Iyǵymen kók tiregen taý ańǵarlarynyń ásem kórinisin kózdiń qarashyǵyndaı saqtap, ondaǵy ormannyń otalmaýyn qadaǵalap júrgen tájirıbeli ormanshynyń biri – Bolathan Shaldyrmasov. «Áke kórgen oq jonar» demekshi, týǵan jerdiń tabıǵatyn qorǵaýdy bala jastan boıyna sińirip ósken azamat osy salada shırek ǵasyrdan astam ýaqyt tapjylmaı eńbek etip keledi.
«Ákem Naımanbaı Ekinshi dúnıejúzilik soǵys ardageri, II toptaǵy múgedek bolatyn. Biraq eshqashan densaýlyǵyn syltaýratyp jumystan jaltarǵan emes. 4 synyptyq qana bilimi bar edi, soǵan qaramastan ormanshylyq týraly bilimi barynsha tereń, tájirıbeli kisi boldy. Eńbekqorlyǵynyń arqasynda Saryjaz orman sharýashylyǵyn 40 jylǵa jýyq basqaryp, abyroıly eńbek etti. О́skeleń jastardy eńbekke baýlydy. Es bilgeli ákemdi únemi at ústinde kóretinmin, attaryn balasyndaı baptaýshy edi. Osy qasıet maǵan da daryǵan», degen ormanshy Bolathan Naımanbaıuly kóshetterdi kútip-baptaýǵa bala jastan mashyqtanǵanyn tilge tıek etti.
«Ol jyldary aýyldaǵy estııar balalar demalys kezinde bos júrmeı, ujymsharda, ormanshylyqta eńbek etetin. Bul bir jaǵynan ata-anaǵa kómek, ekinshi jaǵynan balalardy eńbekke baýlý mektebi boldy. Men de osy mektepten óttim. Bul kezeń ári demalys, ári eńbekke úırený edi. Balalyq shaqtaǵy talaı qyzyq osy taý bókterinde ótti. Sol kezde otyrǵyzǵan qaraǵaı, shyrshalarymyz qazir ný ormanǵa aınalyp, jaıqalyp tur», dep qaıta oralmas jalaýly jyldardy saǵynyshpen eske alady.
Áke jolyn jalǵastyryp ormanshy bolǵanyna 25 jyldan asqan Bolathan Naımanbaıuly ózi týyp-ósken óńirge aǵash otyrǵyzyp, kútip-baptaýdyń naǵyz mamany, maıtalmany atanǵan. Tabıǵat janashyry qorshaǵan ortany qorǵaýda kópke úlgi bolarlyq is tyndyryp, ómirlik tájirıbesin jastardyń boıyna talmaı sińirip keledi.
Ormanshynyń etken eńbek, tókken teri zaıa ketken joq. Birneshe ret oblystyq, aýdandyq ákimdiktiń, ózi qyzmet etetin mekemeniń maqtaý qaǵaz, alǵyshattary men baǵaly syılyqtaryna ıe boldy. Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń III dárejeli «Qazaqstan ormanyn qorǵaýdaǵy minsiz qyzmeti úshin» medalimen marapattalǵan.
«Bul – maǵan ǵana emes, ózim eńbek etken ujymǵa da úlken mártebe. Qazir ujymda saıdyń tasyndaı iriktelgen ormanshy jigitter úzeńgi qaǵysyp birge eńbek etip júr. Sondyqtan qandaı da bir jetistikke jetýime áriptesterimniń de úlesi bar. Ata-babalarymyz «Jalǵyz aǵash orman emes, jalǵyz kirpish qorǵan emes» dep tegin aıtpaǵan», dep aǵynan jaryldy Bolathan.
Orman – keler urpaqqa qalatyn mura, ony kútip-baptaý – ár azamattyń mindeti. Ákeden balaǵa jalǵasqan Shaldyrmasovtar áýletiniń ormanshylyq joly – kásipke adaldyqtyń jarqyn úlgisi. Osyndaı eńbekqor jandardyń arqasynda qazaqtyń keń dalasy men aımaq-atyraby jasyl ormanǵa aınalyp, tabıǵat óz kórkin saqtap keledi.
Almaty oblysy