Mı tamyrlarynyń isinýin emdeý dárigerlerden joǵary kásibılikti, úlken jaýapkershilikti talap etedi. Ásirese moıny úlken nemese moıny joq anevrızmalardy arnaıy ádispen emdeý kezinde túrli másele týyndaıdy. Mundaı operasııany jasaǵanda asa saq bolǵan jón.
Aq halatty abzal jandardyń kómegine júgingen 66 jastaǵy qala turǵynynyń jaǵdaıy máz emes edi. Hali múshkil naýqastyń jaǵdaıyn tolyqqandy teksergen dárigerler oǵan «oń jaq orta mı arterııasyndaǵy anevrızma» degen dıagnoz qoıǵan. Bul dertti emdeýde arnaıy ádisterdi qoldanýdyń mańyzy zor.
Dárigerler keltirgen derekke júginsek, ádette anevrızmany klıps (qysqysh) ornatyp, ashyq orta arqyly emdeıdi. Alaıda aýrýhanaǵa túsken turǵynnyń júreginde dert bar bolǵandyqtan, operasııany basqa tásil arqyly júzege asyrý qajettigi týyndaǵan. Táýekelge bel býǵan aq halattylar operasııany qan tamyrlary arqyly, jergilikti anestezııamen júzege asyrýǵa májbúr bolǵan.
«Angıografııalyq sýretterden stent anevrızmanyń moınyna ornalastyrylǵanyn anyq baıqaýǵa bolady. Álden ýaqyttan keıin stenttiń ishine mıkrospıral engizildi. Nátıjesinde, anevrızma aýmaǵy tolyqqandy jabyldy. Operasııany jasamas buryn Italııadan kelgen bilikti sarapshylarmen keńestik. Mundaıda jan-jaqty aqyldasqan mamandardyń pikirin bilgen jón. «Jeti ret ólshep, bir ret keskennen» keıin ǵana táýekelge bel býǵan abzal. Jyldar boıy jınalǵan tájirıbeniń arqasynda kúrdeli operasııany sátti jasadyq deýge negiz bar. Eshqandaı asqyný bolǵan joq. Qysqasy, qoldan kelgen múmkindiktiń bárin qarastyrdyq», dedi Taraz qalalyq aýrýhanasynyń neırohırýrgııa bóliminiń meńgerýshisi Nurjan Áıtimbetov.
Operasııany neırohırýrg Erkebulan Merkibekov pen Bolat Keńshilik jasady. Dárigerlerdiń aıtýynsha, anevrızmany tolyq jabý úshin «pConus» atalatyn arnaıy stent-shatyr qoldanylǵan. Bul qurylǵy anevrızmanyń moınyn jappaı, sol jerdegi qan tamyrlaryn bastapqy qalypta saqtaýǵa múmkindik týǵyzady. Stent anevrızmany barynsha qorǵap, mıkrospıral arqyly ony tolyqtaı jabýǵa múmkindik beredi.
«Naýqastyń boıynan eshqandaı nevrologııalyq másele baıqalǵan joq. Kelesi kúni erkin qozǵalyp, bólmede ózi júrdi. Aldaǵy ýaqytta qan uıyp qalmas úshin saqtanǵannyń artyqtyǵy joq. Sondyqtan merzimi alty aıdy qamtıtyn arnaıy em-dom sharasy taǵaıyndaldy. Jarty jyl ishinde stent tolyqqandy jabylady. Sodan soń taǵaıyndalǵan dári-dármekti qabyldaý merzimi toqtatylady», deıdi dárigerler.
Dárigerlerdiń der kezinde aralasýynyń arqasynda kúrdeli anevrızma eknovaskýlıarlyq ádispen jabyldy. Naýqastyń jaǵdaıy der kezinde qalpyna keldi. Joǵary bilikti mamandar zamanaýı tehnıkany qoldana otyryp, kúrdeli operasııany sátimen júzege asyrdy.
Taraz