Aýylǵa barǵanda belgili mesenat Sapar Ysqaqov saldyrǵan Qostanaı oblysy Amangeldi aýdanynyń ortalyǵyndaǵy týrıstik keshendi baryp kórdim. Shalǵaı eldi mekende boı kótergen týrıstik hab, quddy tarıhı qalashyq. Ásirese Sultan Beıbarystyń eskertkishi qandaı eńseli. Adamǵa rýh beredi. Ulttyń jady qabyrǵasyna halyqqa jan-tánimen qyzmet etken tulǵalardyń esimderi jazylǵan.
Jalpy, týrıstik habtyń aýmaǵy – 7 gektar. Keshen ishinde uzyn sany 12 nysan salynady. Qazirdiń ózinde Eıfel munarasy, Venesııa kanaly jáne Saq monshasy sekildi álemge áıgili nysandardyń kóshirmesi tur. Astanadaǵy Beıbitshilik jáne kelisim saraıynyń kóshirmesi de oryn tepken. Endi Táj-Mahal kesenesiniń kóshirmesi qoıylmaq. Týrısterge arnalǵan qonaqúıi boı kótergen.
Sondaı-aq munda ulttyq qundylyqtarǵa da erekshe mán berilgen. О́zime «Besikke» qoıylǵan eskertkish qatty unady. Alystan aıshyqty kórinedi. Onyń bıiktigi astyndaǵy tuǵyrymen eseptegende 3 metrdiń ústinde. Uzyndyǵy da sol shamalas. Tuǵyrtasyna zańǵar jazýshy Muhtar Áýezovtiń «El bolam deseń, besigińdi túze» degen sózi jazylǵan. Shynynda da, halqymyz besikti aıryqsha qasıet tutqan. Osy kıeli besiktiń arqasynda qazaq túrli zaman teperishin kórse de, urpaǵyn kóbeıtti.
Bul eskertkishtiń avtory – kásibı sýretshi Boz Kenjeahmetov. Y. Altynsarın atyndaǵy Arqalyq pedagogıkalyq ınstıtýtynyń kórkemsýret fakýltetin bitirgen qylqalam sheberine bul oı oǵan alǵashqy nemeresi týǵanda kelgen eken.
«Aýylda týǵan kez kelgen qazaq balasy besikte terbelip, anasynyń áldıin tyńdap ósedi. Sondyqtan besiktiń orny bólek. Aldymen «Astananyń altyn besigi» degen joba jasadym. Bul úsh qabatty ǵımaratqa arnalǵan edi. Bir jaǵynan, Astanany úlken úı desek, sonyń besigi bolsa degen oıdy meńzedim. Bul jobany qala ákimdigine usyndym. Sodan keıin osy eskertkishtiń eskızin ázirledim. Ony Sapar Ysqaqov aǵaǵa jiberdim. Ol kisi birden qoldady. Sóıtip, ulym ekeýmiz jobaǵa kiristik. Barlyǵyn osynda ózimiz jasadyq. Tek týrıstik keshenniń ashylýy qarsańynda aparyp ornattyq. Sapar aǵa ony elge kólikpen jetkizip berdi.
Mundaı eskertkish elordanyń tórinde tursa da artyq emes. Osyndaı naqyshtaǵy eskertkishter qalaǵa kórik beredi. Shynymdy aıtsam, «Ulttyq altyn besik» atty keshen salsam dep armandaımyn. Jobasy daıyn. О́ıtkeni ulttyq tárbıe besikten bastalady. Sony kórgender odan oı túıer edi. Qazir elimizde «Dombyra» kúni atalyp ótiledi. Menińshe, «Besik» kúni de kerek sekildi. Ult qundylyqtaryn saqtaý men nasıhattaýǵa arnalǵan qazaq kúntizbesi bıyl 1 maýsymdy «Besik jáne ana men bala kúni» dep belgilepti. Osynyń ózi kóńilge qýanysh syılaıdy», deıdi sýretshi.
Qazir bul eskertkish jańa otaý kótergen jas jubaılar sýretke túsetin orynǵa aınalǵan.