San ultqa saıa bolǵan Syr jerindegi berekeniń bastaýy birlikte jatyr. Bir shańyraq astynda beıbit tirshilik keshken kóptegen etnosqa búgingi beınesi – yntymaqty eldiń yrysy artatynynyń dálelindeı. Osyndaı qoǵam birligine jurtshylyq arasyndaǵy kóp jaqsylyqtyń basynda júrgen Manzýra Abdýgafarova sekildi jandardyń qosqan úlesi az emes.
Manzýra Matkárimqyzy oblystyq Qazaqstan halqy Assambleıasy uıymdastyrǵan qaı is-sharanyń da bel ortasynda júredi. QHA janyndaǵy Analar keńesiniń belsendisi retinde jaǵdaıy tómen jáne kópbalaly otbasylaryna qaıyrymdylyq jasaýdan qalys qalǵan kezi joq. Balalar merekesinde «Atameken» otbasylyq úlgidegi balalar aýylyna baryp, syı-syıapat úılestirýdi de dástúrge aınaldyrǵan.
«Jalpy, qaıyrymdylyq degen etnos pen shekaraǵa bólinbeıtin, jer betindegi adamzat ataýlyǵa ortaq qasıet qoı. Bizdiń bala kúnimiz ben jastyq dáýirimizde qarttarǵa kómektesý, qınalǵan janǵa járdem jasaý qalypty qubylys bolatyn. Áke-sheshemiz, aınalamyz bizge sondaı tárbıe bergen. О́zimniń oıym – jaqsylyq jarnamasyz jasalýy kerek. «Oń qolyńnyń bergenin sol qolyń kórmesin» degen qaǵıdany ustanamyn», deıdi Manzýra Matkárimqyzy.
О́tken ǵasyrda Buqara óńirinen kelgen atalary osy Syr boıyna qonys teýipti. Túrkistan topyraǵynda dúnıege kelgen ákesi Mátkárim Qyzylordada ósken anasy Sarvarmen bas qurap, olardyń 10 balasy osy topyraqta ósip-óndi. 1978 jyly orta mektepti bitirgen soń Samarqandaǵy kooperatıv ınstıtýtyna tústi. Ony támamdaǵannan keıin joldama boıynsha Qyzylordaǵa oralyp, óndiristik taýarlar birlestigi mekemesine jumysqa ornalasty. Zeınetke «Best service» mekemesinen shyqty. Qazaqstan halqy Assambleıasy qurylǵaly beri onyń qyzmetine belsene aralasyp keledi.
«Qoǵamdyq kelisim» mekemesiniń táýelsizdigimizdiń 30 jyldyǵyna arnalǵan «30 jylǵa – 30 tulǵa» bastamasy aıasynda eldiń ósip-órkendeýine súbeli úles qosqan azamattar qatarynda eńbegi kópke tanystyryldy.
О́zbek etnomádenı birlestigi qurylǵaly qyzmet jasap kele jatqan keıipkerimiz baýyrlas eki eldiń tarıhy men tanymy astasyp jatqanyn aıtady. Ásirese qazaq pen ózbektiń maqal-mátelderiniń aıtylýy da, maǵynasy da mándes. «Atańnyń balasy bolma, adamnyń balasy bol» degen qazaqy tárbıeni «Otang bolası bўlma, odam bolası bўl» deıtin ózbek shańyraǵynan da kóresiz. Qazir Qahar Dadashev basqaratyn ózbek etnomádenı birlestigi baýyrlas eldiń dostyǵyn bekite túsetin is-sharalardy jıi uıymdastyryp keledi.
«Qazaqstan halqy Assambleıasyna 25 jyl», «Dýstlık» ózbek etnomádenı birlestiginiń «Dýstlık» medalimen marapattalǵan Manzýra Matkárimqyzynyń jastar tárbıesindegi orny bólek.
«Jastardyń bilimimen qatar tárbıesine de mán berýimiz kerek. Pandemııa kezinde 6 bekette 120 adamǵa tegin túski as uıymdastyryp, Arys qalasyndaǵy jarylystan keıin qurylys materıaldaryn jiberip, járdem kórsettik. Maqtaaral óńirin sý basqanda da qarap otyra almadyq, kómegimizdi berdik. Byltyr elimizdiń soltústiginde qarǵyn sýdan zardap shekken aǵaıynǵa járdem jasadyq. Ár mereke saıyn shaǵyn fýtboldan týrnırler ótkizip, jańajyldyq balalar erteńgiligin uıymdastyryp kelemiz. Osynyń bárin atymyzdy shyǵaryp, ataǵymyzdy ozdyrý úshin emes, keıingi jastarǵa úlgi bolsyn degen nıetpen jasap otyrmyz. Keıingi tolqynǵa ortaq Otan úshin osyndaı sátte judyryqtaı jumyla bilý kerektigin kórsetkimiz keldi», deıdi Manzýra Matkárimqyzy.
Qyzylorda