Monakoda shahmattan álemdik Gran-prı dodasynyń úshinshi kezeńi márege jetti. О́kinishke qaraı, bul jarysta elimizdiń eń úzdik oıynshysy Bıbisara Asaýbaevaǵa sáttilik serik bolmady.
Blısten eki dúrkin álem chempıony, rapıdten álem birinshiliginiń kúmis júldegeri, Azııa chempıony degen ataǵy bar qazaq qyzy týrnır barysynda birde-bir ret jeńiske jete almady. Monakoda Bıbisara toǵyz kezdesýdiń úsheýinde utylyp, alty ret teń tústi. Nátıjesinde, nebári 3 upaı jıǵan ol eń sońǵy 10-orynda qalyp qoıdy. Bul jarysta Aleksandra Gorıachkınanyń baǵy jandy. FIDE-niń týy astynda óner kórsetken 26 jastaǵy Reseıdiń ókili 5,5 upaı jıyp, bas júldeni oljalady. Dál sondaı nátıje kórsetken úndistandyq Hampý Konerý men mońǵolııalyq Bathýıag Mýngýntýýl ekinshi, úshinshi oryndy ózara bólisti.
Osyǵan deıingi eki kezeńniń qorytyndysy boıynsha B.Asaýbaeva jarys kestesinde kósh bastap turǵan edi. Qorjynynda 197,5 upaıy bar ol ekinshi orynǵa syrǵyp tústi. Kósh basyna A.Gorıachkına shyqty. Orynbor oblysynyń týmasy 236,67 upaıdy enshiledi. Úzdik úshtikti qytaılyq Tan Chjýnı (170 upaı) túıindep tur. Álemdik Gran-prı dodasynyń tórtinshi kezeńi 14–25 naýryz aralyǵynda Kıprde ótedi.