaǵylǵan. Oqýshylar arasynda tenderden tez aqsha tabýǵa úmittenip, nesıe rásimdegender de bar.
«Departament tutynýshylarǵa kásipker atyna sotqa deıingi talap joldaýda quqyqtyq kómek kórsetti. Oǵan kásipker 10 jumys kúni ishinde jaýap berýge mindetti. Alaıda kásipker jaýap bermeı, departament jeke kásipkerge qatysty jospardan tys tekseris ashty», dedi Departament basshysy Aıdos Dáýeshov.
Tekseris barysynda sapasyz qyzmetten zardap shekkenderdiń sany 18 adamǵa deıin artyp, Jetisý oblysynyń turǵyndarynan bólek Almaty, Qostanaı oblystary men Astana qalasynyń tutynýshylary da shaǵymdandy. Nátıjesinde, jalpy shyǵyn kólemi 6 593 000 teńgege deıin ulǵaıdy. Departament 10-nan astam tutynýshynyń zańdy múddesin qorǵaý maqsatynda Taldyqorǵan qalasy sotyna talap-aryz joldady. Sot úderisi barysynda kásipker koých úsh tutynýshyǵa 850 000 teńgeden tolyq kólemde, eki tutynýshyǵa 450 000 teńgeden bólip tóledi. Alaıda sot talaptardy tolyq kólemde qanaǵattandyrý týraly sheshim qabyldap, barlyq qatysýshynyń múddesin qorǵady.
Saýda mınıstrligine qarasty Tutynýshylar quqyǵyn qorǵaý komıtetine byltyr bilim salasyndaǵy qyzmetterge qatysty 877 shaǵym túsken. Negizinen tutynýshylar sapasyz kýrstar, oqytýshylardyń tómen biliktiligi, oqý kýrstaryna aqsha qaıtarýdan bas tartý máselelerine oraı shaǵymdanǵan. Tutynýshylardyń quqyǵyn qorǵaý komıteti mundaı «jyldam baıý» kýrstary shyǵynǵa ákeletinin eskertedi. Sondyqtan sarapshy trenerler týraly aqparatty muqııat tekserý, mindetti túrde resmı kelisimshart jasasý jáne fıskaldy chek talap etý qajet. Kúmándi jaǵdaılarda quqyqtaryńyzdy qorǵaý úshin ýákiletti organdarǵa júginýge bolady.